Qeyri-Hökumət Təşkilatlarına Dövlət Dəstəyi Agentliyinin 2024-cü il üçün kiçik qrant müsabiqəsində “Qərbi Azərbaycana qayıdış prosesi” istiqaməti üzrə qalib olan Azərbaycan Aşıqlar Birliyində artıq bir neçə gündür ki, layihənin həyata keçirilməsi istiqamətində fəal işlərə başlanılıb.

Bu barədə baki-xeber.com-a məlumat verən Azərbaycan Aşıqlar Birliyinin katibi, layihənin rəhbəri, Əməkdar mədəniyyət işçisi Musa Nəbioğlu bildirib ki, “Çağdaş Qərbi Azərbaycan aşıqlarının musiqi repertuarı” adlı layihənin həyata keçirilməsində əsas məqsəd Qərbi Azərbaycanın aşıq sənətinin əsas beşiklərindən biri olmasına diqqət çəkmək, öz dədə-baba torpaqlarından didərgin salınaraq bu gün Azərbaycanın müxtəlif guşlərində məskunlaşmış aşıqların yaradıcılıq fəaliyyətinə əlavə stimul verməkdir. Əsas diqqət ona yönəldiləcək ki, çağdaş Qərbi Azərbaycan aşıqları bu gün ölkəmizin müxtəlif bölgələrində yaşasalar da, Göyçə, İrəvan, Dərələyəz, Zəngəzur, Ağbaba, Loru-Pəmbək aşıq mühitlərinin ənənəsini necə qoruyub yaşada biliblər.

Layihənin icra planına uyğun olaraq ilkin mərhələdə ifaları diskə daxil ediləcək çağdaş Qərbi Azərbaycan aşıqlarının müəyyənləşdirilməsinə başlanılıb. Qərbi Azərbaycanda mövcud olmuş bütün aşıq mühitlərinin təmsil olunmasına diqqət yetirilir, öz dədə-baba yurdlarından didərgin salındıqdan sonra Bakıda və respublikamızın müxtəlif guşələrində məskunlaşmış Qərbi Azərbaycan əsilli aşıqların ifaları dinlənilərək, ifaları hazırlanacaq audiodiskə daxil ediləcək aşıqlar dəqiqləşdirillir. Bundan sonra isə hər aşığın səsinə uyğun olaraq aşıq havası seçiləcək və bu zaman Qərbi Azərbaycanda yaradılmış və bu bölgənin aşıq mühitləri ilə bağlı olan havalara üstünlük veriləcək. Mətn seçimində isə Vətən və vətənpərvərlik, Qərbi Azərbaycandakı yurd yerlərimizlə bağlı şeirlərə üstünlük təşkil edəcək.

İradə SARIYEVA

https://baki-xeber.com/11965-Cagdas-qerbi-azerbaycan-asiqlarinin-musiqi-repertuari-adli-audiodisk-hazirlanir.html

Azərbaycan Aşıqlar Birliyi (AAB) “Aşıq dastanları” kitabını nəşr edib. Kitab Azərbaycan dastanlarını əhatə edəcək çoxcildliyin birinci hissəsidir.

AZƏRTAC xəbər verir ki, bu barədə AAB-nin katibi, Əməkdar mədəniyyət işçisi Musa Nəbioğlu məlumat verib.

