Gənclər və yeniyetmələr arasında aşıq sənətinə maraq gündən-günə artmaqdadır. Azərbaycan Aşıqlar Birliyinin qayğısı sayəsində aşıq sənətinin tarixi ənənələrini yaşadan yeni səslər, yeni istedadlar üzə çıxır. Belə gənclərdən biri də İmralı Fikrət oğlu Fikrətlidir. Fikrət ustad oğludur – atası Fikrət Körpülü tanınmış aşıqlardan olub. 

İmralı Fikrətli bu günlərdə Azərbaycan Aşıqlar Birliyinə üzv qəbul olunub, AAB-nin sərdi, Əməkdar elm xadimi Məhərrəm Qasımlı ona üzvlük vəsiqəsini təqdim edib, sənətin çətin, lakin şərəfli yollarında uğurlar arzulayıb.

Sənətə yeni gələn aşıqlara daim diqqət və qayğı göstərən Azərbaycan Aşıqlar Birliyində aşıq sənətinin inkişafında özünəməxsus yeri olan ustad sənətkarlar da diqqətdən kənarda qalmır. Necə deyərlər, heç nə unudulmur, heç kəs yaddan çıxmır.

Ustad sənətkarlar haqqında kitablar hazırlanır, onların poetik yaradıcılıq nümunləri nəşr olunur, ifalarından ibarət audio və video disklər buraxılır.
AAB-nin katibi, Əməkdar mədəniyyət işçisi Musa Nəbioğlu bildirib ki, Azərbaycan Aşıqlar Birliyi tərəfindən ərsəyə gətirilmiş növbəti disk ustad aşıq, Əməkdar incəsənət xadimi Ədalət Nəsibova həsr olunub. belə İki diskdən ibarət olan albomun birinci hissəsində ustad sənətkarın repertuarındakı bənzərsiz ifaları – “Yanıq Kərəmi”, “Fəxri”, “Aran gözəlləməsi”, Hüseyni”, “Məmmədbağırı”, “Gəraylı”, “Baş dubeyti”, “Dilqəmi”, “Naxçıvanı”, “Baş sarıtel”, “Misri”, “Şahsevəni”, “Ruhani”, “Kərəm dubeyti” və “Müxəmməs” aşıq havaları, ikinci hissədə isə ustadın anadan olmasını 50 illik yubiley tədbirinin videolenti və aşıq Kərəm İncəliylə deyişməsi yer alıb.
Diski aşıq Altay Məmmədli hazırlayıb.

Bu günlərdə Azərbaycan Aşıqlar Birliyində nəşrə hazırlanmış daha bir kitab işıq üzü görüb. “Aşıq təcnisləri” adlanan bu şeir antologiyası ilkin cinaslı nümunələrdən günümüzə qədərki ustad aşıqların yaradıcılığından ən mükəmməl örnəkləri – Qurbani, Abbas Tufarqanlı, Xəstə Qasım, Şəmkirli Hüseyn, Aşıq Ələsgər, Molla Cuma, Hüseyn Bozalqanlı, Növrəs İman, Aşıq Şəmşir kimi nəhəng söz ustadlarından üzü bu yana – XX yüzilliyin ustad aşıq və təcnisə meyil göstərən saz şairlərinə qədər çoxsaylı qələm sahiblərinin təcnis yaradıcılıqlarından nümunələri əhatə edir.

Kitabda 120-dən çox saz-söz ustadının otuza yaxın təcnis çeşidini əhatələyən beş yüzə qədər örnək yer alıb. Onu da qeyd etmək lazımdır ki, zəngin cinas örnəkləri və biçimlərini əhatələyən belə poetik nümunələr indiyə qədər toplu səviyyəsində bir yerə yığılıb antologiya kimi çap olunmayıb. “Aşıq təcnisləri” bu sahədə ilk təşəbbüs və mübaliğəsiz demək olar ki, ilk uğurlu addımdır.

Sənət meydanında söz yükünün möhtəşəmliyini əhatələyən bu örnəklər xalqın dil zənginliyinin əvəzsiz göstəricisi olaraq da böyük əhəmiyyət kəsb edir. Belə bir zəngin xəzinənin bir araya gətirilərək antologiya səviyyəsində gələcək nəsillərə çatdırmaq ən ümdə məsələlərdən biri kimi uzun illər aşıqşünasların qarşısında durmuşdur.

Kitabın elmi məsləhətçisi və nəşrə hazırlayanlardan biri, Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlının da qeyd etdiyi kimi, mürəkkəb məzmun və forma zənginliyi ilə səciyyələnən təcnislər bu adla sənət aləmində tanınacaq “təcnis ustadları”nı formalaşdırmışdır: “Azərbaycan aşıq poeziyasının və saz havalarının içərisində poetik dolğunluğu və melodik təkrarsızlığı ilə seçilən “təcnis” şeir biçimi və “Təcnis” saz havası həm onun yaradıcı və ifaçısının, həm də dinləyici və oxucusunun yüksək səviyyədə duyğu, düşüncə və qavrayış həssaslığına malik olmasını tələb edir.

...Mənsub olduğu xalqın dilinə dərindən bələd olmadıqda, ayrı-ayrı söz, deyim və ibarələrin üslubi incəliklərinin ilk baxışdan sezilməyən alt qatlarına baş vura bilmədikdə təcnis sənətkarlığının ecazlarını nümayiş etdirmək mümkün deyildir. Ustad aşıqlarımız, saz şairlərimiz məhz sözü gedən poetik-üslubi gözəllikləri kəşf edib ortaya çıxarmaqla öz istedadları gücünə ağıl və könül qüdrətlərini ortaya qoyublar”.

Yuxarıda da qeyd etdiyimiz kimi, ilk dəfə işıq üzü görən antologiya saz-söz sənətinə yeni gələn gənclər üçün aşıq təcnisləri ilə bağlı üz tuta biləcəkləri ən etibarlı mənbə olmaqla yanaşı, eyni zamanda folklorşünas tədqiqatçılar, müvafiq sahə üzrə təhsil alan ali və orta ixtisas məktəbi tələbələri üçün də qiymətli vəsaitdir.

Nəfis tərtibatla və 1000 tirajla nəşr olunmuş “Aşıq təcnisləri” antologiyasının elmi məsləhətçisi Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlı, nəşrə hazırlayanlar professorlar Məhərrəm Qasımlı və Mahymud Allahmanlı, filologiya üzrə fəlsəfə doktoru, dosent Altay Məmmədli, redaktoru isə filologiya üzrə fəlsəfə doktoru, dosent Aynur Xəlilovadır.

AMEA Nizami Gəncəvi adına Ədəbiyyat İnstitutunda “Kitabi-Dədə Qorqud”un Pakistanda urdu dilində nəşrinin təqdimatı keçirilib. Təqdimatda Pakistan Ədəbiyyat Akademiyasının Prezidenti, professor Yusif Xuşk, Avrasiya Yazarlar Birliyinin başqanı, “Qardaş qələmlər” dərgisinin baş redaktoru Yaqub Öməroğlu, Azərbaycan Yazıçılar Birliyinin sədri, Xalq yazıçısı Anar, AMEA-nın müxtəlif institutlarının direktorları və bir çox ziyalılar iştirak ediblər.

Təqdimatı giriş sözü ilə AMEA-nın prezidenti, Ədəbiyyat İnstitutunun baş direktoru, akademik İsa Həbibbəyli açaraq Ədəbiyyat İnstitutu ilə Pakistan Ədəbiyyat Akademiyası arasında qarşılıqlı əməkdaşlıq əlaqələrinin konkret layihələr üzrə uğurla davam etdirildiyini diqqətə çatdırıb. Bu vaxta qədər çap olunmuş kitablar, keçirilmiş konfranslar, əməkdaşlıq müqavilələri, müxtəlif tədbirlər barəsində ətraflı məlumat verib. Qeyd edib ki, “Pakistan nümayəndə heyətini Gəncəyə, Nizami Gəncəvinin vətəninə aparmışıq. Müəyyən səbəblərdən hələ də Pakistanda Nizami Gəncəvini həm Azərbaycan, həm fars şairi kimi tanıyırlar. Biz bunun səbəbini başa düşürük. Sovet ittifaqı ilə Pakistan arasında “dəmir pərdələr” olub. Azərbaycan Nizami Gəncəvi haqqında həqiqətləri Pakistana çatdıra bilməyib. Nizami Gəncəvi haqqında məlumatlar bütün dünyaya, o cümlədən Pakistana İran vasitəsilə daxil olub. Siz də bilirsiniz ki, qədim və orta əsrlərdə fars dilində yazmaq ənənə idi. Hindistanda Əmir Xosrov Dəhləvi də farsca yazıb.

Biz artıq sizinlə “Kitabi-Dədə Qorqud” layihəsini başa çatdırdıq. Bunun üçün sizə dərin minnətdarlığımı bildirirəm. İstərdim ki, ikinci layihəmiz Nizami Gəncəvi olsun. Biz əminik ki, qardaş Pakistan xalqı Nizami Gəncəvinin hansı xalqa mənsub olduğunu dünyaya göstərməkdə tərəddüd etməyəcək. Yayda “Kitabi-Dədə Qorqud”un urdu dilində çap ilə bağlı təklif etdik. Professor Yusif Xuşkun böyük səyləri ilə “Kitabi-Dədə Qorqud” ilk dəfə urdu dilində çap olunub. “Kitabi-Dədə Qorqud” Azərbaycan xalqının milli kimliyidir. Pakistan xalqı “Kitabi-Dədə Qorqud”u urdu dilində oxumaqla Azərbaycanı incəliklərinə qədər tanıyacaq. Bu iş Pakistan-Azərbaycan əlaqələrinə misilsiz töhfədir.

Akademiyanın prezidenti kimi ilk tədbiri “Kitabi-Dədə Qorqud”a həsr etdik. Həm də ilk tədbirimizdə Azərbaycanı dövlət kimi ilk tanıyan Türkiyənin və Pakistanın nümayəndələri iştirak edir. İlk tədbiri Ədəbiyyat İnstitutunda keçirməyimiz də bir tarixdir”.

 Pakistan Ədəbiyyat Akademiyasının Prezidenti, professor Yusif Xuşk eposun urdu dilində nəşri haqqında ətraflı məlumat verib: “Hazırda Azərbaycan Respublikasının Pakistandakı səfiri bizə çox kömək edir, əlaqələrimizin inkişafına səy göstərir. Azərbaycan yazıçıları üçün Pakistan yazıçıları yad deyillər və ya əksinə. Pakistan Ədəbiyyat Akademiyası Pakistanda yenidən Azərbaycan ədəbiyyatının seçilmiş əsərlərini urdu dilində çap etdirmişdir. Bununla belə bu kitab Azərbaycan ədəbiyyatının urdu dilinə tərcüməsi baxımından çox böyük inkişafdır. Ən vacib məqam odur ki, kitab Azərbaycan Yazıçılar Birliyinin XIII qurultayı ərəfəsində çap olunmuşdur. “Kitabi-Dədə Qorqud” dastanı Azərbaycanın ən qədim dastanıdır və ilk dəfədir ki, urdu dilinə tərcümə edilmişdir”.

Azərbaycan Yazıçılar Birliyinin sədri, Xalq yazıçısı Anar çıxışında bildirib ki, “İsa müəllimin ədəbiyyat tariximizə tamamilə yeni baxışdan yanaşması və bunu əməli işdə göstərməsi, “Kitabi-Dədə Qorqud”la ədəbiyyat tariximizin başlaması dönüş nöqtəsidir və bu da İsa müəllimin xidmətidir”.

Təqdimatda Əlyazmalar İnstitutunun baş direktoru, akademik Teymur Kərimli, Azərbaycan Aşıqlar Birliyinin sədri, Əlyazmalar İnstitutunun şöbə müdiri, professor Məhərrəm Qasımlı, Memarlıq və İncəsənət İnstitutunun baş direktoru, AMEA-nın müxbir üzvü Ərtegin Salamzadə, Azərbaycan-Asiya ədəbi əlaqələri şöbəsinin baş elmi işçisi, filologiya elmləri doktoru Bəsirə Əzizəliyeva, “Qardaş qələmlər” dərgisinin baş redaktoru Yaqub Öməroğlu, AMEA-nın müxbir üzvü Könül Bünyadzadə, Dilçilik İnstitutunun baş direktoru, professor Nadir Məmmədli, Fəlsəfə İnstitutunun icraçı direktoru Eynulla Mədətli və professorlar Qəzənfər Paşayev və Əsədulla Qurbanov da çıxış edərək nəşrin əhəmiyyətindən danışıblar.

Gülnar Səma

Nizami Gəncəvi adına Ədəbiyyat İnstitutu,

İctimaiyyətlə əlaqələr şöbəsi

Azərbaycan Aşıqlar Birliyində gənc aşıqlara daim qayğı göstərilir. Aşıq sənətinin tarixi ənənələrini daha dərindən mənimsəmələri üçün tez-tez ustad aşıqlarla görüşlər və ustad dərsləri təşkil olunur, sənət yollarında püxtələşmələri üçün onlara hər cür dəstək göstərilir.

Sənətdə ilk addımlarını atan gənclərlə bağlı həyata keçirilən layihələrdən biri də yeni istedadların – yeni səslərin üzə çıxarılması ilə bağlıdır. Belə uğurlu addımlardan biri də Azərbaycan Aşıqlar Birliyinin AzTV ilə birgə həyata keçirdiyi layihədir. Bu barədə məlumat verən AAB-nin katibi, Əməkdar mədəniyyət işçisi Musa Nəbioğlu bildirib ki, respublikamızın bütün bölgələrində yaşayan gənc aşıqları əhatə edən layihə çərçivəsində ən istedadlılar seçilərək ifaları hər həftə “Mədəniyyət” kanalı vasitəsi ilə yayımlanan “Saz-söz axşamı” verilişində sənətsevərlərə təqdim olunur. Artıq bu qəbildən olan dördüncü veriliş də hazırlanıb və yaxın günlərdə efirdə yayımlanacaqdır. Bu dəfə tamaşaçılar gənc aşıqlardan Polad Mansurov, Murad Babaşov, Murad Dadaşəliyev, Ləman və Əli Məhərrəmzadələr və Vidadi Axundovun ifasında “Cəngi Koroğlu”, “Aran gözəlləməsi”, “Şirvan şikəstəsi”, “Kərəm gözəlləməsi”, “Yayma” və “Şahsevəni” aşıq havalarını dinləyə biləcəklər.
İl ərzində həyata keçirilən layihənin yekunu kimi isə bu il oktyabr ayının sonlarında paytaxtın böyük mədəniyyət ocaqlarının birində gənc aşıqların konsertinin keçirilməsi nəzərdə tutulur.

Azərbaycan Aşıqlar Birliyi daim gənclərə qayğı göstərir, istedadlı gənclərin üzə çıxarılması istiqamətində axtarışlarını davam etdirir. Bunun nəticəsidir ki.ölkəmizin ayrı-ayrı bölgələrində olan istedadlı saz-söz həvəskarları və aşıq sənətinə maraq göstərən gənclərin sayı getdikcə artmaqdadır. Bu gün belə istedadlı gənclərə paytaxt Bakı şəhəri ilə yanaşı vətənimizin hər mahalında rast gəlmək olar. Onlardan biri də Ağcabədi rayonunun Hacıbədəlli kəndindən olan Zamin Sərdar oğlu Həsənlidir.

Bakı Humanitar kollecində oxuyan Zamin uşaqlıqdan aşıq sənətinə meyil göstərib. Gənc olmasına baxmayaraq, o, kifayət qədər zəngin repertuara malikdir və özünün işıqlı sabahına böyük ümidlər oyadır.  Azərbaycan Aşıqlar Birliyi digər istedadlı gənclərimiz kimi, ona da öz qayğısını əsrgəmir, bir sənətkar kimi yetişməsi üçün lazım olan dəstəyi göstərir.

  Zamin Sərdaroğlu yaxın günlərdə AzTV və Aşıqlar Birliyinin birgə layihəsi olan “Yeni aşıq səsləri”ndə uğurla çıxış etmişdir. Zəngin repertuarı,istedadlı ifa tərzi və aşıqlıqla  bağlı bilgilərinə görə Zamin Sərdaroğlu istisna hal kimi Azərbaycan Aşıqlar Birliyinə üzv qəbul olunub. AAB-nin sədri, Əməkdar elm xadimi, professor Məhərrəm Qasımlı bu münasibətlə onu təbrik edərək üzvlük vəsiqəsini təqdim edib, sənətin çətin, lakin şərəfli yollarında gənc aşığa uğurlar arzulayıb.

Azərbaycan Aşıqlar Birliyində ərsəyə gətirilmiş daha bir kitab işıq üzü görüb. “Aşıq deyişmələri” adlanan bu antologiya Azərbaycan aşıq ədəbiyyatının tarixində ən fəal və işlək bir sənət axarını – aşıq deyişmələrinin xronoloji mənzərəsini ortaya qoyan ilk mükəmməl və sistemli nəşr işidir. Topluda orta çağların Yetim Aydın, Aşıq Qərib, Qurbani, Abbas Tufarqanlı, Xəstə Qasım, Abdalgülablı Valeh kimi nəhəng ustadları və onlardan sonrakı dönəmlərdə yaşayıb fəaliyyət göstərmiş Hüseyn Şəmkirli, Aşıq Ələsgər, Molla Cuma, Aşıq Şenlik, Hüseyn Bozalqanlı, Aşıq Şəmşir, Növrəs İman, Mikayıl Azaflı və digər saz-söz ustadlarının yaradıcılıq nümunələri yer alıb.

Dastanlarda, dastan-rəvayətlərdə, eləcə də dastandankənar əhvalatlarda yer alan aşıq deyişmələri və onun poetik strukturu (qarşılaşmaya gətirən səbəb, məktub-dəvət, hərbə-zorba, müəmma və qıfılbəndlərlə bir-birini sınağa çəkmək və s.), eləcə də aşıqlarla şairlərin deyişmələri, məktublaşma şəklində olan şeirləşmə-deyişmələr, bayatı üstündə qurulan bağlamalar və onların cavabları, duet-deyişmələr sırasından olan çoxsaylı örnəklər də antologiyanın müvafiq bölmələrində geniş yer alıb.
Geniş saz-söz ictimaiyyəti, aşıq sənəti ilə məşğul olan mütəxəssislər, doktorant, magistr və tələbələr, eləcə də, saz-söz aləminə qədəm qoymaq istəyən yeniyetmə və gənclər üçün nəzərdə tutulan topluda dastanlarda, dastan-rəvayətlərdə, eləcə də dastandankənar əhvalatlarda yer alan aşıq deyişmələri və onun poetik strukturu (qarşılaşmaya gətirən səbəb, məktub-dəvət, hərbə-zorba, müəmma və qıfılbəndlərlə bir-birini sınağa çəkmək və s.), eləcə də aşıqlarla şairlərin deyişmələri, məktublaşma şəklində olan şeirləşmə-deyişmələr, bayatı üstündə qurulan bağlamalar və duet-deyişmələr sırasından olan çoxsaylı örnəklər yer almışdır.
Antologiyanın elmi məsləhətçisi Azərbaycan Aşıqlar Birliyinin sədri, Dövlət Mükfatı laureatı Məhərrəm Qasımlı, hazırlayanlar Əməkdar elm xadimi, professor Məhərrəm Qasımlı, professor Mahmud Allahmanlı, filologiya üzrə fəlsəfə doktoru Altay Məmmədli, elmi redaktoru isə filologiya üzrə fəlsəfə doktoru Aynur Xəlilovadır.

Azərbaycan Aşıqlar Birliyi təşkilatın qarşısında duran vəzifələrin həyata keçirilməsinin səmərəliyini artırmaq, aşıqların fəaliyyətini stimullaşdırmaq üçün bölgələrdə Birliyin filial və bölmələrinin işinin təkmilləşdirilməsi, yeni təmsilçiliklər yaradılması istiqamətində işləri davam etdirir. Bölgələrdə aşıqların və müvafiq qurumların təmsilçilərinin iştirakı ilə toplantılar keçirilir, bölmələrə yeni rəhbər heyət seçilir.

Növbəti belə tədbir 2022-ci il  iyun ayının 21-də Ağcabədi rayonunun Taxtakörpü qəsəbəsində keçirilib. Ağcabədi Regional Mədəniyyət idarəsinin dəstəyi ilə keçirilən tədbirdə Laçın, Qubadlı və Zəngilan rayonlarından olan aşıqlar, mədəniyyət müəssisələrinin təmsilçiləri və saz-söz  ictimaiyyətini təmsil edən ziyalılar iştirak ediblər.

Toplantıda təşkilati məsələlər müzakirə olunub. Əməkdar mədəniyyət işçisi, ustad aşıq Umbay Axundov “Fəxri mədəniyyət işçisi” Nizami Şirinovun ustad aşıq olmaqla yanaşı həm də təşkilatçılıq qabiliyyətinə malik olduğunu tədbir iştirakçılarının diqqətinə çatdırıb və təklif edib ki, N.Şirinov  Azərbaycan Aşıqlar Birliyinin Laçın-Qubadlı-Zəngilan bölgəsi üzrə bölmənin rəhbəri seçilsin.

Ustad aşığın təklifi yekdilliklə dəstəklənib və aşıq Nizami Şirinov AAB-nin Laçın-Qubadlı-Zəngilan bölməsinin sədri, aşıq Təbriz  Sadıqov isə sədrin müavini seçiliblər.

Türkiyənin Ege Universiteti Türk Dünyası Araşdırmaları İnstitutunun əməkdaşı dos. dr. Pınar Fedakar və Ege Universiteti Dövlət Türk Musiqisi Konservatoriyasının əməkdaşı Ali Hikmet Gökçen bu günlərdə Azərbaycan Aşıqlar Birliyində qonaq olublar. Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlı qonaqları salamlayıb, AAB-nin fəaliyyəti və Azərbaycan aşıq sənətinin bu günü ilə bağlı ətraflı məlumat verib.

Qarşılıqlı fikir mübadiləsi əsasında keçən görüşdə Türkiyədə və Azərbaycanda, eləcə də Borçalıda və Cənubi Azərbaycanda aşıq sənətinin bu günkü durumu ilə bağlı maraqlı fikirlər səsləndirilib. Qonaqlar xüsusilə də Borçalı aşıq mühiti, Borçalı aşıqlarının həyat və yaradıcılıqları, Borçalı aşıq havalarının özəllikləri ilə maraqlanıblar.

Azərbaycan Aşıqlar Birliyində ustad aşıqlara – aşıq sənətinin inkişafında mühüm xidmətləri olmuş sənətkarlara daim diqqət və qayğı göstərilir, onlarla tez-tez görüşlər keçirilir, yaradıcılıqları təbliğ olunur, fəaliyyətləri müxtəlif formada stimullaşdırılır.

Bu günlərdə AAB-də növbəti belə bir görüş Göyçə aşıq mühitinin layiqli davamçılarından olan ustad aşıq Ələddin Göyçəli (Süleymanov) ilə baş tutub. AAB-nin sədri, Əməkdar elm xadimi, professor Məhərrəm Qasımlı ustad aşıqla sənətlə bağlı fikir mübadiləsi aparıb, yeniyetmə və gənclərdə sənətə marağın artırılmasının vacibliyini vurğulayıb. 

Sonda AAB sədri ustad sənətkarı aşıq sənətinin inkişafındakı xidmətlərinə görə “Fəxri diplom”la təltif edib.

Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlı uzunillik elmi fəaliyyəti zamanı apardığı tədqiqatları və nüfuzlu elmi jurnallarda nəşr olunmuş məqalələri ilə Türk mədəniyyətinə və dilinə göstərdiyi xidmətlərə görə Türkiyənin  Hacı Bektaş Vəli  Kültür Dərnəyi, Qırğızıstandakı K.Tınıstanov adına İssık-Göl Dövlət Universiteti və Türk Dünyası Söz Akademiyasının birgə təsis etdiyi “Manasın mirasçıları:  Türk dünyası kültürünə hizmet ödülü”nə layiq görülüb.  

