“Məndən elə nə qaldı”

   Bu günlərdə “Elm və Təhsil” nəşriyyatında Babaxan Niyazlının (Babayev Babaxan İşıq oğlu) “Məndən elə nə qaldı” adlı şeirlər  kitabı  işıq  üzü  görüb. Azərbaycan Aşıqlar  Birliyinin  nəşri olan  kitabı  çapa  hazırlayan  Sarvan Kərimov, redaktoru Azərbaycan  Aşıqlar  Birliyinin  sədri, filologiya elmlər doktoru, professor, Əməkdar  elm  xadimi Məhərrəm Qasımlı, rəyçiləri  isə Əməkdar mədəniyyət işçisi Ağamurad Şirvanlı və filologiya üzrə fəlsəfə doktoru Altay Məmmədlidir.

1. M. Qasımlının kitaba yazdığı ön sözdə qeyd etdiyi kimi, Babaxan müəllim iqtisad elmlər üzrə alim idi. Eyni zamanda o, ən müxtəlif istiqamətlərdə elmi və publisistik məqalələr,elmi,tarixi və ədəbi mövzularda  müxtəlif  kitablar yazıb: ”Babaxan müəllimin  kitablarında onun dərin bir alim təfəkkürünü görmək mümkündür.

    Babaxan  Niyazlının  Azərbaycan Aşıqlar  Birliyi tərəfindən  nəşr etdirilmiş digər kitabı  isə “Məhəbbətin müdrik  çağı” adlanır. Kitabında əsasən müəllifin ömrünün son illərində yazdığı şeirlər yer alıb. Bununla belə, gənclik dövründə yazdığı  şeirlərdən də daxil edilib.

    Bu kitabı çapa hazırlayan da Sarvan Kərimovdur. Redaktoru Azərbaycan Aşıqlar Birliyinin sədri, filologiya elmlər doktoru, professor, Əməkdar elm xadimi Məhərrəm Qasımlı, rəyçilər isə  Əməkdar mədəniyyət işçisi Ağamurad Şirvanlı və filologiya üzrə fəlsəfə doktoru Altay Məmmədlidir.

Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq qərara alıram:

1. Azərbaycan Respublikasının Elm, texnika, memarlıq, mədəniyyət və ədəbiyyat üzrə Dövlət Mükafatları Komissiyasının aşağıdakı yeni tərkibi təsdiq edilsin:

Komissiyanın sədri

Əli Əsədov – Azərbaycan Respublikasının Baş Naziri

Komissiyanın üzvləri

Əli Əhmədov – Azərbaycan Respublikası Baş Nazirinin müavini

Ramiz Mehdiyev – Azərbaycan Milli Elmlər Akademiyasının prezidenti

Əbülfəs Qarayev – Azərbaycan Respublikasının Mədəniyyət naziri

Oqtay Şirəliyev – Azərbaycan Respublikasının Səhiyyə naziri

Ceyhun Bayramov – Azərbaycan Respublikasının Təhsil naziri

Anar Quliyev – Azərbaycan Respublikasının Dövlət Şəhərsalma və Arxitektura Komitəsinin sədri

İbrahim Quliyev – Azərbaycan Milli Elmlər Akademiyasının birinci vitse-prezidenti

İsa Həbibbəyli – Azərbaycan Milli Elmlər Akademiyasının birinci vitse-prezidenti

İsmayıl Hacıyev – Azərbaycan Milli Elmlər Akademiyası Naxçıvan bölməsinin sədri

Fərhad Bədəlbəyli – Üzeyir Hacıbəyli adına Bakı Musiqi Akademiyasının rektoru

Ömər Eldarov – Azərbaycan Rəssamlıq Akademiyasının rektoru

Siyavuş Kərimi – Azərbaycan Milli Konservatoriyasının rektoru

Əhliman Əmiraslanov – Azərbaycan Milli Elmlər Akademiyasının həqiqi üzvü

Abel Məhərrəmov – Azərbaycan Milli Elmlər Akademiyasının həqiqi üzvü

Elbay Qasımzadə – Azərbaycan Memarlar İttifaqı İdarə Heyətinin sədri

Şəfiqə Məmmədova – Azərbaycan Respublikası Kinematoqrafçılar İttifaqının sədri

Məhərrəm Qasımlı – Azərbaycan Aşıqlar Birliyinin sədri

Çingiz Abdullayev – Azərbaycan Yazıçılar Birliyinin katibi

Cəlal Abbasov – Azərbaycan Bəstəkarlar İttifaqının katibi

Natiq Əliyev – Xalq rəssamı

Mövlud Süleymanlı – Xalq yazıçısı.