Nəşrin hazırlanmasında əsas məqsədin klassik aşıq dastanlarının çağdaş aşıqların repertuarında daşıdığı səciyyəni görmək olduğunu bildirən katib deyib: “Təqdim olunan dastanlar son illərdə ustad aşıqların repertuarından yazıya alınıb. Bu nəşrin əvvəlkilərdən fərqi ondadır ki, təqribən otuza yaxın dastanı əhatə edəcək bu antologiyada XXI əsrin ilk rübündə saz-söz aləmində dəyərli xidmətləri olan Arif (Əlövsət) Əsgərov, Hüseyn Qoşqarlı, Məmməd Bozalqanlı, Ürfan Əli, Nəbi Nağıyev, Altay Məmmədli, Nazim Bahadıroğlu, Elbrus Hüseynov, Şöhrət Kərimov, Elməddin Məmmədli, Ağamurad Şirvanlı, Elman Talıstanlı, Babək Şakirli, Nizami Şirinov, Gəncəli Babayev, Vüqar Qurbanov, Şəhriyar Kərimov və bu sıradan olan başqa saz-söz sənətkarlarının söylədikləri dastanlar canlı ifadan yazıya alınaraq lüğət və şərhlərlə birlikdə daha dolğun və mükəmməl şəkildə oxuculara təqdim olunur. Antologiyanın birinci cildində “Abbas və Gülgəz”, “Qurbani”, “Xəstə Qasım”, “Şahismayıl və Gülzar”, “Leyli və Məcnun”, “Vaqif”, “Aşıq Qərib”, “Tahir və Zöhrə” və “Yəhya bəy Dilqəm və Telli xanım” dastanları yer alıb.

Kitabın elmi redaktoru Azərbaycan Aşıqlar Birliyinin sədri, Dövlət mükafatı laureatı Məhərrəm Qasımlı, nəşrə hazırlayanlar Əməkdar elm xadimi, professor Məhərrəm Qasımlı, filologiya elmləri doktoru, professor Mahmud Allahmanlı, Əməkdar mədəniyyət işçisi Musa Nəbioğlu və filologiya üzrə fəlsəfə doktoru, dosent Altay Məmmədli, redaktoru isə filologiya üzrə fəlsəfə doktoru, dosent Aynur Xəlilovadır.

Antologiya saz-söz ictimaiyyətinə, aşıqşünas, musiqişünas və folklor tədqiqatçılarına dəyərli töhfədir”.

https://azertag.az/xeber/asiq_dastanlari_kitabi_isiq_uzu_gorub-3027678

Azərbaycan Aşıqlar Birliyinin sədri, Dövlət Mükafatı laureatı, Əməkdar elm xadimi, professor Məhərrəm Qasımlı "Heydər Əliyevin 100 illiyi (1923–2023)" yubiley medalı ilə təltif olunub.

Hörmətli Məhərrəm müəllimi bu münasibətlə Azərbaycan Aşıqlar Birliyinin idarə heyəti və çoxsaylı aşıqlar adından təbrik edir,  ona uzun və sağlıqlı ömür, Azərbaycan elminin  və aşıq sənətinin inkişafındakı yorulmaz fəaliyyətində bundan sonra da daha böyük uğurlar arzulayırıq.

AAB-nin İdarə heyəti

Bu il Şirvan aşıq mühitinin XX əsrdəki görkəmli nümayəndələrindən olan Bəylər Qədirovun anadan olmasının 110-cu ildönümüdür. Ustad aşıqların yubileylərinin qeyd olunmasına daim böyük diqqət yetirən Azərbaycan Aşıqlar Birliyində bu böyük sənətkarın yubileyinin qeyd olunması ilə bağlı da tədbirlər həyata keçirilməsi nəzərdə tutulur.

Bu sıradan ilk tədbir kimi, Azərbaycan Aşıqlar Birliyinin sədri, Əməkdar elm xadimi, professor Məhərrəm Qsımlının aparıcılığı ilə “Mədəniyyət” kanalında hər həftə efirə gedən “Saz-söz axşamı” verilişinin bir buraxılışının bütövlükdə Bəylər Qədirova həsr olunması planlaşdırılıb. Yaxın günlərdə efirə gedəcək həmin verilişdə aşıqlardan Əməkdar mədəniyyət işçisi Ağamurad Şirvanlı, Elman Talıstanlı, Qəlbinur İbrahimli və Babək Şakirli Bəylər Qədirovun repertuarından seçmə ifaları təqdim edəcək, ustadın özünün lent yazısı səsələndiriləcək.

