Bu günlərdə Azərbaycan Aşıqlar Birliyinin sədri, Əməkdar Elm xadimi, professor Məhərrəm Qasımlının ünvanına qonşu Dağıstandan – Dərbənd şəhər Mərkəzi Kitabxanasının direktorundan təşəkkür məktubu gəlib.

Məktubda Azərbaycan Aşıqlar Birliyinin kitabxanaya üçcildlik “Azərbaycan aşıq ədəbiyyatı” antologiyasını və aşıq sənətinə dair digər qiymətli vəsaitləri hədiyyə etdiyinə görə minnətdarlıq ifadə olunur, belə hədiyyələrin Dərbənddə yaşayan soydaşlarımız üçün böyük əhəmiyyət daşıdığı və bundan sonra da qarşılıqlı əlaqələrin inkişaf etdirilməsinin vacibliyi vurğulanır.
Birliyin sədri M.Qasımlı məktubu təqdim edən Zeynəb Dərbəndiyə təşəkkür edib, ona aşıq sənətinə dair yeni kitablar və Birliyin yeni layihəsi əsasında bu günlərdə hazırlanmış “Koroğlu havaları” vətənçilik, dövlətçilik və qəhrəmanlıq düşüncəsini daşıyan milli-mədəni dəyərlər kimi” adlı CD disk təqdim edib.

2018-ci il iyul ayının 9-da ATV kanalının “10-dan sonra” verilişində bir neçə saz ifaçısı arasında baş verən qalmaqalla bağlı bildiririk ki, onların heç biri Azərbaycan Aşıqlar Birliyinin üzvü deyil. Bununla belə, təkcə aşıqlar arasında deyil, bütövlükdə sənət adamlarının arasında bu cür arzuolunmaz münaqişələrin baş verməsindən təəssüf edirik. Televiziya milyonlarla izləyicisi olan bir auditoriyadır və belə bir tribunadan mədəniyyətimizi layiqincə təqdim etmək isə hər bir sənət adamının borcudur. Reklamarası baş vermiş belə bir üzdəniraq olayın ictimailəşdirilməsini isə düzgün hesab etmirik.

Bu günlərdə “Uğur” nəşriyyat-poliqrafiya mərkəzində “Məhərrəm Qasımlı. Ömür yolu və biblioqrafiya” adlı kitab nəfis tərtibatla çap olunaraq oxucuların ixtiyarına verilib. Bu barədə məlumat verən Azərbaycan Aşıqlar Birliyinin katibi, Əməkdar Mədəniyyət İşçisi Musa Nəbioğlu bildirib ki, Azərbaycan Respublikasının Dövlət Mükafatı laureatı, Əməkdar Elm Xadimi, professor, Azərbaycan Aşıqalr Birliyinin sədri Məhərrəm Paşa oğlu Qasımlının anadan olmasınnı 60 illik yubileyinə ərməğan kimi hazırlanan bu avtobioqrafik bilgi və biblioqrafiya göstəricisi görkəmli ziyalı, alim və şairin uzun illər boyu gerçəkləşdirdiyi elmi və ədəbi-bədii fəaliyyətinin mühüm bir qismini əhatə edir. Məhərrəm Qasımlının – Orxan Paşanın ana dili ilə yanaşı müxtəlif ölkə və dillərdə nəşr olunan əsərləri haqda məlumatlar da kitabda yer alıb. Bütövlükdə kitab 13 bölümdən ibarətdir:

“Məhərrəm Qasımlının ömür yolu”, “Həyatındakı mühüm məqamlar”, “Kitablarından seçmələr”, “Məhərrəm Qasımlı haqqında söylənilənlər”, “Məhərrəm Qasımlının rəhbərliyi altında müdafiə etmiş fəlsəfə doktorlarının siyahısı”, “Kitabları”, “Tərtib edib hazırladığı kitablar”, “Elmi məsləhətçisi və redaktoru olduğu kitablar”, “Dövri mətbuatda və məcmuələrdə dərc edilmiş məqalələri və hazırladığı folklor səhifələri”, “Şeirləri”, “Tərcümələri”, “Müsahibələri” və “Haqqında yazılanlar”.
M.Qasımlı 1958-ci il avqust ayının 5-də Tovuz rayonunun Alakol kəndində anadan olub. 1980-ci ildə Azərbaycan Dövlət Universitetinin (indiki BDU-nun) filologiya fakültəsini bitirib. 1983-cü ildə AMEA Nizami adına Ədəbiyyat İnstitutunun əyani aspiranturasına daxil olub, 1987-ci ildə “Şah İsmayıl Xətayinin poeziyası” mövzusunda namizədlik, 1997-ci ildə isə “Aşıq sənəti: təşəkkülü və mühitləri” mövzusunda doktorluq dissertasiyaları müdafiə edib. 2003-cü ildən folklorşünaslıq ixtisası üzrə professordur. 1992-ci ildən 2017-ci ilədək Ədəbiyyat İnstitutunun elmi işlər üzrə direktor müavini vəzifəsində çalışıb. Uzun illərdir ki, eyni zamanda pedaqoji fəaliyyətlə də məşğul olur.
M.Qasımlı Azərbaycan aşıqlarının 2008-ci ildə keçirilən V Qurultayında Aşıqlar Birliyinin birinci katibi vəzifəsinə seçilib, 2016-cı ilin mart ayından isə bu birliyə rəhbərlik edir.
M.Qasımlı elmi fəaliyyətindəki uğurlarına görə 2010-cu ildə Azərbaycan Respublikasının Dövlət mükafatına layiq görülüb, 2015-ci ildə ona “Əməkdar Elm Xadimi” fəxri adı verilib. 2016-cı ildən Azərbaycan Respublikası Dövlət mükafatı kimissiyasının üzvüdür.
Kitabı tərtib edən Xalidə Vəliyeva, redaktoru Yeganə Məmmədovadır.

Azərbaycan Aşıqlar Birliyində Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə həyata keçirilən “Koroğlu havaları” vətənçilik, dövlətçilik və qəhrəmanlıq düşüncəsini daşıyan milli-mədəni dəyərlər kimi” layihəsi üzərində işlər başa çatıb.

Bu barədə məlumat verən Birliyin katibi, Əməkdar Mədəniyyət İşçisi Musa Nəbioğlu bildirib ki, artıq layihə çərçivəsində görüləcək işlər yekunlaşıb. Belə ki, “Koroğlu havaları” ilə bağlı klassik ustadların ifaları dinlənilərək müzakirə olunub, onların çağdaş aşıqların repertuarında yenidən səsləndirilməsi məqsədyönlü bilinib. Respublikamızın müxtəlif guşələrində yaşayan istedadlı aşıqların arasında seçim aparılaraq, “Koroğlu havaları”nın ən yaxşı ifaçısı olan aşıqlar seçilərək onların ifasında qəhrəmanlıq ruhunda olan aşıq havaları lentə alınıb. Təqdim olunan CD albomda 16 aşıq havası yer alıb. Qələndər Zeynalov, Məhərrəm Hüseynli, Ağamurad Şirvanlı, Altay Məmmədli, Ramin Qarayev, Dəmir Vəliyev, İsa Qaraxanlı, Şöhrət Kərimov, Təbriz Vəliyev, Nəbi Nağıyev, Nazim Quliyev, Şaiq İncəli, Avdı Musayev, Anar Abdullayev, Xanlar Alqayıt, Babək Şakirli və Qabil Faxralı kimi istedadlı aşıqların, eləcə də “Çeşmə” sazçı folklor qrupunun ifasından yazıya alınan “Misri”, “Osmanlı divanisi”, “Şahsevəni”, “Eyvaz peşrovu”, “Təbli-cəngi Koroğlu”, “Ovşarı”, “Cəngi Koroğlu”, “Dərbəndi Koroğlu”, “Koroğlu dubeyti”, “Sulduzu”, “Sürütmə Koroğlu”, “Koroğlu gözəlləməsi”, “Bozuğu Koroğlu”, “İrəvan çuxuru”, “Koroğlu müxəmməsi”, havaları milli dövlətçilik düşüncəsinin, hərbi-vətənpərvərlik ruhunun yüksəldilməsinə xidmət edir.

Azərbaycan Aşıqlar Birliyinin istedadlı nümayəndəsi, ustad aşıq Elxan Astaralının 60 illiyi münasibəti ilə iyun ayının 22-də Aşıqlar Birliyi və Astara İcra Hakimiyyətinin birgə təşkil etdiyi yubiley böyük təntənə ilə keçmişdir. Aşıqlar Birliyi və Astara ictimaiyyətinin təşkil etdiyi bu tədbir rayon Mədəniyyət Mərkəzində olmuşdur. Aşıq Elxanın həyat və sənət yolu barədə məruzə dinlənildikdən sonra yubiliyara ünvanlanmış təbrik və təltiflər təqdim olunmuşdur.

Tədbirdə Aşıqlar Birliyinin sədri Məhərrəm Qasımlı, fəlsəfə doktoru Mehman Qaraxanoğlu, şair Aqil Yaqub, ustad aşıq Məhəmməd Şirvanlı və Altay Məmmədli çıxış edərək yubiliyarı təbrik etmişlər. Aşıq Elxana ustad dərsi verən böyük saz-söz sənətkarı Aşıq Pənah Pənahovun oğlu Taleh Pənahoğlu Salyan ictimaiyyətinin sevgi və salamlarını çatdırmışdır.
Tədbirin sonunda aşıq Elxan Astaralının rəhbərlik etdiyi “Sindan qalası” ansamblının geniş konserti olmuşdur.
Yubileydə Azərbaycan Aşıqlar Birliyindən qonaq gəlmiş aşıqlar da fəal iştirak etmişlər.

Altay Məmmədli
AAB-ın katibi fəlsəfə doktoru

Mayın14-də R.Behbudov adına Dövlət Mahnı Teatrında Mədəniyyət Nazirliyi və Azərbaycan Aşıqlar Birliyinin birgə təşkilatçılığı ilə ustad aşıq Məhəmməd Şıxlının (Dərya Məhəmmədin) anadan olmasının 110 illiyinə həsr olunmuş tədbir keçirilib.

Gecənin aparıcısı ədəbiyyatşünas və ustad jurnalist Məti Osmanoğlu giriş sözü ilə  tədbiri açaraq ustad aşıq Məhəmməd Şıxlının həyat və yaradıcılığından, aşıq sənətinə verdiyi töhfələrdən danışıb. Qeyd edib ki, bu gün el arasında daha çox Dərya Məhəmməd kimi tanınan aşıq Məhəmməd Şıxlıdan danışanda ilk yada düşən “Yurd yeri” havası olur və təsadüfi deyil ki, bu gün aşıq Məhəmmədin keçdiyi sənət yolu Azərbaycan aşıq sənətkarlığının “yurd yeri”nə çevirilib.
Aparıcının ustad aşıqla bağlı geniş təqdimatından sonra söz Azərbaycan Aşıqlar Birliyinin sədri, professor, Əməkdar Elm Xadimi Məhərrəm Qasımlıya verilib. Ustad sənətkarın XX əsr Azərbaycan aşıq sənətinin inkişafındakı xidmətlərindən, dövrünün bir çox ustad sənətkarlarıyla yaradıcılıq və dostluq əlaqələrindən danışan professor deyib: “Aşıq sənətində elə sənətkarlar var ki, onların nə ifası,  nə də siması çoxlarının yadında qalmır, onların söz yükü yadda qalır.  Dərya Məhəmməd o kişilərdən idi. Onun özünəməxsus oxumaq tərzi var idi. Çalğısı da bənzərsiz idi”.
Akaemik Teymur Bünyadov, AMEA Folklor İnstitutnun direktoru, akademik Muxtar İmanov və Azərbaycan Yazıçılar Birliyi Qazax Bölməsinin sədri, Əməkdar İncəsənət Xadimi Barat Vüsal çıxış edərək Məhəmməd Şıxılının ustad aşıq kimi özünəməxsusluğundan və bənzərsizliyindən, aşıq sənətinin inkişafındakı xidmətlərindən söz açıblar.
Gecənin bədii hissəsində Əməkdar Mədəniyyət İşçisi Gülarə Azaflının rəhbərlik etdiyi “Çeşmə” folklor qrupu “Şirvan müxəmməsi”, Avdı Musayev “Yurd yeri”, Əməkdar Mədəniyyət İşçisi Əhliman Şirvanlı “Gözəlləmə”, Əməkdar Mədəniyyət İşçisi Gülarə Azaflı və gənc aşıq Roman Azaflı “Dübeyti”, Altay Məmmədli “Orta sarıtel”, Əməkdar Mədəniyyət İşçisi Solmaz Kosayeva “İncəgülü”, Telli Borçalı “Naxçıvanı”, Şaiq İncəli “Hüseyni”, İlham Aslanbəyli “Mixəyi”, Bəhmən Göyçəli və Firudin Göyçəli “Gəraylı”, Ramin Qarayev “Dərvişi”, Əfsanə Kərimli “Şahsevəni”, Sahib Hacılı və Fidan Qurbanova “Orta müxəmməs”, Məhəmməd Şıxlı “Ruhani”, Xavər Zəngilanlı “Koroğlu dübeytisi”, İsmayıl İncəli “Aran gözəlləməsi” havalarını ifa ediblər.
Sonda ustad aşığın qızı Gülarə Qocayeva ailəsi adından tədbirin təşkilatçılarına minnətdarlığını bildirib.

Musa NƏBİOĞLU

[bt_slider uid="1526447536-5afbbdb0f0788" target="_blank" width="0" crop="no" thumbnail_width="800" thumbnail_height="600" show_title="no" centered="yes" arrows="yes" pagination="bullet" autoplay="5000" speed="600"][bt_image src="/images/bt-shortcode/upload/20180514_201136.jpg" title="20180514_201136.jpg" link="" parent_tag="slider"] [bt_image src="/images/bt-shortcode/upload/20180514_212044.jpg" title="20180514_212044.jpg" link="" parent_tag="slider"] [bt_image src="/images/bt-shortcode/upload/20180514_201607.jpg" title="20180514_201607.jpg" link="" parent_tag="slider"] [bt_image src="/images/bt-shortcode/upload/20180514_210615.jpg" title="20180514_210615.jpg" link="" parent_tag="slider"] [bt_image src="/images/bt-shortcode/upload/20180514_201012.jpg" title="20180514_201012.jpg" link="" parent_tag="slider"] [bt_image src="/images/bt-shortcode/upload/20180514_191913.jpg" title="20180514_191913.jpg" link="" parent_tag="slider"] [bt_image src="/images/bt-shortcode/upload/20180514_190832.jpg" title="20180514_190832.jpg" link="" parent_tag="slider"] [bt_image src="/images/bt-shortcode/upload/20180514_200306.jpg" title="20180514_200306.jpg" link="" parent_tag="slider"] [bt_image src="/images/bt-shortcode/upload/20180514_191836.jpg" title="20180514_191836.jpg" link="" parent_tag="slider"][/bt_slider]

Gürcüstanının Marneuli rayonunun Sadaxlı kəndində yaşayıb fəaliyyət göstərən ziyalı Səyyad Xəlilov iyulun 17-də Azərbaycan Aşıqlar Birliyində olub. Birliyin sədri, Əməkdar Elm Xadimi, professor Məhərrəm Qasımlı ilə S.Xəlilovun arasında olan səmimi görüşdə Borçalı aşıq mühitinin dünəni və bu günü ilə bağlı maraqlı söhbət olub, fikir və mülahizələr söylənilib.

Professor M.Qasımlı Borçalı aşıq mühitinin Azərbaycan aşıq sənətinin əsas sütunlarından biri olduğunu vurğulayaraq qeyd edib ki, Azərbaycan Aşıqlar Birliyi Borçalı aşıqlarını daim diqqətdə saxlayır, bu bölgədə aşıq sənətinin bundan sonra da inkişafına hərətərəfli dəstək göstərəcək.
Görüşün sonunda M.Qasımlı qonağa aşıq sənətinə dair qiymətli kitablar hədiyyə edib.