2. “Azərbaycan Respublikasının Elm, texnika, memarlıq, mədəniyyət və ədəbiyyat üzrə Dövlət Mükafatları Komissiyasının yeni tərkibinin təsdiq edilməsi haqqında” Azərbaycan Respublikası Prezidentinin 2018-ci il 27 aprel tarixli 26 nömrəli Fərmanının (Azərbaycan Respublikasının Qanunvericilik Toplusu, 2018, № 4, maddə 703) 1-ci hissəsi ləğv edilsin.

3. Azərbaycan Respublikasının Nazirlər Kabineti bu Fərmandan irəli gələn məsələləri həll etsin.

İlham Əliyev

Azərbaycan Respublikasının Prezidenti

Bakı şəhəri, 24 fevral 2020-ci il.

Azərbaycan aşıq sənətinə ağır itki üz verib. Aşıq sənətinin tanınmış nümayəndələrindən biri olan ustad aşıq Hüseyn Qoşqarlı – Hüseyn Hümbət oğlu İsmayılov 2019-cu il noyabrın 3-də vəfat edib.
Hüseyn Hümbət oğlu İsmayılov 1937-ci ildə Daşkəsən rayonunun Xoşbulaq kəndində anadan olub. 1956-cı ildə həmin kənddəki orta məktəbi bitirib. 1957-1960-cı illərdə hərbi xidmətdə olub. 1973-1992-ci ilklərdə Daşkəsən rayon mədəniyyət şöbəsində birinci dərəcəli kinomexanik kimi fəaliyyət göstərib.

1950-ci ildən saz çalmağa başlayan Hüseyn Hümbət oğlu hansı sahədə çalışmasından asılı olmayaraq sazdan, sənətdən heç vaxt ayrılmayıb. Ustad aşıq kimi yaşadığı bölgədə və eləcə də respublika miqyasında keçirilən müxtəlif mədəni-kütləvi tədbirlərdə fəal iştirak edib, fəxri fərman və döş nişanları ilə təltif olunub.
O, həm də dastanlarımızın gözəl bilicisi kimi tanınırdı. Azərbaycan Aşıqlar Birliyinin nəşr etdirdiyi “Xəstə Qasımın dastanı” (2018) və “Növrəs İmanın dastan-hekayəti” (2019) kitabları da onun təqdim etdiyi dastanlar əsasında hazırlanıb. Hüseyn Qoşqarlının ayrıca şeirlər kitabı da işıq üzü görüb.
Ustad aşıq kimi sənətdəki xidmətləri hər zaman yüksək dəyərləndirilən Hüseyn Qoşqarlı 2018-ci ildə Azərbaycan Respublikasının Mədəniyyət nazirliyinin “Fəxri mədəniyyət işçisi” nişanı ilə təltif olunub.
Ustad aşıq Hüseyn Qoşqarlının – Hüseyn Hümbət oğlu İsmayılovun əziz xatirəsi yaxınlarının, doğmalarının və sənət dostlarının qəlbində daim yaşayacaqdır.
Allah rəhmət eləsin!
AZƏRBAYCAN AŞIQLAR BİRLİYİ

Azərbaycan Aşıqlar Birliyi xalqımızı və saz-söz içtimaiyyətini yazın-Yeni günün gəlişi münasibəti ilə ürəkdən təbrik edir! Qoy qarşıdan gələn işıqlı, aydın yaz günləri hər kəsin gözünü-könlünü isitsin! Hamımıza müjdələr gətirən sağlam və xoş günlər ömrümüzü bəzəsin!

Aşıqlar Birliyi

Yanvarın 30-da R.Behbudov adına Mahnı Teatrında Azərbaycan Aşıqlar Birliyi və “Azərbaycan Dövlət Televiziya və Radio Verilişləri” QSC-nin birgə təşkilatçılığı ilə XX əsr Azərbaycan aşıq sənətinin görkəmli nümayəndəsi, saz-söz ustadı, Əməkdar mədəniyyət işçisi Mikayıl Azaflının keçdiyi ömür yoluna və yaradıcılığına həsr olunmuş “Qoca qartalın əbədi uçuşu” adlı filmin təqdimatı olub.