Xatırladaq ki, Bəylər Qədirov 1914-cü ildə Salyanın Çuxanlı kəndində anadan olub. Vaxtilə özünün verdiyi məlumata görə, aşıqlığı əvvəlcə Aşıq Abbasdan, sonra isə Aşıq Şakir və Aşıq Maqsuddan öyrənib. 1938-ci ildən məclislərdə çıxış edib.

Azərbaycan aşıqlarının II və III qurultaylarında iştirak edib. Bir sənətkar kimi xidmətləri qiymətləndirilib, diplom, fəxri fərman və müxtəlif mükafatlara layiq görülüb.

Şirvan aşıq məktəbinin inkişafında özünəməxsus xidmətləri olan Aşıq Bəylər 1991-ci ildə vəfat edib.

2024-cü il may ayının 22-də “Musiqi kimliyimiz” layihəsi çərçivəsində 20-ci əsr Azərbaycan aşıq sənətinin görkəmli nümayəndəsi, Əməkdar incəsənət xadimi Aşıq Şəmşirin xatirəsinə həsr olunan ədəbi-bədii gecə keçirilib. Gəncə Dövlət Filarmoniyasında baş tutan konsert Mədəniyyət Nazirliyi və Azərbaycan Aşıqlar Birliyinin dəstəyi ilə reallaşıb.

Layihə çərçivəsində keçirilən konsert proqramını Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlı giriş sözüylə açaraq Aşıq Şəmşirin həyat və yaradıcılıq yolundan danışıb, Azərbaycan aşıq sənətinin inkişafındakı xidmətlərini vurğulayıb. Aşıq Şəmşirin nəvəsi Cavid Qurbanov çıxışında ikinci dəfə keçirilən layihəni yüksək qiymətləndirib.

Tədbirdə tanınmış aşıq haqda geniş söhbət açılıb, onun həyat və yaradıcılığını əks etdirən videoçarx nümayiş etdirilib.

Gecədə ustad aşıqlar Aşıq Şəmşir yaradıcılığına müraciət edərək müxtəlif aşıq havalarını səsləndiriblər. 

Konsert proqramında Əməkdar mədəniyyət işçiləri Fətullah Əliyev, Əhliman Allahverdiyev, İlqar Əhmədov, Ədalət Dəlidağlı, İbadət Allahverdiyev, eləcə də Şöhrət Kərimov, Elbrus Hüseynov, Əfqan Məmmədov, Firəddin Mehdiyev, Vüqar Qurbanov, Anar Abdullayev, Mirəli Mehdiyev, Saleh Tağıyev, Zülfüqar İsmayılov və digərləri çıxış ediblər.

2024-cü il aprelin 30-da Abşeron rayon Mədəniyyət Mərkəzində “Cəngi” sazçı folklor qrupunun  və Abşeron rayonunda fəaliyyət göstərən musiqi məktəblərinin saz siniflərində oxuyan şagirdlərin iştirakı ilə konsert keçirilib. Azərbaycan Aşıqlar Birliyinin təşkilatçılığı ilə keçirilən tədbirin əvvələində AAB-nin sədri, Əməkdar elm xadimi, professor Məhərrəm Qasımlı çıxış edərək son illərdə aşıq sənətinə dövlət səviyyəsində göstərilən diqqət və qayğı sayəsində  yeniyetmə və gənclərdə bu sənətə meyil və marağın artmasından, bu sahədə musiqi məktəblərinin məqsədyönlü fəaliyyətindən söz açıb, Abşeron rayonundakı musiqi məktəblərinin işini təqdir edib.