May ayının 11-də  M.Maqomayev adına  Dövlət Filarmoniyasında Azərbaycan  Respublika Mədəniyyət  Nazirliyi və Aşıqlar Birliyinin birgə təşkilatçılığı ilə şərqdə ilk demokratik respublika olan Azərbaycan Xalq Cümhuriyyətinin və Azərbaycanın milli ordusunun yaradılmasının 100 illik yubileyinə həsr olunmuş ədəbi-bədii gecə keçirilib. Tamaşaçılarının əksəriyyəti Azərbaycan ordusunun əsgər və zabitləri olan tədbiri giriş sözü ilə açan Azərbaycan Aşıqlar Birliyinin sədri, Əməkdar Elm Xadimi, professor Məhərrəm Qasımlı deyib:

“1918-ci ildə qurulan müstəqil Azərbaycan dövlətinin ömrü 23 ay çəksə də, 1991-ci il oktyabrın 18-də Azərbaycanın dövlət müstəqilliyi yenidən bərpa olundu.  Böyük tarixi şəxsiyyət, siyasət elminin mahir bilicisi Heydər Əliyevin 1993-cü ildə Azərbaycanda yenidən siyasi hakimiyyətə qayıdışı isə bu müstəqilliyin əbədi olmasının qarantı oldu. Ümummilli liderimiz ölkəni labüd süqutdan xilas etdi və onun rəhbərliyi altında Azərbaycanda ordu quruculuğunun da yeni mərhələsi başlandı. Silahlı Qüvvələrin formalaşması prosesi geniş vüsət aldı.  Bu proses dünya təcrübəsinə və milli dəyərlər sisteminə əsaslanmaqla uğurla davam etdirildi. Qısa müddətdə atılan düşünülmüş addımlar öz bəhrəsini verdi - nizami ordu yaradıldı”.
Ümummilli lider Heydər Əliyevin 1998-ci il mayın 28-də imzaladığı Fərmanla hər il iyun ayının 26-nın  Azərbaycan Respublikasının Silahlı Qüvvələr Günü elan olunduğunu xatırladan M.Qasımlı Ulu öndərin bu sözlərini xüsusilə diqqətə çatdırıb: “Azərbaycanın hər bir vətəndaşı mənim üçün əzizdir, amma Azərbaycan əsgəri, zabiti mənə hər bir vətəndaşdan daha əzizdir, daha yaxındır”.
Professorun çıxışında o da vurğulanıb ki, Ulu Öndər Heydər Əliyevin ordu quruculuğu ilə bağlı həyata keçirdiyi tədbirlər bu gün onun siyasi kursunun layiqli davamçısı, Prezident İlham Əliyev tərəfindən inamla, uğurla davam etdirilir, ordumuz yeni silah və texnika ilə təchiz edilir. Bu gün Milli Ordumuz müstəqilliyimizin, dövlətçiliyimizin qarantıdır.
Sonra tədbirin bədii hissəsi başlayıb. Əməkdar Mədəniyyət İşçisi Gülarə Azaflının rəhbərlik etdiyi “Çeşmə” folklor qrupunun, aşıqlardan Əməkdar Mədəniyyət İşçisi Ağamurad İsrafilov, Cahangir Quliyev, Tərmeyxan Qurbanov, Altay Məmmədli, Nəbi Nağıyev, Şöhrət Kərimov, Gözəl Kəlbəcərli, Şaiq İncəli, Avdı Musayev, Qələndər Zeynalov, Bəhmən Göyçəli, Roman Azaflı, Səyyad Aydınoğlu və digərlərinin çıxışları tamaşaçılar tərəfindən rəğbət və alqışlarla qarşılanıb.

Azərbaycan aşıq sənətinə ağır itki üz verib – gənc və istedadlı solo-saz ifaçısı Azər Xanlar oğlu uzun sürən ağır xəstəlikdən sonra 2018-ci il may ayının 12-də vəfat edib.
Azər Xanlaroğlu Məhərrəmov 1983-cü il aprel ayının 27-də Tovuz şəhərində Azərbaycan aşıq sənətinin görkəmli nümayəndəsi, ustad aşıq Xanlar Məhərrəmovun ailəsində dünyaya gəlib. Gözünü açandan evdə saz görən, sazın laylası ilə böyüyən Azər hələ kiçik yaşlarından saza-sözə böyük maraq göstərib, tez zamanda istedadı ilə yaşıdlarından seçilib, bənzərsiz ifası ilə bir daha sübut edib ki, ustad oğlu şəyird olmaz. Qısa müddətdə istedadlı solo-saz ifaçısı kimi Azərbaycanda məşhurlaşıb, sorağı ölkəmizin hüdudlarını aşıb.

Respublikamızda keçirilən bir çox müsabiqələrin qalibi və laureatı olan Azər Xanlaroğlu son onillikdə  ölkəmizdə keçirilən aşıq festivalları və digər rəsmi tədbirlərdəki uğurlu çıxışları ilə geniş tamaşaçı və dinləyici kütləsinin rəğbətini qazanıb, dəfələrlə Azərbaycan aşıq sənətini xarici ölkələrdə, o cümlədən UNESCO səviyyəsində keçirilən tədbirlərdə layiqincə təmsil edib.
Azər Xanlaroğlu 2008-ci ildən eyni zamanda Azərbaycan Aşıqlar Birliyi İdarə heyətinin üzvü idi və Birliyin həyata keçirdiyi bütün tədbirlərdə yaxından iştirak edirdi. Gənc aşıqlar arasında özünəmxsus bənzərsiz ifası ilə seçilirdi.
Gənc yaşlarından ustadlıq səviyyəsinə yüksələn, təkcə Azərbaycanda yox, həm də Türkiyədə, İranda, Gürcüstanda və digər türkdilli ölkələrdə də tanınıb sevilən Azər Xanlaroğlunun həyatdan vaxtsız köçməsi aşıq sənəti üçün böyük itkidir.
Azər Xanlaroğlunun əziz xatirəsi onu tanıyanların, yaxınlarının və doğmalarının, bütün sənətsevərlərin qəlbində əbədi yaşacaq.
Allah rəhmət eləsin!

Azərbaycan Aşıqlar Birliyində Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə həyata keçirilən “Koroğlu havaları” vətənçilik, dövlətçilik və qəhrəmanlıq düşüncəsini daşıyan milli-mədəni dəyərlər kimi” layihəsi üzərində işlər tamamlanmaq üzrədir. Bu barədə məlumat verən Birliyin katibi, Əməkdar Mədəniyyət İşçisi Musa Nəbioğlu bildirib ki, artıq layihə çərçivəsində görüləcək işlərin çoxu həyata keçirilib.

Belə ki, “Koroğlu havaları” ilə bağlı klassik ustadların ifaları dinlənilərək müzakirə olunub, onların çağdaş aşıqların repertuarında yenidən səsləndirilməsi məqsədyönlü bilinib. Respublikamızın müxtəlif guşələrində yaşayan istedadlı aşıqların arasında seçim aparılaraq, “Koroğlu havaları”nın ən yaxşı ifaçısı olan aşıqlar seçilərək onların ifasında qəhrəmanlıq ruhunda olan aşıq havaları lentə alınıb. Təqdim olunacaq CD albomda 20-dək aşıq havası yer alacaq. Qələndər Zeynalov, Məhərrəm Hüseynli, Samirə Əliyeva, Əli Tapdıqoğlu, Ağamurad Şirvanlı, Altay Məmmədli, Ramin Qarayev, Dəmir Vəliyev, İsa Qaraxanlı, Şöhrət Kərimov, Təbriz Vəliyev, Nəbi Nağıyev, Nazim Quliyev, Şaiq İncəli, Avdı Musayev, Anar Abdullayev, Xanlar Alqayıt, Babək Şakirli, Roman Azaflı, Elvin Axundov, Sahib İsmiyev və Qabil Faxralı kimi istedadlı aşıqların, eləcə də “Çeşmə” və “Misri” sazçı folklor qruplarının ifasından yazıya alınan həmin ifalar milli dövlətçilik düşüncəsinin, hərbi-vətənpərvərlik ruhunun yüksəldilməsinə xidmət edir.

2018-ci il iyun ayının 11-də axşam saat 7-də M.Maqomayev adına Dövlət Filarmoniyasında Azərbaycan Respublikası Mədəniyyət Nazirliyi və Azərbaycan Aşıqlar Birliyinin birgə təşkilatçılığı ilə Milli Ordunun 100 illiyinə həsr olunmuş konsert keçiriləcək.

Giriş sərbəstdir. Arzu edənlər iştirak edə bilər.

Ölkəmizdə Azərbaycan Xalq Cumhuriyyətinin 100 illiyinə həsr olunmuş təıdbirlər davam edir. Azərbaycan Dövlət Mədəniyyət və İncəsənət Universitetində “Türksoylu xalqların mədəniyyətinin tədqiqi problemləri” adlı XVII Beynəlxalq elmi-praktik konfrans da bu möhtəşəm yubileyə həsr olunub. 2018-ci il aprel ayının 13-də həmin konfrans çərçivəsində amerikalı tədqiqatçı Anna Oldfildin tərcüməsində Əminə Eldarovanın yenicə işıq üzü görmüş “Azərbaycan aşıq sənəti” kitabının təqdimatı keçirilib.

Azərbaycan Aşıqlar Birliyinin katibi, Əməkdar Mədəniyyət İşçisi Musa Nəbioğlu bildirib ki, Azərbaycan Dövlət Mədəniyyət və İncəsənət Universiteti və Azərbaycan Aşıqlar Birliyinin birgə təşkilatçılığı ilə keçirilən tədbiri giriş sözü ilə ADMİU-nun rektoru, professor Fərəh Əliyeva açaraq Əminə Eldarovanın bu kitabının aşıq sənətinin öyrənilməsində böyük rolu olduğunu qeyd edib, indiydək Azərbaycan və rus dillərində nəşr olunmuş əsərin bu gün ingilis dilində də çap olunmasının isə daha böyük əhəmiyyət daşıdığını vurğulayıb. F.Əliyeva kitabın tərcüməçisi, amerikalı professor Anna Oldfieldin redaktorların zəhmətini yüksək dəyərləndirdikdən sonra tədbiri aparmaq üçün sözü Azərbaycan Aşıqlar Birliyinin sədri, Əməkdar Elm Xadimi, professor Məhərrəm Qasımlıya verib. M.Qasımlı bu kitabın aşıq sənətinin tədqiqi sahəsində çox sanballı əsər olduğunu qeyd edib, eləcə də, Anna Oldfieldin Azərbaycan aşıq sənətinin beynəlxalq aləmdə təbliği istiqamətində gördüyü işləri yüksək qiymətləndirib. Qeyd edib ki, A.Oldfild Azərbaycan Aşıqlar Birliyi ilə də müntəzəm olaraq əlaqə saxlayır.

Kitabın ingilis dilində nəşrinin redaktoru Səadət İbrahimova, Azərbaycan dilində nəşrin redaktoru professor Kamilə Dadaşzadə, professor Fəttah Xalıqzadə, Xalq artisti Zamiq Əliyev, Əməkdar artist Vamiq Məmmədəliyev və başqaları çıxış edərək Azərbaycan aşıq sənətinin öyrənilməsində əvəzsiz mənbə olan bu kitabın ingilis dilində nəşrini əlamətdar hadisə kimi dəyərləndiriblər.

Anna Oldfield çıxış edərək Azərbaycan mədəniyyəti ilə ilk tanışlığından, aşıq sənətinə marağından, bu sənətlə bağlı apardığı tədqiqat işlərindən və gələcək planlarından danışıb.

Əminə Eldarovanın qızı Dilarə Əlizadə kitabın nəşrində zəhməti olan hər kəsə minnətdarlığını ifadə edib.

Tədbirdə həmçinin aşıqlardan Əməkdar Mədəniyyət İşçiləri Əhliman Rəhimov və Nemət Qasımlı, eləcə də Altay Məmmədli və Ramin Qarayev müxtəlif aşıq havalarını səsləndiriblər.