Respublikamızda qonaq olan İran İslam Respublikasınnın vətəndaşları – aşıq sənətinin, xüsusilə də Urmiya aşıq mühitinin araşdırıcısı, şar, “Yaz” nəşriyyatının rəhbəri Bəhram Əsədi və Zənganlı alim, professor Məhəmməd Rza Bağban 2018-ci il oktyabrın 1-də Azərbaycan Aşıqlar Birliyində olublar.

Birliyin sədri, Əməkdar elm xadimi, professor Məhərrəm Qasımlı ilə görüşən qonaqlar İrandakı aşıq mühitləri və apardıqları tədqiqatlar haqqında məlumat verib, Birliyin kitabxanasına öz əsərlərini təqdim ediblər. Öz növbəsində M.Qasımlı da Azərbaycan Aşıqlar Birliyinin fəaliyyəti ilə qonaqları tanış edib, onlara Birliyin nəşrlərini hədiyyə edib.
Qərara alınıb ki, gələcəkdə qarşılıqlı əlaqələr daha da genişləndirilsin, birgə tədbirlərin keçirilməsi istiqamətində işlər görülsün.

Bu günlərdə Bakıda “Elm və təhsil” nəşriyyatında “Aşıq şeirinin poetik biçimləri və çeşidləri” adlı yeni kitab işıq üzü görüb. Yüksək poliqrafik tərtibatla hazırlanmış və Azərbaycan Aşıqlar Birliyinin nəşri olan bu kitabın müəllifləri Əməkdar elm xadimi, professor Məhərrəm Qasımlı və professor Mahmud Allahmanlıdır. Kitabda aşıq şeirinin janr və poetik biçimləri, onların çoxsaylı çeşidləri həm ədəbi-nəzəri, həm də folklor poetikasının prinsipləri əsasında açıqlanır.

Aşıq şeir sistemində rast gəlinən poetik biçimlərin (bayatı, gəraylı, qoşma, təcnis, müxəmməs, divani və s.) ilkin qaynaqları, onların tarixi mənzərəsi, janr səciyyəsi, ifa tərzi, hansı hava üzərində oxunması məqamları və s. məsələlər konkret nümunələr əsasında öz əksini tapır. Milli-mənəvi, tarixi-mədəni düşüncənin möhtəşəm qaynağı olan ozan-aşıq mədəniyyətindən doğan şeir şeir biçimləri və çeşidləri də yeni elmi müstəvidə araşdırılır. Bir çox poetik biçimlər və onlardan törəyən çeşidlər ilk dəfə bu kitabda diqqət önünə çəkilir və təhlil edilir.
Kitab 1000 tirajla nəşr olunub.

Azərbaycan Aşıqlar Birliyi tərəfindən “Xəstə Qasımın dastanı” adlı yeni kitab nəşr olunub. Bu barədə məlumat verən Birliyin katibi, Əməkdar Mədəniyyət İşçisi Musa Nəbioğlu bildirib ki, “Uğur” nəşriyyat-poliqrafiya mərkəzində işıq üzü görmüş kitabda XVIII əsrin görkəmli el sənətkarı Xəstə Qasım Tikmədaşlının dastan-rəvayət səciyyəsi daşıyan üç səfərindən söhbət açılır. Dastanı təqdim edən aşıq Hüseyn Qoşqarlı, nəşrə hazırlayanı Azərbaycan Aşıqlar Birliyinin sədri, Əməkdar Elm Xadimi, professor Məhərrəm Qasımlı, redaktoru isə filologiya üzrə fəlsəfə doktoru Altay Məmmədlidir.

Kitaba yazdığı geniş ön sözdə professor M.Qasımlının da qeyd etdiyi kimi, həm ustadnamələri, həm gözəlləmələri, həm də ürfani-fəlsəfi şeirləri ilə mükəmməl şair və aşıq kimi ucalan Xəstə Qasımın elin yaddaşında, xüsusən də  saz-söz sinədəftərlərinin hafizəsində yaşayan çoxsaylı dastan-rəvayətlərindən üç məşhur səfəri – “Xəstə Qasıma vergi verilməsi”, “Xəstə Qasımın Dağıstan səfəri” və “Xəstə Qasımın Şamaxı səfəri”ni mükəmməl şəkildə nəşr etməklə Azərbaycan Aşıqlar Birliyi orta çağ aşıq ədəbiyyatının dəyərli bir örnəyini yenidən dövriyyəyə qaytarmış olub.