ADMİU-nun Aşıq sənəti kafedrasının müdiri, dosent Samirə Əliyeva öz çıxışında vaxtilə ADMİU-da aşıq sənəti ixtisası üzrə təhsil alıb, bu gün Abşeron rayonundakı musiqi məktəblərində çalışan gənclərin işini yüksək dəyərləndirib və onlara uğurlar arzulayıb. Digər çıxışçılar da aşıq sənətinə göstərilən qayğını və yeniyetmələrdə bu sənətə marağın artmasını xüsusi vurğulayıblar.

Çıxışlardan sonra konsert başlayıb. Nurlan Məmmədlinin rəhbərlik etdiyi “Sazçı” folklor qrupunun, eləcə də rayonun digər musiqi məktəblərinin saz siniflərində təhsil alan şagirdlərin ifasında səsləndirilən “Paşaköçdü”, “Təbli cəngi, cəngi Koroğlu”, “Kərəm gözəlləməsi”, “Osmanlı divani”, “Hacalı gözəlləməsi”, “Dubeyti”, “Bəhri divani”, “Orta sarıtel”, “Misri”, “Ruhani” və “Turan marşı” havaları tamaşaçılar tərəfindən böyük rəğbətlə qarşılanıb.

Aşıq sənətinə gənclər və yeniyetmələr arasında maraq gündən-günə artmaqdadır. Bu gün çox istedadlı gənc aşıqlar nəsli yetişməkdədir və onların arasında sabahına böyük ümidlər bəslənilənlər az deyil.

Onlardan biri də Toğrul İbrahimovdur. Toğrul saz ifaçılığı və özünəməxsus ifa tərzi ilə seçilməklə yanaşı, həm də dastan ifaçılığında fərqlənir. Bu günlərdə o, məhz çağdaş dastan ifaçılığındakı nailiyyətlərinə görə Azərbaycan Aşıqlar Birliyinin “Fəxri diplom”u ilə təltif olunub. AAB-nin sədri, Əməkdar elm xadimi, professor Məhərrəm Qasımlı “Fəxri diplom”u gənc aşığa təqdim edərək onun xüsusilə də dastan ifaçalığında gələcəyinə böyük ümid bəslədiyini bildirib, uğurlar arulayıb.

May ayının 23-24-də Bakıda Xəzər Universitetində keçirilən, təşkilatçılarından biri də Azərbaycan Aşıqlar Birliyi olan “Ozan-aşıq mədəniyyəti: tarixi köklər, müasir yanaşmalar və perspektivlər” adlı Beynəlxalq elmi simpoziumda iştirak etmək üçün ölkəmizə gələn Türkiyənin Nevşehir Hacı Bektaş Universitetinin professoru Bayram Durbilməz Aşıqlar Birliyini də ziyarət edib.  AAB-nin sədri, Əməkdar elm xadimi, professor Məhərrəm Qasımlı və  və Birliyin əməkdaşları ilə olan səmimi görüş zamanı aşıq sənətinin dünəni və bu günü, qarşıda duran vəzifələr barədə maraqlı fikir mübadiləsi aparılıb, Azərbaycan və Türkiyə aşıqları arasında yaradıcılıq əlaqələrinin daha da möhkəmləndirilıməsinin vacibliyi vurğulanıb.

M.Qasımlı hörmətli qonağı Azərbaycan Aşıqlar Birliyinə üzv qəbul edilməsi və təşkilatın Türkiyə təmsilçisi olması münasibəti ilə təbrik edərək üzvlük vəsiqəsini verib, Birliyin son illərdə nəşr etdirdiyi  kitabları hədiyyə edib.  Sonda xatirə şəkli çəkdirilib.

Xatırladaq ki, Bayram Durbilməz aşıq ailəsində dünyaya gəlib, Yozqatlı Aşıq Türkmənoğlu kimi tanınana aşıq Bahri Durbilməzin oğludur. Elmi araşdırmalarla məşğul olmaqla yanaşı, eyni zamanda bədii yaradıcılıqla da məşğul olur, şeir yazır. “Aşıq ədəbiyyatı araşdırmaları: Taşpinarlı xalq şairlər”, “Kayserili xalq şairlərinin şeirlərində Kıprıs”, “Aşıq Meydani: həyatı, sənəti, şeirlərindən örnəklər” və s. kitabları işıq üzü görüb.