Film “Azərbaycan “Dövlət Televiziya və Radio Verilişləri” QSC-nin bədii və sənədli filmlər studiyası tərəfindən istehsal olunub.

Filmin quruluşçu rejissoru Elnurə Kazımova deyib: “Bu filmdə biz portret janrından çıxış edərək Azərbaycandan kənarda, Türkiyə, İran və başqa yerlərdə Mikayıl Azaflının aşıq sənətinə qarşı münasibətini əks etdirmişik. Portret janrı ilk baxışda sadə görünsə də, onun öz çətinlikləri və məhdudiyyətləri var. Ən böyük məhdudiyyət də budur ki, süjetin sxemi əvvəlcədən bəllidir. Bu filmlə onu göstərmək istədik ki, M. Azaflı tək aşıq deyil, dövrün dissident şairidir. O, sənətilə Türkiyə, İran  və Gürcüstanda məşhurluq qazanıb. Bu filmlə biz, eyni zamanda, yeni nəsildə aşıq sənətinə maraq oyatmağa çalışmışıq”.

Filmin ssenari müəllifi Məti Osmanoğlu diqqətə çatdırıb ki, çəkiliş qrupunun qarşısında iki yoldan birini seçmək dururdu: “Ya xalqın yaratdığı mifi dekonstruksiya etmək, “söküb yenidən yığmaq”, ya da mövcud əfsanənin obrazını “televiziya dilində” bərpa etmək. Tamaşaçının təsəvvüründəki obrazı kino estetikasının tələbləri əsasında görüntülərə çevirib əyaniləşdirmək... Biz ikinci yola üstünlük verdik və mənə elə gəlir ki, bu yanaşma özünü doğrultdu. Mikayıl Azaflının portreti əsasında Azərbaycan aşıq sənətinin keçdiyi enişli-yoxuşlu, bəzən də “ildırımlı” yolu, bu sənətin ölməz gələcəyini canlandırmağa çalışdıq. Təbii ki, buna nə dərəcədə nail olduğumuzun qiymətini tamaşaçı verəcək”, - deyə M. Osmanoğlu bildirib.

Filmin elmi məsləhətçisi Qəzənfər Paşayev bildirib ki, ekran əsəri haqqında tənqidi sözlər demək çox çətindir.

Azərbaycan Aşıqlar Birliyinin sədri, Əməkdar elm xadimi Məhərrəm Qasımlı bildirib ki, burada Mikayıl Azaflının əfsanəvi obrazı canlanıb. Çünki M.Azaflının ömür yolu belədir və xalq bu obrazı sadəcə əfsanələşdirib. Qeyd edib ki, İranda onu çox yaxşı tanıyırlar. M. Azaflının qeyri-adiliyi onu əfsanəvi aşığa çevirib.

[bt_slider uid="1580469282-5e340c22d8cde" target="_blank" width="0" crop="no" thumbnail_width="800" thumbnail_height="600" show_title="no" centered="yes" arrows="yes" pagination="bullet" autoplay="5000" speed="600"][bt_image src="/images/bt-shortcode/upload/w_1615804069493377011678_1000x669.jpg" title="w_1615804069493377011678_1000x669.jpg" link="" parent_tag="slider"] [bt_image src="/images/bt-shortcode/upload/w_1615804069492646063970_1000x669.jpg" title="w_1615804069492646063970_1000x669.jpg" link="" parent_tag="slider"] [bt_image src="/images/bt-shortcode/upload/83770875_1063589740641906_2657600594532892672_n.jpg" title="83770875_1063589740641906_2657600594532892672_n.jpg" link="" parent_tag="slider"] [bt_image src="/images/bt-shortcode/upload/83844246_1063590177308529_9197160302418853888_n.jpg" title="83844246_1063590177308529_9197160302418853888_n.jpg" link="" parent_tag="slider"][/bt_slider]

Rejissor Ramiz Həsənoğlu filmin ərsəyə gəlməsində çəkiliş qrupuna öz təşəkkürünü bildirib.

Ekran əsərində Mikayıl Azaflının keçdiyi ömür yolu, Azərbaycan aşıq sənətinin inkişafında, coğrafi hüdudlarının genişlənməsində oynadığı əvəzsiz rol işıqlandırılıb.

Çəkilişləri əsasən Tovuz rayonunda, Əsrik çayının sahillərində, Mikayıl Azaflının qaçaq olduğu Şiş qaya deyilən dağda, aşığın ana yurdu Tovuz rayonunun Azaflı kəndində, eləcə də Cirdək, Qaralar, Əlimərdanlı və digər kəndlərdə aparılan filmin ssenari müəllifi Məti Osmanoğlu, quruluşçu rejissoru Elnurə Kazımova, redaktoru Sadıq Elcanlıdır.

Sonda  Mikayıl Azaflının şeirləri  və yaratdığı saz havaları təqdim olunub. Aşıqlardan Çingiz Mehdipur, Səyyad Musayev, Şəhriyar Kərimov, Ramin Cilovdarlı, Günel Qurbanova və Samir Allahverdiyevin, Əməkdar mədəniyyət işçisi Gülarə Azaflının rəhbərlik etdiyi “Çeşmə” qrupunun üzvlərinin, eləcə də  ustad aşığın övladları Hakim, Maral və Gülarə Azaflıların, nəvəsi Roman Azaflının və nəticəsi – ustadın adını daşıyan balaca Mikayılın  ifaları tədbirə əlavə rəng qatıb.

Hər il oktyabrın 20 də  Azərbaycan Aşıqlar Birliyində Aşıq Ələsgərin anım günü qeyd edilir.

20.10.2019-cu il tarixində Xaçmaz  rayonundakı  Şəxsiyyətlər  Muzeyində aşıq sənətinin  zirvələrindən  olan Aşıq Ələsgərin anım günü qeyd olunmuşdur. Tədbiri giriş sözü ilə salamlayan AAB-nin sədri, Əməkdar Elm Xadimi, professor Məhərrəm Qasımlı  Aşıq Ələsgər yaradıcılığının aşıq sənətinə verdiyi misilsiz sənət töhfələrindən ətraflı söhbət acdı. Xaçmaz rayon  İcra Hakimiyyətinin  Başçısı Şəmsəddin Xanbabayev Aşıq Ələsgər poeziyasının Azərbaycan mədəniyyətindəki böyük tərbiyəvi rolundan  danışdı.

Tədbirdə Göyçə Mədəniyyət Mərkəzinin rəhbəri Akif  Nəbiyev Aşıq Ələsgərlə bağlı ürək sözlərini söylədi. Aşıq Ələsgərin nəticəsi Xətayi Ələsgər tədbir iştirakçılarına təşəkkür etdi.

İştirakçılar Aşıq Ələsgərin büstü ilə yanaşı Aşıq Şəmşirin və Ədalət Nəsibovun  da büstləri önünə əklillər qoydular.

Tədbirə  bölgələrdən dəvət olunmuş aşıq Haşım Qubalı, Səlim Göyçəli, Bəhmən  Göyçəli, Əziz Ağacanov və Altay Məmmədli ustad Aşıq Ələsgərin sözlərini oxudular.

Azərbaycan aşıq sənətinə ağır itki üz vermişdir!

Xalq arasında Koroğlu aşığı kimi şöhrət tapmış Aşıq Dəmir Vəliyev sıralarımızı vaxtsız tərk etmişdir.

Zəngin repertuara malik aşıq Dəmir Vəliyev klassik saz havalarının və dastanların dərin bilicisi idi. Ustad İmran Həsənov ifaçılıq  məktəbinin layiqli davamçısı olan bu istedadlı aşıq Koroğlu havalarının da bənzərsiz ifaçılarından biri kimi taninirdı. Bir çox beynəlxalq festivalların diplomantı olan Dəmir Vəliyevin audio və video ifaları tele-radio fondunun qızıl arxivində yer almışdır.

Dəmir Vəliyev Azərbaycanla yanaşı İran, Türkiyə, Rusiya və Orta Asiya Cumhurriyyətlərində şaqraq, zil və məlahətli səsə malik ustad aşıq kimi tanınır və sevilirdi.

Aşıq sənətinin gənc nəslə mənimsədilməsində də ustad Dəmir Vəliyevin unudulmaz xidmətləri vardır.

Ustad aşıq  Dəmir Vəliyevin unudulmaz xatirəsi Azərbaycan aşığlığında daim yaşayacaqdır.

Allah rəhmət eləsin!

Azərbaycan Aşıqlar Birliyi

Azərbaycan Aşıqlar Birliyinin nəşri olan daha bir kitab işıq üzü görüb. “Dərbənd el sənətkarları” adlanan antologiyada Dərbənd mahalında tarixən ad çıxarmış saz-söz sənətkarlarının və bu gün həmin ənənəni uğurla davam etdirən çağdaş aşıq və şairlərin saz-söz ovqatıyla yaratdıqları poetik örnəklər və dastanların ən yaxşı nümunələri yer alıb.

Bu nümunələr Dərbəndin tarixi qüdrətini, mənəvi gücünü ifadə edən, Dərbəndin keçmişini bu günə, bu gününü sabaha daşıyan tükənməz söz sərvətidir.
Kitabı tərtib edənlər Fəxrəddin Qəribsəs və Zeynəb Dərbəndli, nəşrə hazırlayanı filologiya üzrə fəlsəfə doktoru Altay Məmmədli, elmi məsləhətçisi Əməkdar elm xadimi, professor Məhərrəm Qasımlı, redaktoru isə professor İsmayıl Məmmədlidir.

Oktyabrın 11-12-də Türkiyənin Qars şəhərində II Beynəlxalq Aşıq Şenlik festivalı keçirilib. Dünya Qarapapaq Türkləri Birliyinin (KARPAT) təşkilatçılığı ilə keçirilən festivala Azərbaycan Aşıqlar Birliyinin katibi, Əməkdar mədəniyyət işçisi Musa Nəbioğlunun rəhbərlik etdiyi nümayəndə heyəti də qatılıb. Festivalın birinci günündə Aşıq Şenliyin Çıldırdakı abidəsi və doğulduğu Suxara kəndindəki məzarı ziyarət olunub,  eləcə də KARPATın Arpaçayda tikdirdiyi mərasim evinin açılışı olub.

İkinci gün isə Qarsda KARPATın mədəniyyət mərkəzinin açılışı olub, sonra isə festival öz işini şəhərin böyük mədəniyyət mərkəzində davam etdirib. Qars aşıqları ilə yanaşı, Azərbaycan, İran və Gürcüstandan da aşıqların və incəsənət ustalarının qatıldığı festivalın açılışında KARPAT başqanı Erkan Koçalı çıxış edərək Türk mədəniyyətində aşıqlığın rolundan və Aşıq Şenliyin bu sənətdə böyük xidmətlərindən söz açıb. Azərbaycan Aşıqlar Birliyinin katibi, Musa Nəbioğlu isə öz çıxışında Azərbaycan və Türkiyə aşıqlarının son illərdəki qarşılıqlı yaradıcılıq əlaqələrinin genişlənməsindən, onların bu cür tədbirlərdə birgə iştirakının əhəmiyyətindən və Aşıq Şenliyin ustad aşıq kimi, Azərbaycanda da yaxşı tanınıb sevilməsindən danışıb, Aşıq Şenliklə bağlı folklorşünas alimlərimizin sanballı əsərlər yazdıqlarını vurğulayıb.

Festivalın bədii hissəsində Azərbaycandan getmiş aşıqlardan Əməkdar mədəniyyət işçisi Solmaz Kosayeva, Faxfur Ağbabalı və Qabil Abduyevin çıxışları tamaşaçıların rəğbətini qazanıb.

Festivala dəvət almış müğənnilərdən Əməkdar artist Nuriyyə Hüseynova, Marat Darvazlı, Rövşən Civişov, Günay Şuşalı və digərlərinin çıxışları da yerli tamaşaçılar tərəfindən alqışlarla qarşılanıb.

(1948-2020)

Borçalı aşıq mühitinin tədqiqinə, təbliğinə və türk dünyasında tanıdılmasına böyük əmək sərf etmiş görkəmli aşıqşünas Osman Əhməd oğlu Əfəndiyev ömrünün 72-ci ilində dünyasını dəyişmişdir. O, “Dərviş Osman”, “Osman Əfəndi” və “Osman Əhmədoğlu” imzası ilə çoxsaylı kitab və məqalələr yazaraq Borçalı aşıqlığına üz ağardan tarixi xidmət göstərmişdir.

Osman Əhmədoğlu Azərbaycan, Gürcüstan, Türkiyə və İranda saz-söz ictimaiyyətinin yaxından tanıdığı və rəğbət göstərdiyi hörmətli bir ziyalı idi. Borçalı aşıqlığını dərindən bilən O. Əhmədoğlu öz müasirləri olan H.Saraclı, Ə. Gülməmmədov, K. Əfəndiyev kimi ustadların beynəlxalq miqyasda tanıdılmasında qeyrətkeş bir qələm əhli kimi əsil milli mücadilə aparırdı.

O, uzun zaman Gürcüstan Aşıqlar Birliyinə də uğurla rəhbərlik etmişdir.

Osman Əhmədoğlu əziz dost, gözəl şair və aşıq sənətinin qeyrətkeş  qoruyucusu kimi qəlbimizdə hər zaman yaşayacaqdır.

                                                 Azərbaycan   Aşıqlar    Birliyi

Azərbaycan Aşıqlar Birliyinin hazırladığı aşıq havalarından ibarət “Klassiklər və müasirlər” adlı audio albom işıq üzü görüb. Adından da göründüyü kimi, albomda həm klassik ustad aşıqların lent yazılarına, həm də müasir aşıqların ifalarına yer ayrılıb.

Azərbaycan Respublikası Prezidenti İlham Əliyevin Aşıqlar Birliyinin inkişafı üçün ayırdığı maliyyə vəsaiti ilə hazırlanan albomda klassik ustad aşıqlardan Dədə Şəmşir, İslam Yusifov, Hüseyn Cavan, Əmrah Gülməmmədov, Şakir Hacıyev, Nabat Cavadova, İmran Həsənov, Hüseyn Saraçlı, Məmmədağa Babayev, Mikayıl Azaflı, İsfəndiyar Rüstəmov, Kamandar Əfəndiyev, Əkbər Cəfərov, Ədalət Nəsibov və Pənah Pənahovun repertuarlarından ən məşhur ifalarının yer aldığı audiodiskdə dövrümüzdə yaşayıb-yaradan tanınmış aşıqların ifasına da yer verilməsi sənətdə varislik ənənəsinin qorunması baxımından böyük əhəmiyyət kəsb edir. Belə ki, sənətsevərlər klassik ustadlarla yanaşı, Əməkdar mədəniyyət işçiləri Ağamurad Şirvanlı, Əhliman Şirvanlı və Samirə Əliyevanın, eləcə də Səlim Göyçəli, Əli Tapdıqoğlu, Qələndər Zeynalov, Altay Məmmədli, İlham Aslanbəyli, Gözəl Kəlbəcərli, Ramin Qarayev, Şaiq İncəli, Nəbi Nağıyev, Nazim Quliyev, Elbrus Hüseynov, Şöhrət Kərimov, Avdı Musayev, Elməddin Məmmədli və Şəhriyar Qaraxanlının, Əməkdar mədəniyyət işçisi Gülarə Azaflının rəhbərlik etdiyi “Çeşmə” folklor qrupunun ifasında bir-birindən gözəl ifaları dinləyə biləcəklər. Bu seriyanın davamı olaraq “Solo-saz ifaçıları”, “Sazın –sözün yeni nəfəsi”, “Ustad aşıq Ulduz Sönməzin saz-söz ifaları”,”Gözəl Kəlbəcərlinin saz-söz ifaları” və “Aşıq gözəlləmələri ” albomları da yaxın vaxtlarda içtimaiyyətə təqdim olunacaqdır.

Azərbaycan Aşıqlar Birliyinin yeni nəşri olan “İzahlı aşıq ədəbiyyatı sözlüyü işıq üzü görmüşdür. Məhərrəm Qasımlı və Mahmud Allahmanlı kimi tanınmış folklorşünas-professorların hazırladığı kitab nəfis şəkildə 1000 nüsxə tirajla nəşr olunmuşdur.
“İzahlı aşıq ədəbiyyatı sözlüyü” aşıq ədəbiyyatı ilə bağlı anlatışları, obrazların, terminiloji vahidlərin, eləcə də bu ədəbiyyat çevrəsini əhatə edən janr şəbəkəsinin mənzərəsini yaratmaq səciyyəsi daşıyır. Burada ayrı-ayrı aşıq ədəbiyyatı istilahlarının, dastanlaırn, populyar dastan obrazlarının, sazla bağlı olan şeir biçimlərinin yığcam və aydınlaşdırıcı təqdimatı nəzərdə tutulmuşdur.

Aşıq ədəbiyyatı ilə bağlı bilgilərin elmi ictimaiyyətə çatdırılması və sənətə yeni gələn gənc nəslə mənimsədilməsi izahlı sözlüyü əsas məqsədidir.