Bu günlərdə Azərbaycan Aşıqlar Birliyində qonaq olan “Dünya Söz Akademiyası” Dərnəyinin başqanı, professor Hayrettin İvgin Hacı Bektaş Vəli  Kültür Dərnəyinin başkanı Mustafa Özcivan,  K.Tınıstanov adına İssık-Göl Dövlət Universitetinin rektoru professor Kurmanbek Abdıldayev və  və Türk Dünyası Söz Akademiyasının başkanı Hayrettin İvginin imzaladığı mükafatı və medalı Məhərrəm Qasımlıya təqdim edib.

 “Dünya Söz Akademiyası” Dərnəyinin (Türkiyə) başqanı, professor Hayrettin İvgin Azərbaycan elmi ictimaiyyətinə yaxşı tanışdır. Dəfələrlə respublikamızda olan H.İvgin Azərbaycan ədəbiyyatının və mədəniyyətinin qardaş Türkiyədə yorulmaz təbliğatçılarındandır.

Görüş zamanı həmçinin Azərbaycan və Türkiyə ədəbi-mədəni əlaqələrinin daha da inkişaf etdirilməsi üçün qarşılıqlı fəaliyyətin genişləndirilməsi perspektivlərinə dair fikir mübadiləsi aparılıb.

Görüşdə AAB-nın  əməkdaşları ilə yanaşı şair Vüqar Əhməd və gənc, istedadlı xanəndə Almaxanım Əhmədli də iştirak ediblər.

Azərbaycan Aşıqlar Birliyində bölgələrdə yaşayan aşıqların fəaliyyətinə daim böyük diqqət yetirilir, onların yaradıcılıqlarının inkişafına hərtərəfli dəstək göstərilir. Bölgələrlə işin daha  səmərəli təşkili üçün bu günlərdə daha bir uğurlu addım atılıb. 2022-ci il iyun ayının 2-də Birliyin Gəncəbasar və Qazax-Ağstafa-Tovuz filiallarında AAB-nin sədri, Əməkdar elm xadimi, professor Məhərrəm Qasımlının, regional mədəniyyət idarələrinin, yerli icra strukturlarının təmsilçilərinin və aşıqların iştirakı ilə keçirilən toplantılarda bölgələrdə aşıq sənətinin inkişafı və qarşıda duran vəzifələr müzakirə olunub, AAB-nin hər iki filialında təşkilati məsələlər müzakirə olunaraq, yeni təyinatlar həyata keçirilib.

Azərbaycan Aşıqlar Birliyinin Gəncəbasar filialına aşıq Elbrus Hüseyn oğlu Hüseynov sədr, Saleh Ələddin oğlu Tağıyev və Elnur Elşən oğlu Əmirov isə onun müavinləri seçiliblər. İclasda həmçinin filialın aşağıdakı bölmələrinə təmsilçilər də təyin olunub: Gəncə şəhər bölməsinə Şöhrət Elman oğlu Kərimov və İlqar Nəcəf oğlu Nəcəfov; Goranboy bölməsinə Elnur Elşən oğlu Əmirov; Daşkəsən bölməsinə Saleh Ələddin oğlu Tağıyev; Kəlbəcər bölməsinə Əhliman Məhəmməd oğlu Allahverdiyev və Əfqan Əvəz oğlu Məmmədov; Göygöl bölməsinə isə Fətulla Əbdüləzim oğlu Əliyev və Ələddin Musa oğlu Süleymanov.

Azərbaycan Aşıqlar Birliyinin Qazax-Ağstafa-Tovuz filialına isə aşıq Camoy Camoy oğlu Qurbanov sədr seçilib. Eyni zamanda Hüseyn Şəmistan oğlu Dərgahquliyev Qazax, Hakim Mikayıl oğlu Zeynalov və Məmməd İsmayıl oğlu Ələsgərov Tovuz, Hüseyn Əziz oğlu Hüseynov isə Ağstafa bölmələri üzrə təmsilçilər seçiliblər.

Hər iki filial və müvafiq bölmələrdə rəhbər vəzifələrə təyinatlar üzrə AAB-nin sədri, Əməkdar elm xadimi, professor Məhərrəm Qasımlı müvafiq əmr imzalayıb.