Son illərdə bir sıra uğurlu layihələrə imza atan, aşıq sənətinə, ustad aşıqların həyat və yaradıcılıqlarına həsr olunmuş kitablar nəşr etdirən, onların ifalarının lentə alınması istiqamətində məqsədyönlü fəaliyyət göstərən Azərbaycan Aşıqlar Birliyi bu istiqamətdə həyata keçirilən işlərin miqyasını və coğrafiyasını daha da genişləndirmək üçün Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin qrant müsabiqələrində də uğurlu layihələrlə iştirak edir. Adıçəkilən qurumun 2024-cü il kiçik qrant müsabiqəsində də iştirak edən AAB-nin “Çağdaş Qərbi Azərbaycan aşıqlarının musiqi repertuarı” adlı layihəsi müsabiqənin “Qərbi Azərbaycana qayıdış prosesi” istiqaməti üzrə qalib olub.

Bu barədə məlumat verən Azərbaycan Aşıqlar Birliyinin katibi, layihənin koordinatoru, Əməkdar mədəniyyət işçisi Musa Nəbioğlu bildirib ki, layihənin əsas ideyası Qərbi Azərbaycandakı qeyri-maddi mədəni irsimizin mühüm hissəsi olan aşıq sənəti və bu bölgədəki aşıq mühitlərini təmsil edən çağdaş aşıqlarımızın tanıdılması, onların musiqi repertuarının zənginliyinə diddqətin yönəldilməsidir. Məqsəd Qərbi Azərbaycanın mədəniyyətimizin qədim və mühüm sahələrindən biri olan aşıq sənətinin əsas beşiklərindən biri olmasına diqqət çəkmək, öz dədə-baba torpaqlarından didərgin salınaraq bu gün Azərbaycanın müxtəlif guşələrində məskunlaşmış aşıqların yaradıcılıq fəaliyyətinə əlavə stimul verməkdir. Burada əsas diqqət ona yönəldiləcək ki, çağdaş Qərbi Azərbaycan aşıqları bu gün ölkəmizin müxtəlif bölgələrindfə yaşasalar da, Göyçə, İrəvan, Dərələyəz, Zəngəzur, Ağbaba, Loru-Pəmbək aşıq mühitlərinin ənənəsini necə qoruyub yaşada biliblər.

Layihənin rəhbəri Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlıdır.

Bakıda keçirilən III Türk Dünyası Ədəbiyyat və Kitab festivalı çərçivəsində bu il anadan olmasının 100 ili tamam olan Xalq şairi Hüseyn Arifin xatirəsinə həsr olunmuş tədbir keçirilib. Şair Barat Vüsalın aparıcılığı ilə keçən tədbirdə Azərbaycan Aşıqlar birliyinin sədri, Əməkdar elm xadimi, professor Məhərrəm Qasımlı, Millət vəkili, akademik Nizami Cəfərov, professor Rüstəm Kamal və digərləri çıxış edərək bu böyük söz ustadının həyat və yaradıcılığı barədə danışıb, onunla bağlı xatirələrini dilə gətiriblər.

Tədbirdə aşıqlardan Avdı Musayev, Şaiq İncəli, Altay Məmmədli, Şahniyar Əliyev, Şahin Süleymanov və digərləri müxtəlif aşıq havaları üstündə Hüseyn Arifin şeirlərini ifa ediblər.

