“Möhtərəm Cənab Prezidentimizin 18 fevralda Aşıq Ələsgərin 200 illiyi ilə bağlı verdiyi sərəncam həqiqətən böyük bir qədirşunaslıqdan xəbər verdi. Bu mübarək sərəncamdan sonra Ələsgərin yubileyi ilə bağlı sistemli işlər aparılır. Bu sıradan ən zirvə məqam mənə elə gəlir ki, Aşıq Ələsgərin heykəlinin qoyulmasıdır”.

Bunu Moderator.az-a açıqlamasında Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlı deyib. O, ölkə başçısının Aşıq Ələsgərin Bakıda heykəlinin qoyulmasıyla bağlı verdiyi sərəncamı yüksək qiymətləndirib:

“Bakı şəhərində Dədə Qorquddan başqa heç bir ozan aşıq ustadının heykəli olmayıb. İndiki halda ikinci heykəl ucalacaq. Bu heykəlin ucalması bizə onu deyir ki, saz-söz sənətiylə bağlı Azərbaycanın düşüncəsi uzaqmənzillidir və bu gün Azərbaycanda ucalacaq Aşıq Ələsgər heykəlinin səsi-sorağı sabah bütün dünyaya yayılacaq. Səbəb də odur ki, o, böyük, qüdrətli bir sənətkardır və bir də onun yurdu-yuvası ermənilər tərəfindən dağıdılıb. Qoy dünya görsün ki, böyük bir sənətkarın uyuduğu torpaq ermənilər tərəfindən tapdaq altındadır. Mənə elə gəlir ki, zaman içində Göyçə camaatı öz torpaqlarına qayıdacaq, Dədə Ələsgərin məzarıyla yenidən üzbəüz olacağıq və bu heykəlin biri də o məzarın üzərində ucaldılacaq. 

Mən Azərbaycan Aşıqlar Birliyi adından Möhtərəm Cənab Prezidentimizə xüsusi təşəkkür edirəm ki, Aşıq Ələsgərin heykəlinin ucaldılmasıyla bağlı məhz ayrıca sərəncam verdi və hamımızda xüsusi bir qürur yaratdı. Dədə Ələsgərin də, bütün ulu Ozanların da ruhu şad olsun. Mən zaman içərisində inşallah daha böyük sənət zirvələriylə bağlı da belə sərəncamların olacağını gözləyirəm. Çünki bizim mədəniyyətimizin kökündə Dədə Qorqud dünyasından, ənənəsindən gələn Abbas Tufarqanlılar, Qurbanilər, Xəstə Qasımlar, Dədə Ələsgərlər, Aşıq Şəmşirlər, yəni bu sıradan olan yüzlərlə sənətkarlarımız dayanıb. Onlar həmişə bizim ürəyimizin, bağrımızın başındadır”.

Qeyd edək ki, Prezident İlham Əliyev Aşıq Ələsgərin Bakıda abidəsinin ucaldılmasıyla bağlı sərəncam imzalayıb.

Vasif Əlihüseyn

Azərbaycan Aşıqlar Birliyində həyata keçirilən “Aşıq dərsləri” adlı layihə çərçivəsində ikinci audiodisk işıq üzü görüb.

Xatırladaq ki, ilk dəfə olaraq həyata keçirilən bu layihədə əsas məqsəd aşıq sənətini öyrənmək istəyən yeniyetmə və gənclərə, bu sahədə təhsil alan şagird və tələbələrə yardımçı olmaqdır. Layihə çərçivəsində yeddi audiodiskin buraxılması nəzərdə tutulur. Disklərə daxil olunan havalar mənimsənilməsi baxımından sadədən mürəkkəbə doğru olmaqla seçilir və hər aşıq havasının özünəməxsus incəlikləri, öyrədilməsi yolları və s. ustad aşıqların ifasında lentə alınaraq təqdim olunur. Hər diskdə ən azı 3 aşıq havası yer alır və hər hava günümüzün bir tanınmış ustad aşığı tərəfindən bütün xırdalıqlar incələnməklə ifa olunur.

Təqdim olunan aşıq havaları eyni zamanda əvvəlki ustad aşıqların ifasında da təqdim olunur ki, bu da gənclər üçün ayrılıqda hər bir havanın müxtəlif aşıq mühitlərində necə ifa olunması və böyük ustadların yaradıcılığı ilə daha yaxından tanış ola bilmələri üçün əlavə imkanlar açır.

Azərbaqycan Aşıqlar Birliyinin katibi, Əməkdar mədəniyyət işçisi Musa Nəbioğlu bildirib ki, “Aşıq dərsləri” layihəsi çərçivəsində buraxılmış ikinci audiodiskdə sənətşünaslıq üzrə fəlsəfə doktoru, Əməkdar mədəniyyət işçisi Samirə Əliyevanın ifasında “Cəlili”, Əməkdar mədəniyyət işçisi Solmaz Kosayevanın ifasında “Orta sarıtel” və aşıq Elman Mehdiyevin ifasında “Orta şəşəngi” havaları təqdim olunur. Eyni zamanda artıq dünyalarını dəyişmiş ustad aşıqlardan Əkbər Cəfərov, Kamandar Əfəndiyev, Aşıq Müseyib və Barat Əhmədoğlunun həmin havalardan ibarət klassik lent yazıları da audiodiskə daxil edilib.

Möhtərəm cənab Prezident!

Bu il Azərbaycan aşıq sənətinin görkəmli siması, misilsiz sənətkarlıqla yaratdığı poetik əsərlərində xalqımızın milli-mənəvi varlığını böyük ustalıqla canlandıran, aşıq sənəti və ədəbiyyatının inkişafında böyük xidmətləri olan saz-söz ustadı Aşıq Ələsgərin 200 illik yubileyi tamam olur. Ölkəmizin bütün saz-söz adamlarının, çoxsaylı aşıqlar ordusunun adından böyük minnətdarlıq hissi ilə bildirmək istəyirəm ki, bu ölməz sənətkarın 200 illik yubileyinin geniş qeyd olunması ilə bağlı bu il fevralın 18-də imzaladığınız sərəncama uyğun olaraq respublikamızın hər yerində yubiley tədbirləri keçirilməkdədir. Sizin imzaladığınız həmin sərəncam və sərəncamdan irəli gələn vəzifələrin uğurla yerinə yetirilməsi anadan olmasının 150 illik yubileyi Ulu öndərimiz Heydər Əliyevin təşəbbüsü ilə 1972-ci ildə Moskvada və Bakıda, eləcə də, doğulduğu Göyçə mahalında böyük təntənə ilə qeyd edilən, daha sonra isə 175, 180 və 190 illik yubileyləri yenə də Ulu öndərin və Sizin sərəncamlarınızla qeyd olunan Aşıq Ələsgərə böyük ehtiram olmaqla yanaşı, həm də bütövlükdə mədəniyyətimizin mühüm bir qolu olan  aşıq sənətinə verilən qiymət və daim bu sənətə göstərdiyiniz diqqət və qayğının növbəti təzahürüdür.

      Bakı şəhərində Aşıq Ələsgərin abidəsinin ucaldılması haqqında 2021-ci il noyabrın 30-da imzaladığınız sərəncam isə Sizin Aşıq Ələsgər kimi ölməz saz-söz ustadına, bütövlükdə aşıq sənətinə növbəti qayğınız və diqqətiniz kimi böyük əhəmiyyətə malikdir və sənət adamları tərəfindən sevinc və rəğbət hissi ilə qarşılanıb.

      Möhtərəm cənab Prezident! Böyük saz-söz ustadı kimi təkcə Azərbaycanda deyil, eyni zamanda aşıq sənətinin yayıldığı digər ölkələrdə də yaxşı tanınan və sevilən Aşıq Ələsgərə və bütövlükdə mədəniyyətimizə, onun mühüm qolu olan aşıq sənətinə göstərdiyiniz daimi diqqət və qayğıya görə Sizə dərin təşəkkürümüzü bildirirəm.

Azərbaycan Aşıqlar                                              Məhərrəm Qasımlı 

   Birliyinin sədri                                                   Dövlət Mükafatı laureatı,

                                                                           Əməkdar elm xadimi, professor.

Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, Azərbaycan aşıq yaradıcılığının görkəmli nümayəndəsi, böyük el sənətkarı Aşıq Ələsgərin xatirəsinin əbədiləşdirilməsi məqsədilə qərara alıram:

1. Bakı şəhərində ustad sənətkar Aşıq Ələsgərin abidəsi ucaldılsın.

2. Bakı Şəhər İcra Hakimiyyəti Azərbaycan Respublikasının Mədəniyyət Nazirliyi ilə birlikdə Aşıq Ələsgərin abidəsinin ucaldılması ilə bağlı tədbirlərin həyata keçirilməsini təmin etsin.

3. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.

İlham Əliyev

Azərbaycan Respublikasının Prezidenti

Bakı şəhəri, 30 noyabr 2021-ci il

Əməkdar mədəniyyət işçisi Gülarə Azaflı və onun rəhbərlik etdiyi “Çeşmə” folklor qrupu 2021-ci il noyabrın 19-da Türkiyənin Konya şəhərində keçiriləcək Beynəlxalq Aşıqlar bayramına dəvət alıb. Karatay bələdiyyəsinin təşəbbüsü və bələdiyyə başqanı Hasan Kılcanın bilavasitə təşkilatçılığı, ozan-aşıq Ahmed Yıldırımın rəhbərliyi ilə keçirilən bu bayram sayca 55-cidir. Ötən il keçirilən 54-cü Aşıqlar bayramı Azərbaycan Ordusunun Qarabağda əldə etdiyi Zəfərə həsr olunub.

Xatırladaq ki, Əməkdar mədəniyyət işçisi Gülarə Azaflı Konya Aşıqlar bayramında ilk dəfə 1992-ci ildə iştirak edib. Bu il keçiriləcək bayram şənliklərində onunla birlikdə qrupun üzvlərindən Roman Azaflı, Əfsanə Kərimli, Rəqsanə Məmiyeva, Gülbəyaz Dadaşova və Nəzrin Məlikova çıxış edəcəklər.

Dahi Azərbaycan şairi və mütəfəkkiri Nizami Gəncəvinin 880 illiyi ilə əlaqədar dekabrın 17-də Heydər Əliyev Sarayında Azərbaycanda ilk dəfə “Leyli və Məcnun” dastan-tamaşası təqdim olunacaq.

Heydər Əliyev Sarayından AZARTAC-a bildirilib ki, Nizami Gəncəvinin “Leyli və Məcnun” poemasının motivləri əsasında hazırlanan eyniadlı dastan-tamaşa Mədəniyyət Nazirliyinin dəstəyi, Heydər Əliyev Sarayı və Azərbaycan Aşıqlar Birliyinin birgə təşkilatçılığı ilə keçiriləcək.

“Nizami Gəncəvi İli” çərçivəsində keçirilən dastan–tamaşanın ssenari müəllifləri Azərbaycan Aşıqlar Birliyinin sədri, Əməkdar elm xadimi Məhərrəm Qasımlı və filologiya üzrə fəlsəfə doktoru Altay Məmmədli, quruluşçu rejissoru Əməkdar artist İnarə Babayevadır.

Dastan-tamaşada Qələndər Zeynalov (Ustad aşıq), Əməkdar mədəniyyət işçisi Samirə Əliyeva (Leyli), Əli Zeynalabdinov (Qeys), Kəmalə Qubadlı (Leylinin anası), Elməddin Məmmədli (Qeysin dostu Zeyd), Əməkdar mədəniyyət işçisi Solmaz Kosayeva (Qeysin anası), Şahniyar Əliyev (Qeysin atası), Nəbi Nağıyev (Leylinin atası), Eldar Bağırov (Səyyad), Elman Talıstanlı (Salam şahzadə), Əli Tapdıqoğlu (Nofəl pəhlivan) və saz ifaçıları Afil Bəxtiyarov, Ayxan Məlikov, Coşqun Əsgərov iştirak edəcəklər.

Noyabr  ayının 29-da AMEA Nizami adına Ədəbiyyat  İnstitutu ilə Aşıqlar Birliyinin Aşıq Ələsgərin 200 illiyi ilə bağlı böyük tədbiri keçirilmişdir. Tədbiri giriş sözü  ilə AMEA-nın vitse-prezidenti akademik İsa Həbibbəyli açmış, Aşıqlar Birliyinin sədri, professor Məhərrəm Qasımlı, Folklor institutunun direktoru akademik Muxtar İmanov, professor İsmayıl Məmmədov, professor Mahmud Allahmanlı, dosent Aynur Xəlilova və başqaları böyük sənətkarın saz-söz  dünyası barədə  məruzələr etmişlər.

Tədbirdə  Əməkdar mədəniyyət işçisi  Gülarə Azaflının rəhbərlik etdiyi “Çeşmə” sazçı folklor  qrupu, ustad aşıq Altay Məmmədli Aşıq Ələsgərin sözlərinin saz havalarının müşayiət ilə oxumuşlar.      

“Milli bayraq həm dövlətin, həm də hər bir vətəndaşın başucalığıdır, qürurudur. Bu mənada Azərbaycan bayrağı şübhəsiz paytaxt Bakıda dalğalanan zaman bütün dünyaya mesaj verir ki, mən bir dövlətəm. Amma bayrağımız bu gün Gəncəmizə də, Lənkəranımıza da, Qubamıza da, Naxçıvanımıza da qürur verir. Ona görə qürur verir ki, o Şuşada dalğalanır”.

Bunu Moderator.az-a açıqlamasında Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlı deyib. M.Qasımlı bayram münasibətilə xalqımızı təbrik edib:

“Şuşada dalğalanan bayraq həm də bizim ordakı dalğalanan qeyrətimizdir, ürəyimizdir. Bu məqamda Şuşada dalğalanan bayrağımızın həqiqətən çox böyük tarixi anlamı var. Bu günki Dövlət Bayrağı Günü bizə sayı-hesabı bilinməyən bayram əhval-ruhiyyəsi verir, çünki üçrəngli bayrağımız Bakıdan dikəlib və Şuşaya qədər gedib çıxıb. Şuşada da Bakının yolunu göstərir. Bu o deməkdir ki, bayrağımızın da, ürəyimizin də dalğalandığı yer Bakıdır, Azərbaycan dövlətçiliyidir və Şuşada bayrağımızın dalğalanması bizim üçün unudulmaz bir məqamdır.

44 günlük Vətən müharibəsində bayrağımız Azərbaycan milli-mənəvi varlığının, dövlətinin və Azərbaycan qeyrətçiliyinin simvolu idi. Əsgərlərimiz hansı ərazini düşməndən azad edirdisə, ora üçrəngli bayrağımızı taxıb, bayraqla bərabər öz qeyrətlərini, döyüşkənliklərini, dövlətimizin yenilməzliyini göstərirdilər. Şəhid olan əsgərlərimizin belə sinəsində bayraq var idi. Çünki onlar o bayrağa bükülüb dəfn edilirdi. Bu mənada onları Şuşaya aparan bayrağın da çox müqəddəs mənası var. Bu müqəddəsliyi hər gün, hər saat böyüyən bütün nəsillər də hiss etməlidir və inşallah belə də olacaq. Yeni doğulan körpələrimiz də böyüyüb qəhrəman şəhidlərimiz kimi bayrağımızı ucalardan uca tutacaqlar. Mən Dövlət Bayrağı Günü münasibətilə xalqımızı təbrik edirəm”. 

Vasif Əlihüseyn

          Azərbaycan Aşıqlar Birliyinin nəzdində fəaliyyət göstərən, Əməkdar mədəniyyət işçisi Gülarə Azaflının rəhbərlik etdiyi “Çeşmə”sazçı folklor qrupu 2021-ci il noyabrın 18-19-da Türkiyənin Konya şəhərində keçirilən Aşıqlar bayramında iştirak edib. Karatay bələdiyyəsinin ev sahibliyi və bələdiyyə başqanı Hasan Kılcanın bilavasitə təşkilatçılığı, ozan-aşıq Ahmed Yıldırımın rəhbərliyi ilə keçirilən və  sayca 55-ci olan tədbirdə Türkiyə ilə yanaşı Azərbaycan, Gürcüstan, İran və  İraqı təmsil edən 35 ozan-aşıq iştirak edib.   

Əməkdar mədəniyyət işçisi Gülarə Azaflı və gənc aşıqlardan Roman Azaflı, Əfsanə Kərimli, Rəqsanə Məmiyeva, Gülbəyaz Dadaşova və Nəzrin Məlikovanın çıxışları tamaşaçılar tərəfindən rəğbətlə qarşılanıb, bayramı təşkil edən Karatay Bələdiyyəsi tərəfindən mükafata layiq görülüblər.  

8 noyabr 2020-ci il, Qarabağa qovuşduğumuz tarixi gün – Böyük Qələbə Günüdür! Şanlı tariximizə daxil olan Zəfər günüdür!

2020-ci ilin payızında 44 günlük müharibədə bütün dünya Azərbaycan ordusunun hərbi gücünə və qüdrətinə, əsgər və zabitlərimizin qəhrəmanlığına şahid oldu. Bu gün böyük fəxarət hissi ilə qeyd etdiyimiz QƏLƏBƏ Azərbaycan xalqının əzmi və iradəsi, ölkəmizin iqtisadi gücü, müasir ordu quruculuğu, xalq-iqtidar birliyi, müharibənin başladığı ilk günlərdən etibarən xalqımızın bir yumruq kimi ölkə Prezidentinin ətrafında birləşməsi və dövlətimizin başçısı, möhtərəm Prezidentimiz və Ali Baş Komandan İlham Əliyevin illərlə yeritdiyi uğurlu daxili və xarici siyasətin məntiqi nəticəsidir. 

Bu möhtəşəm Qələbə günü – Zəfər bayramı münasibəti ilə xalqımızı təbrik edirik! Xalq-iqtidar birliyi bizi daha böyük qələbələrə qovuşduracaq!

BAYRAMIN MÜBARƏK, AZƏRBAYCAN XALQI!

BAYRAMIMIZ MÜBARƏK!

AZƏRBAYCAN AŞIQLAR BİRLİYİ

  Orxan Paşa

Qırx dörd günün gerçək nağılı

      Bu il avqust ayının sonlarında Şuşada oldum. “Zəfər yolu” ilə irəliləyərkən müzəffər ordumuzun yenilməz bir qüdrətlə yarıb keçdiyi düşmən istehkamlarına, yağı işğalından qurtulmuş düzənliklərimizə, dağlarımıza, meşələrimizə baxıb qürur keçirir və doluxsunurdum. Sıldırım Şuşa qayalarını aşıb keçən bahadır oğullarımıza dönüb-dönüb afərin deyirdim. İki gün Şuşada qaldım. Buraya qədəm qoyduğum andan sehirli bir aləmə düşmüşdüm. Hər saat, hər an  ötən ilin 44 günlük ulu Vətən savaşını xatırlayırdım.

      Şuşada Azərbaycan əsgərlərinin qanı tökülən daşı-divarı bağrıma basdım, öpdüm qan ləkələrinin izlərini... Gerçək bir nağıl olan o günlər gözümün önündə canlandı və həmin gecə Şuşada bu şeiri gələmə aldım.

 2020-ci ilin ulu Vətən savaşçılarına

 Sentyabrın 26-sından

   27-sinə keçən gecəsi,

       dəmir bir yumruğa

       dönmüşdü aslan pəncəsi.

...Bir az sonra

             başlayacaqdı döyüş –

 bir az  sonra

                lərzə  düşəcəkdi

                arana, dağa;

                qəlbi qubarlı Qarabağa;

 bir  az  sonra

            şəhid qanı,

              qazi qanı

                 qarışıb

          can verəcəkdi torpağa.

44 günlük alov içində

       ürəklənib

          təzədən Vətən olacaqdı

             çayır torpaq,

                yovşan torpaq.

“Oğuz igidlərim hardadı”, – deyib

               illər boyu

                  yurdun  yiyəsini

                  soruşan torpaq.

Bir az sonra

              dirilib

                 yenidən

                   nəfəs alacaqdı

                      ər oğulların,

                        əsgər oğulların

           çəkməsinə qovuşan  torpaq...

...Bu da noyabrın onu,

        diz çökməklə bitdi

                yağının sonu.

Bir az öncə gəldi

          Zəfər soraqlı

            o mübarək gün,

                o hava gün,

                    o işıq gün,

                         o ürək gün!

...Əlvida söylədi otuz illik

                 qara baxtına,

aranıyla, dağıyla

            bütünləşdi Qarabağ.

Şuşa-Kəlbəcər,

      Ağdam-Laçın da

           kökləndi Bakı vaxtına;

Can oldu,

          Azərbaycan  oldu –

            Vətənləşdi  Qarabağ!