Hörmətli Əbülfəs müəllim!
2018-ci il sentyabrın 28-də Azərbaycan Aşıqları növbəti – VI Qurultayını böyük uğurla başa çatdırdı.
Azərbaycan Aşıqlar Birliyi və çoxsaylı aşıqlarımız həmişə olduğu kimi, Qurultayın yüksək səviyyədə keçirilməsində də Mədəniyyət nazirliyinin, xüsusilə də nazirliyin Xalq yaradıcılığı və mədəni marşrutlar şöbəsinin və cənab nazir, şəxsən Sizin diqqət və qayğınızı böyük minnətdarlıq hissi ilə qarşıladılar. Qurultayda iştirakınız və dərin məzmunlu çıxışınız isə bizim üzərimizə daha böyük məsuliyyət qoymaqla yanaşı, gələcək fəaliyyətimizdə də öz əksini tapacaqdır.

Azərbaycan aşıqları daim dövlətin qayğı və diqqətini görüblər. Son 10 ili isə aşıq sənətinin inkişafında yeni bir mərhələ hesab etmək olar. Aşıqlarımıza dövlətin qayğısı daha da artıb, ustad aşıqlar fəxri adlara və Prezident təqaüdünə layiq görülüblər. Bu illərdə Azərbaycanda iki dəfə beynəlxalq aşıq festivalı, ustad aşıqların yubileyləri keçirilib, aşıq sənətinin elmi-nəzəri tədqiqinə və ustadların həyat və yaradıcılığına həsr olunmuş kitablar nəşr olunub, aşıqlarımız dünyanın bir çox ölkələrinin möhtəşəm salonlarında çıxış ediblər ki, bütün bunların hamısının həyata keçirilməsində Mədəniyyət nazirliyinin qayğısını, köməyini qədirşünaslıqla qeyd edirik.
2009-cu ildə Azərbaycanın aşıq sənətinin UNESCO-nun Qeyri-maddi mədəni irs üzrə reprezentativ siyahısına daxil edilməsi isə bu sənətin qarşısında yeni üfüqlər açdı, aşıq sənəti dünya qeyri-maddi irsinin inciləri sırasında öz yerini tutdu. Bu gün sazımız dünyanı muğamımızla qoşa dolaşır. Bu sənətin inkişafı və beynəlxalq miqyasda geniş təbliği istiqamətində məqsədyönlü tədbirlər həyata keçirilir.
Cənab nazir, Qurultayın yüksək səviyyədə keçirilməsinə göstərdiyiniz köməyə və şəxsən iştirakınıza görə Azərbaycan aşıqları adından Sizə minnətdarlığımızı bildirir və əmin edirik ki, Azərbaycan Aşıqlar Birliyi bundan sonra da üzərinə düşən məsul və şərəfli vəzifəni layiqincə yerinə yetirəcəkdir.
Məhərrəm Qasımlı
Azərbaycan Aşıqlar Birliyinin sədri,
Əməkdar elm xadimi,
professor.

Sentyabrın 18-də Qazaxda Əməkdar incəsənət xadimi, unudulmaz ustad sənətkar aşıq Ədalət Nəsibovun anım günü və qəbirüstü abidəsinin təntənəli açılışı olub.

Görkəmli heykəltəraş, Əməkdar incəsənət xadimi Natiq Əliyevin hazırladığı abidənin açılış mərasimində ədalətsevərlər – saz-söz ictimaiyyəti, respublikamızın tanınmış elm və sənət adamları, ustadın yetirmələri iştirak ediblər. Tədbiri Qazax RİH başçısı Rəcəb Babaşov açaraq Ədalət Nəsibovun saz-söz sənəti ilə bağlı tarixi xidmətlərini yüksək qiymətləndirib. Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlı, Xalq şairi Nəriman Həsənzadə, akademik Teymur Bünyadov, Əməkdar incəsənət xadimi, şair Barat Vüsal, Qazax Xeyriyyə Cəmiyyətinin sədri, professor İlham Pirməmmədov, ustadın yetirmələri – Əməkdar mədəniyyət işçiləri Əli Quliyev və Ədalət Dəlidağlı çıxış edərək bu ölməz sənətkarla bağlı xatirələrini söyləyiblər.
Daha sonra rayon mərkəzində Ədalət Nəsibovun xatirəsinə həsr edilmiş elmi-mədəni tədbir keçirilib. Həmçinin Ədalət Nəsibovun öz şeirləri və ona ithaf olunmuş şeirlərdən ibarət kitab ədalətsevərlərə təqdim olunub.

Sizi “Koroğlu havaları” vətənçilik, dövlətçilik və qəhrəmanlıq düşüncəsini daşıyan milli-mədəni dəyərlər kimi” Layihəsi ilə bağlı konsert proqramına dəvət edirik.

Tədbir 07 sentyabr 2018-ci il tarixində saat 19:00
Rəşid Behbudov adına Dövlət Mahnı Teatrında keçiriləcəkdir.

Ünvan: Bakı şəhəri Rəşid Behbudov küçəsi 12

Hörmətli Prezidentimiz İlham Əliyev cənabları!
Bu gün Azərbaycanda gedən iqtisadi və mədəni quruculuq işləri hər birimizdə yüksək qürur hissi yaradır. Mədəniyyətimizin digər sahələri kimi milli-musiqi dəyərlərimiz, xüsusən də muğam və aşıq sənətlərinin inkişaf perspektivləri ilə bağlı həyata keçirdiyiniz sistemli tədbirlərə görə Sizə dərin təşəkkürümüzü bildiririk. Aşıq sənətinin YUNESKO-nun qeyri-maddi irs siyahısına salınmasından sonra dövlətimizin əvəzsiz milli sərvətimiz olan aşıq sənətinə böyük qayğı və diqqət göstərdiyi hər an duyulmaqdadır. Son illərdə xeyli sayda aşığa Prezidentin fərdi təqaüdü və “Əməkdar Mədəniyyət İşçisi” fəxri adı verməyinizi minnətdarlıqla qarşılayırıq.

Qurultayımızın yüksək səviyyədə keçirilməsinə yaratdığınız şərait və sənətimizə verdiyiniz dəyər Sizə olan ehtiramımızı daha da artırır. Aşıq sənətinə dövlət səviyyəsində qayğının hər birimizin sənət və məişət həyatında öz əksini tapacağına inamımız böyükdür. Ümidvarıq ki, Dədə Qorqud yadigarı olan bu qədim və möhtəşəm sənətin qorunması, inkişafı və təbliği daim diqqət mərkəzində olacaqdır.
Aşıqlarımız tarixən olduğu kimi, bu gün də dövlətçiliyimizin, müstəqilliyimizin, vətən torpaqlarının birlik və bütövlüyünün tərənnümçüsü və mənəvi keşikçiləridir. Biz Ulu öndərimiz Heydər Əliyev ideyalarının təbliğini sazımız və sözümüzlə dünyaya yaymaqdan qürur duyuruq. Xalqımızın qəhrəmanlıq, vətənpərvərlik, milli dövlətçilik ruhunun yüksəldilməsində, torpaqlarımızın birliyi, bütövlüyü uğrunda mübarizədə sinəmizdəki Koroğlu sazı susmaq bilmədən öz müqəddəs tarixi missiyasını şərəflə davam etdirəcəkdir.
Möhtərəm cənab Prezident!
Biz Azərbaycan aşıqları xalqımızın Sizə olan hörmət və məhəbbətini bir daha diqqətinizə çatdıraraq bildiririk ki, Azərbaycan xalqı Sizə inanır, güvənir və bütün fəaliyyətinizi ürəkdən dəstəkləyir.

Hörmətlə,
Azərbaycan Aşıqlarının VI qurultayının nümayəndələri

Bakı, 28 sentyabr 2018-ci il

Azərbaycan Aşıqlar Birliyi özünün VI Qurultayına hazırlaşır. Qurultayın 2018-ci il sentyabr ayının 28-də saat 11-də Bakıda, R.Behbudov adına Dövlət Mahnı Teatrında keçirilməsi nəzərdə tutulur.
Azərbaycan Aşıqlar Birliyinin katibliyi

Möhtərəm cənab Prezident!

Ölkəmizdə həyata keçirdiyiniz məqsədyönlü ictimai-siyasi, iqtisadi, eləcə də humanitar-mədəni fəaliyyət Azərbaycan içtimaiyyətinin ürəyindən xəbər verir.

Sizin Azərbaycan vətəndaşlarına göstərdiyiniz qayğı və diqqət, ziyalılara əsil qədirşünaslıq səviyyəsində verdiyiniz dəyər misilsizdir.

Mən həyatım boyu Azərbaycanın milli varlığının ucaldılmasına bütün varlığımla çalışmış, çoxsaylı kitablar, tədqiqatlar hazırlamışam. Buna görə 60 yaşımda Sizin mənə verdiniz qiymət-”Şöhrət” ordeni ilə təltif olunmağım, şübhəsiz ki, taleyimin unudulmaz səhifəsidir. Bu gün fəxr və qürurla deyə bilərəm ki, son dövrlərdə aldığım yüksək dövlət təltiflərinin-Dövlət Mükafatı Laureatı (2010), Əməkdar Elm Xadimi (2015) və “Şöhrət” ordeninin (2018) üzərində Sizin imzanız vardır!

Mən Ulu öndər Heydər Əliyev irsinə və möhtərəm prezidentimiz İlham Əliyev siyasi kursuna bütün varlığımla bağlıyam. Hər zaman da belə olacaq!

Möhtərəm cənab Prezident!

60 yaşımla bağlı məni “Şöhrət” ordeni ilə təltif etdiyinizə görə Sizə dönə-dönə öz dərin təşəkkürümü bildirirəm.

Azərbaycan Aşıqlar Məhərrəm Qasımlı

Birliyinin sədri Əməkdar Elm Xadimi, professor 

Sentyabrın 28-də Rəşid Behbudov adına Azərbaycan Dövlət Mahnı Teatrında Azərbaycan Aşıqlarının VI qurultayı keçirildi.

Qurultayı Xalq şairi Nəriman Həsənzadə açaraq aşıq sənətinin xalqımızın mədəni həyatında oynadığı roldan danışdı, tədbir iştirakçılarını təbrik edib, uğurlar arzulad və Qurultaya sədrlik etmək üçün Milli Məclisin Mədəniyyət komitəsinin sədri, akademik Rafael Hüseynovun namizədliyini irəli sürdü.

Təklif səsə qoyuldu və yekdilliklə qəbul olundu. Qurultaya sədrlik edən Milli Məclisin Mədəniyyət komitəsinin sədri, akademik Rafael Hüseynov aşıq sənəti haqqında dərin məzmunlu çıxış etdi. Azərbaycan Aşıqlarının ilk qurultayının 1928-ci ildə keçirildiyini diqqətə çatdıran R.Hüseynov bu gün altıncı qurultayın gerçəkləşməsinin əlamətdar hadisə olduğunu vurğuladı. Bildirdi ki, aşıq sənəti həm də millətin böyük amallarının ifadəsidir: “Sevindirici haldır ki, Prezident İlham Əliyevin və Birinci vitse-prezident Mehriban Əliyevanın aşıq sənətinə diqqət və qayğısı çox yüksəkdir. Mehriban xanımın UNESCO-nun xoşməramlı səfiri kimi bilavasitə səyləri nəticəsində Azərbaycan aşıq sənəti bu təşkilat tərəfindən bəşəriyyətin qeyri-maddi mədəni irs siyahısına daxil edilib. UNESCO-nun irs siyahısına ölkəmizin 11 nominasiyası daxil edilib. Daha bir neçə nümunə ilə bağlı iş gedir. İnanıram ki, onların da UNESCO-nun siyahısına salınması reallaşacaq”.
Vurğulandı ki, bu gün aşıq sənəti özünün əvvəlki şöhrətini bərpa etməkdədir. Bu sənət növü artıq bəşəri sənət kimi qorunur.
Sonra qurultayın mandat komissiyasının sədri, Əməkdar mədəniyyət işçisi Elxan Məmmədlinin hesabatı dinlənildi.
Qurultayda çıxış edən Mədəniyyət naziri Əbülfəs Qarayev Azərbaycan aşıq sənətinin inkişafı, təbliği və tədrisi ilə bağlı son illərdə həyata keçirilən fəaliyyətdən söz açdı. Bildirdi ki, ölkəmizin bütün bölgələrində yerləşən musiqi məktəblərində saz sənəti proqrama daxil edilərək öyrədilir, tədris olunur. Bütün bunlar qədim xalq sənətinin gələcək nəsillər tərəfindən qorunmasına, yaşadılmasına hesablanmış addımdır.
Nazir əbədi mənəvi varlığımız olan aşıq sənətinə ulu öndər Heydər Əliyevin yüksək qiymət verdiyini, ümummilli liderin təşəbbüsü ilə 2000-ci ildə UNESCO tərəfindən “Kitabi-Dədə Qorqud”un 1300 illik yubileyinin keçirildiyini xatırlatdı. Qeyd etdi ki, ulu öndərin dövlətçilik xəttinin layiqincə davam etdirən ölkə başçısı İlham Əliyev ədəbiyyatımıza, incəsənətimizə, aşıq sənətinə daim qayğı göstərir, aşıqlarımıza fəxri adlar, Prezident təqaüdü verilir: “Aşıq sənəti xalqımızın mədəni, mənəvi həyatı, dünyagörüşü, yaşayış tərzi ilə vəhdət təşkil edərək daim inkişaf edən bir xalq sənətidir. Xalqımızın digər irs nümunələri kimi, saz-söz sənətimizə də dövlət qayğısı sayəsində bu sənət inkişaf etdirilir və dünya səviyyəsində təbliğ olunur. Dövlət başçısının bu sahəyə diqqəti, Birinci vitse-prezident Mehriban xanım Əliyevanın şəxsi səyi nəticəsində aşıq sənəti bu gün UNESCO-nun Qeyri-maddi mədəni irs siyahısında yer alıb”.
Nazir qurultayın işinə uğurlar arzu edərək, aşıq sənətinin bundan sonra da Azərbaycan mədəniyyətinin, musiqisinin inkişafına təkan verəcəyinə ümid etdiyini bildirdi.
Daha sonra Azərbaycan Aşıqlar Birliyinin sədri, Əməkdar elm xadimi Məhərrəm Qasımlı çıxış edərək rəhbərlik etdiyi qurumun son illər gördüyü işlərdən danışdı. Vurğuladı ki, son illər ölkəmizdə aşıq sənətinin qorunması, gələcək nəsillərə ötürülməsi, araşdırılması, inkişaf etdirilməsi, gənclərin bu sənətə istiqamətləndirilməsi yönündə mühüm işlər görülür. Sözsüz ki, bu işlərin ardıcıl və sistemli şəkildə aparılmasında Azərbaycan Aşıqlar Birliyinin üzərinə böyük məsuliyyət düşür.
Natiq dedi ki, bu gün milli-mənəvi dəyərlərimizə, o cümlədən də aşıq sənəti ilə bağlı olan tarixi dəyərlərimizə ölkəmizdə böyük həssaslıqla yanaşılır və dövlət qayğısı göstərilir. 2009-cu ildə aşıq sənəti Azərbaycan xalqına məxsus bir inci kimi dünya sənət şedevrləri sırasında – UNESCO-nun Qeyri-maddi mədəni irs üzrə reprezentativ siyahısına daxil edildi. Bildirdi ki, bu gün aşıq sənəti bir dövlətçilik atributu kimi diqqət mərkəzindədir. Bu sənət dövlətçiliyə bağlı olan sənətdir.
Türkiyədən gəlmiş folklorşünas Əli Kafkasyalı, Bəstəkarlar İttifaqının sədri, Xalq artisti Firəngiz Əlizadə, professor Qəzənfər Paşayev, aşıqlar Mahmud Məmmədov, Ulduz Quliyeva, Samirə Əliyeva və digər çıxış edənlər qurultayın əhəmiyyətindən söz açdılar, aşıq sənətinin humanitar mədəniyyət strategiyasındakı rolunu vurğuladılar.
Əməkdar mədəniyyət işçisi Əhliman Rəhimov Azərbaycan Aşıqlar Birliyi Nəzarət-təftiş komissiyasının hesabatını təqdim etdi.
Birliyin katibi, Əməkdar Mədəniyyət işçisi Musa Nəbioğlu Azərbaycan Aşıqlar Birliyinin Nizamnaməsinə edilən dəyişikliklər haqqında qurultay iştirakçılarına məlumat verdi. Nəzərdə tutlan dəyişikliklər – Birliyin Qurultayının bundan sonra 5 (beş) ildə bir dəfə keçirilməsi və İdarə heyəti üzvlərinin sayının 25-dən 31-ə qaldırılması yekdilliklə qəbul olundu.
Sonra qurultayda təşkilati məsələlərə baxıldı. Səsvermə nəticəsində Əməkdar elm xadimi, professor Məhərrəm Qasımlı Azərbaycan Aşıqlar Birliyinin sədri, Musa Nəbioğlu, Altay Məmmədli və Ağamurad İsrafilov katiblər, Seyfəddin Qəniyev Nəzarət-təftiş komissiyasının sədri seçildilər.
Sonda qurultay iştirakçılarının Prezident İlham Əliyevə təşəkkür müraciəti oxundu. Qurultayın adından Qətnamə qəbul olundu.

NƏZARƏT-TƏFTİŞ KOMİSSİYASI

Seyfəddin Qəniyev (sədr)

Şaiq İsayev (müavin)

Təşəkkül Əmralıyev

Dəmir Vəliyev

Kəmalə Qubadlı

AZƏRBAYCAN AŞIQLARININ VI QURULTAYININ QƏTNAMƏSİ

Xalq yaradıcılığının ən zəngin və qüdrətli qollarından sayılan aşıq sə¬nətinin ənənələrini, çağdaş durumunu və perspektivlərini dərindən araş¬dıran Azərbaycan Aşıqlarının VI Qurultayı mədəni həyatımızda baş verən uğurlu hadisələrdən biri olaraq öz işini yekunlaşdırır. Azərbaycan Aşıq-larının VI Qurultayı məruzə və çıxışlara, müzakirələr zamanı müxtəlif məsələlərlə bağlı səsləndirilmiş təkliflərə əsasən qərara alır:
1. Milli mədəniyyətin, tarixi-mənəvi dəyərlərin qorunması və inkişaf etdirilməsi istiqamətində müstəqil Azərbaycan dövlətinin yeritdiyi mə¬də¬ni siyasət bəyənilsin. Ümummilli liderimiz Heydər Əliyevin müəy¬yən¬ləşdirdiyi milli mədəniyyət strategiyasının uğurla həyata keçirilməsində Prezident İlham Əliyevin genişmiqyaslı fəaliyyəti yüksək dəyərlən¬di¬rilsin. Milli-mənəvi dəyərlərə qayğı və diqqətin yüksəldilməsi sahəsində Azərbaycan Respublikasının birinci vitse-prezidenti, Heydər Əliyev Fondunun prezidenti Mehriban xanım Əliyevanın səmərəli fəaliyyətinin nəticəsi kimi 2009-cu ildə aşıq sənətinin UNESCO-nun qeyri-maddi mədəni irs üzrə reprezentativ siyahısına salınmasının bu sənətin tarixində mühüm hadisə olduğu qeyd edilsin.
2. Milli mədəniyyəti təmsil edən digər sahələr kimi, aşıq sənətinin qorunması, təbliğı və inkişafı ilə bağlı Mədəniyyət Nazirliyinin dəyərli fəaliyyəti qədirşünaslıqla qeyd edilsin.
3. Azərbaycan xalqının mənəvi qüdrətini təmsil edən unikal bir mə¬dəniyyət hadisəsi kimi aşıq sənətinin beynəlxalq miqyasda məqsədyönlü şəkildə təbliği istiqamətində fəaliyyət genişləndirilsin, bu sahədə sistemli və ardıcıl iş aparılsın.
4. Aşıq sənətinin tədrisi işinin keyfiyyətcə yeniləşdirilməsinə xüsusi diqqət yetirilsin. Tədris proqram¬ları təkmilləşdirilsin, günün tələblərinə cavab verən dərsliklər hazırlansın. Ustad aşıqların, istedadlı saz ifaçılarının tədris prosesinə cəlb olunması ilə bağlı tədbirlər görülsün. Mədəniyyət və İncəsənət Universitetinin bu sahədəki fəaliyyəti təqdir olunsun.
5. Aşıqların sosial statusu və maddi vəziyyətinin yaxşılaşdırılması ilə bağlı dövlət qayğısı gücləndirilsin. Onların iş yerləri ilə təmin olunması, adlı təqaüdlərə, fəxri adlara təqdim edilməsi daim diqqət mərkəzində saxlanılsın.
6. Vahid, müstəqil yaradıcılıq mərkəzi statusunda “Ozan-Aşıq Evi”nin yaradılması təklifinin əlaqədar dövlət qurumları tərəfindən himayə olunması üçün ardıcıl iş aparılsın.
7. Gədəbəy rayonunda “Aşıq Musiqi Məktəbi”nin açılması təqdir olunsun və bu sahədə fəaliyyət genişləndirilərək bu sənətin daha geniş yayıldığı Qazax, Tovuz, Akstafa, Gəncə, Şamaxı və digər rayonlarda da müvafiq məktəblərin tikilməsinə nail olunsun.
8. Dastanlarımızın dövrün tələblərinə uyğun şəkildə yeni təqdimatda ifa olunub sənətsevərlərə çatdırılması üçün “Dastan teatrı” yaradılsın.
9. Aşıq sənətinin genişmiqyaslı və dolğun tarixi-mədəni mənzərəsini əks etdirən “Ozan-aşıq ensiklopediyası”nın nəşri həyata keçirilsin, xalqımızın qəhrəmanlıq tarixini özündə əks etdirən “Koroğlu ensiklopediyası” hazırlansın. Aşıq sənətinə dair dövri nəşrlərə və ustad aşıqların həyat və fəaliyyətlərinə həsr olumuş kitabların nəşrinə diqqət artırılsın.
10. Kütləvi informasiya vasitələrində ustad aşıqların, saz-söz sənətinin, milli epos mədəniyyətinin işıqlandırılmasına diqqət artırılsın. Aşıq yaradıcılığı ilə bağlı kino və telefilmlərin, radio-televiziya verilişlərinin hazırlanması işi keyfiyyətcə yeniləşdirilsin. Klassik və müasir ifaçıların, saz havalarının audio və vi¬deolentlərə yazılması, müasir tələblərə cavab verən audio və video albomların hazırlanması, onların ölkə daxi¬lində və beynəlxalq miqyasda təbliği sistemli şəkildə həyata keçirilsin. Bu sahədə Azərbaycan TV və Mədəniyyət kanalının, İctimai TV-nin fəaliyyəti bəyənilsin. “Dünya”, “Lider”, “Speys” TV-lərdəki aşağı səviyyəli bayağı saz verilişlərinin ictimaiyyətin narazılağına səbəb olduğu qeyd edilsin.
11. Artıq Azərbaycanda iki dəfə uğurla baş tutmuş Beynəlxalq aşıq festivalı müntəzəm və davamlı şəkildə keçirilsin. Gənc istedadları üzə çıxarmaq üçün iki ildən bir “Aşıq müsabiqəsi” keçirilsin.

 Azərbaycan Aşıqlar Birliyinin yeni seçilmiş idarə heyəti
1. Məhərrəm Qasımlı
2. Mahmud Məmmədov
3. Ulduz Quliyeva
4. Qəzənfər Paşayev
5. Əli Quliyev
6. Əhliman Rəhimov
7. Umbay Axundov
8. Fətulla Göyçəli
9. Ədalət Dəlidağlı
10. Abbas Musaxanoğlu
11. Samirə Əliyeva
12. Ağamurad İsrafilov
13. Elxan Məmmədli
14. Musa Nəbioğlu
15. Altay Məmmədli
16. Bəhmən Göyçəli
17. Gülarə Azaflı
18. Haşım Qubalı
19. Əli Tapdıqoğlu
20. Qələndər Zeynalov
21. Cabbar Cabbarov
22. Solmaz Kosayeva
23. Nemət Qasımlı
24. Məhərrəm Hüseynli
25. Məhəmməd Şirvanlı
26. Tarıyel Məmmədov
27. İradə Köçərli
28. Kamilə Dadaşzadə
29. Barat Vüsal
30. Camoy Qurbanov
31. Əhliman Kəlbəcərli

FOTOLAR: http://azerab.az/index.php/fotozhalereya/category/11-azaerbaydzan-ash-zhlar-n-n-vi-zhurultay-kedzhirildi

[bt_youtube url="https://youtu.be/q8SRWpUOFLI" width="600" height="400" responsive="yes" autoplay="no"][/bt_youtube]

16 aşıq havasının yer aldığı audiodiskin təqdimatı keçirildi

Sentyabrın 7-də Rəşid Behbudov adına Dövlət Mahnı Teatrında “Koroğlu havaları” – vətənçilik, dövlətçilik və qəhrəmanlıq düşüncəsini daşıyan milli-mənəvi dəyərlər kimi” adlı audiodiskin (CD) təqdimatı keçirildi. Layihə Prezident yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə Azərbaycan Aşıqlar Birliyi (AAB) tərəfindən həyata keçirilib.

Təqdimatda tanınmış saz-söz ustaları, Mədəniyyət Nazirliyinin Xalq yaradıcılığı və mədəni marşrutlar şöbəsinin müdiri Vüqar Şixəmmədov, ziyalılar, ictimaiyyət nümayəndələri iştirak edirdi.

Tədbiri giriş sözü ilə açan AAB-nin sədri, Əməkdar elm xadimi, professor Məhərrəm Qasımlı layihənin əhəmiyyətindən danışdı. Bildirdi ki, Azərbaycan mədəniyyətində xüsusi yer tutan aşıq sənətinin qorunması və inkişafı hərtərəfli dövlət qayğısı ilə əhatə olunub: “Prezident İlham Əliyevin “Aşıq sənəti bizim milli sənətimiz və milli sərvətimizdir” ifadəsi bizə ruh verir. Birinci vitse-prezident Mehriban Əliyevanın da aşıq sənətinin inkişafına göstərdiyi dəstək danılmazdır. Onun səyləri nəticəsində Azərbaycan aşıq sənəti UNESCO-nun Qeyri-maddi mədəni irs siyahısına daxil edilib”.

Vurğulandı ki, son illər Heydər Əliyev Fondu, Mədəniyyət Nazirliyi və digər dövlət orqanları, ictimai təşkilatlar bu sahənin inkişafı üçün məqsədyönlü işlər görüblər. İctimaiyyətə təqdim olunan layihə görülən işlərin davamıdır.

Qeyd olundu ki, layihə çərçivəsində “Koroğlu havaları” ilə bağlı ustadların ifaları dinlənilib müzakirə olunmaqla yanaşı, onların çağdaş aşıqların repertuarında yenidən səsləndirilməsi məqsədəuyğun hesab edilib. Layihənin icrası nəticəsində Qələndər Zeynalov, Məhərrəm Hüseynli, Ağamurad Şirvanlı, Altay Məmmədli, Ramin Qarayev, Dəmir Vəliyev, İsa Qaraxanlı, Şöhrət Kərimov, Təbriz Vəliyev, Nəbi Nağıyev, Nazim Quliyev, Şaiq İncəli, Avdı Musayev, Anar Abdullayev, Xanlar Alqayıt, Babək Şakirli və Qabil Faxralı kimi istedadlı aşıqların, eləcə də “Çeşmə” sazçı folklor qrupunun ifasında lentə yazılmış on altı “Koroğlu havası” aşıq sənətini sevənlərin diqqətinə təqdim edilib. Bu havaların mətnləri milli dövlətçilik düşüncəsinin, hərbi-vətənpərvərlik ruhunun yüksəldilməsinə xidmət edir.

M.Qasımlı bildirdi ki, ozan-aşıq mədəniyyəti Dədə Qorquddan bu günədək milli ruhun çiçəklənməsinə xidmət edib: “Bizim qəhrəmanlıq meydan havalarımız var: “Cəngi”, “Misri”, “Döşəmə Koroğlu”, “Qaytağı”, “Dərbəndi”, “Döşəmə”, “Döymə” və s. Bunlara “Koroğlu havaları” deyilir. Vaxtilə Əsəd Rzayev, Mirzə Bayramov, Sadıq Sultanov, Qaraca İbrahimoğlu kimi ozanlar “Koroğlu havaları”nı 30-luq lampa qarşısında elə oxuyurmuşlar ki, səsin zərbindən lampa sönürmüş”.

Aşıqlar Birliyinin sədri qeyd etdi ki, layihənin məqsədi “Koroğlu havaları”nın yaşadılması və təbliğidir: “Koroğlu havaları” oxunarkən qəlbimizdə milli ruh oyanır. Bu havalar bizə döyüşkənlik, qəhrəmanlıq ruhu aşılayır. Torpaqlarımızın işğaldan azad olmasında, milli dövlətçilik düşüncəmizin gələcəyə daşınmasında gəncləri daxilən səfərbər edir. Hələlik diskdə 16 aşıq havası yer alıb. Yaxın vaxtlarda bu qəbildən digər havaları da bərpa edərək ictimaiyyətin ixtiyarına verəcəyik”.

Bildirildi ki, layihənin ərsəyə gəlməsinə Mədəniyyət Nazirliyi tərəfindən də dəstək göstərilir. Eyni zamanda musiqişünas, professor Tariyel Məmmədovun bu işdə xeyli əməyi var.

Sonra tanınmış aşıqlardan Qələndər Zeynalov, Məhərrəm Hüseynli, Ağamurad Şirvanlı, Altay Məmmədli, Şaiq İncəli, Kəmalə Qubadlı, Gözəl Kəlbəcərli, Əli Pənahoğlu və başqalarının, eləcə də “Çeşmə” sazçı folklor qrupunun ifasında lentə alınan “Misri”, “Osmanlı divanisi”, “Şahsevən” “Dərbəndi”, “Koroğlu dübeyti”, “Sürütmə Koroğlu”, “Koroğlu gözəlləməsi”, ”Koroğlu müxəmməsi”, “İrəvan çuxuru” və s. havalar səsləndirildi.

Savalan FƏRƏCOV

Sentyabrın 7-də R.Behbudov adına Dövlət Mahnı Teatrında “Koroğlu havaları” vətənçilik, dövlətçilik və qəhrəmanlıq düşüncəsini daşıyan milli-mədəni dəyərlər kimi” layihəsi əsasında hazırlanmış audiodiskin təqdimatı keçiriləcək.

Bu barədə AZƏRTAC-a Azərbaycan Aşıqlar Birliyinin (AAB) katibi, Əməkdar mədəniyyət işçisi Musa Nəbioğlu məlumat verib. O bildirib ki, layihə AAB tərəfindən Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə həyata keçirilib.
Qeyd edib ki, layihə həyata keçirilərkən “Koroğlu havaları” ilə bağlı klassik ustadların ifaları dinlənilərək müzakirə olunub, onların çağdaş aşıqların repertuarında yenidən səsləndirilməsi məqsədəuyğun hesab edilib. Ölkəmizin müxtəlif guşələrində yaşayan istedadlı aşıqların arasında seçim aparılaraq “Koroğlu havaları”nın ən yaxşı ifaçısı olan aşıqlar seçilib və onların ifasında qəhrəmanlıq ruhunda olan aşıq havaları lentə alınıb.
Təqdim olunan CD albomda 16 aşıq havası yer alıb. Qələndər Zeynalov, Məhərrəm Hüseynli, Ağamurad Şirvanlı, Altay Məmmədli, Ramin Qarayev, Dəmir Vəliyev, İsa Qaraxanlı, Şöhrət Kərimov, Təbriz Vəliyev, Nəbi Nağıyev, Nazim Quliyev, Şaiq İncəli, Avdı Musayev, Anar Abdullayev, Xanlar Alqayıt, Babək Şakirli və Qabil Faxralı kimi istedadlı aşıqların, eləcə də “Çeşmə” sazçı folklor qrupunun ifasından yazıya alınan “Misri”, “Osmanlı divanisi”, “Şahsevəni”, “Eyvaz peşrovu”, “Təbli-cəngi Koroğlu”, “Ovşarı”, “Cəngi Koroğlu”, “Dərbəndi Koroğlu”, “Koroğlu dubeyti”, “Sulduzu”, “Sürütmə Koroğlu”, “Koroğlu gözəlləməsi”, “Bozuğu Koroğlu”, “İrəvan çuxuru” və “Koroğlu müxəmməsi” havaları milli dövlətçilik düşüncəsinin, hərbi-vətənpərvərlik ruhunun yüksəldilməsinə xidmət edir.
Təqdimat mərasimində ifaları diskdə yer almış aşıqların konserti də nəzərdə tutulur.