Azərbaycan Aşıqlar Birliyində daha bir layihəyə start verilib. Bu dəfə musiqi məktəblərində aşıq sənətini tədris edənlər – aşıq-müəllimlər və onların fəaliyyəti diqqət mərkəzində olacaq. Bəllidir ki, son illərdə yeniyetmələr arasında aşıq sənətinə güclü maraq var. Bu gün az qala bütün musiqi məktəblərində saz siniflərinin fəaliyyət göstərməsi də bunun əyani sübutudur.

Həmin məktəblərdə ali təhsilli aşıqlar fəaliyyət göstərərək bu gün aradan çıxmaqda olan klassik ustad-şagird ənənəsinin yerini müəllim-şagird münasibəti ilə doldurmağa çalışırlar. Onların bir çoxu bu sahədə sadəcə dərs deməklə kifayətlənməyərək, həm də sazçı folklor qrupları yaradıblar. Paytaxtdakı 34 saylı uşaq musiqi məktəbinin müəllimi  Sahib İsmiyev “Misri”, Xırdalan şəhərindəki musiqi məktəbində çalışan Nurlan Məmmədli “Cəngi”, Suraxanı rayonunda fəaliyyət göstərən Cavanşir Ənvəroğlu “Qarabağ”, Qəlbinur İbrahimli “Şirvan”, Bakı Musiqi kollecinin müəllimləri Xavər Zəngilanlı və Xatirə GKərimova “Səda”  sazçı folklor qruplarına uğurla rəhbərlik edirlər. Bu kollektivlərin hər biri artıq kifayət qədər tanınır, müxtəlif tədbirlərdə uğurla çıxış edirlər. “Cəngi” sazçı folklor qrupunun bu yaxınlarda Xırdalan şəhərində keçirilən konserti də bunu deməyə əsas verir.

Aşıqlar Birliyində həyata keçirilən bu layihə bütövlükdə aşıq-müəllimlərin fəaliyyətinə, onların yetirmələrinə həsr olunacaq. Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlıın aparıcılığı ilə “Mədəniyyət” kanalında hər həftə efirə gedən “Saz-söz axşamı” verilişinin bir buraxılışı bütövlükdə bu mövzuya həsr olunacaq ki, burada məqsəd musiqi məkətbələrində aşıq sənətinin tədrisi və saz ifaçılığının öyrədilməsi məsələlərinə diqqət yetirilməsi, yeniyetmə və gənc ifaçıların efirə çıxarılaraq tanıdılması, eləcə də, sazçı folklor qruplarının musiqi repertuarının daha da zənginləşməsinə yardımçı olmaqdır. Verilişdə aşıq-müəllimlərin öz ifalarına da yer ayrılacaqdır. 

XX əsr Azərbaycan aşıq sənətinin görkəmli nümayəndəsi, ustad aşıq olmaqla yanaşı, həm də şair kimi məşhur olan, aşıq şeirinin müxtəlif şəkillərində gözəl poetik nümunələr yaradan Mikayıl Azaflının yeni şeirlər kitabı işıq üzü görüb. Azərbaycan Aşıqlar Birliyində nəşrə hazırlanan “Ağarmayın, ay saçlarım, amandı...” adlı bu kitabda ustad aşıq Mikayıl Azaflının bu il tamam olan 100 illik yubileyi münasibəti ilə saz-söz ictimaiyyətinə ərməğan olaraq onun 100 şeiri təqdim olunr. Burada ustadın yaradıcılığından seçmə şeirlər - əsasən aşıqların repertuarından düşməyən, dillərdə əzbər olsn poeziya nümunələri yer alıb. Sözügedən poetik örnəkləri müşayiət edə biləcək saz havaları, o cümlədən də ustadın özünün bəstələdiyi havalar şeirlərin sonunda göstərilmişdir.

Kitabı nəşrə hazırlayanlar Əməkdar mədəniyyət işçiləri Gülarə Azaflı və Musa Nəbioğlu, filologiya üzrə fəlsəfə doktoru Altay Məmmədli, elmi məsləhətçi və redaktoru, ön sözün müəllifi isə Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlıdır.