Bu gün Azərbaycan xalqı böyük qələbəni hamılıqla bayram edir. Düşünürəm ki, 10 noyabr Azərbaycan xalqının tarixində hər zaman qələbə günü kimi qeyd ediləcək. Müzəffər Ali Baş Komandan, Prezident İlham Əliyevin rəhbərliyi ilə sentyabrın 27-dən başlayan Vətən müharibəsi şanlı qələbə ilə başa çatdı. Qısa zaman çərçivəsində Azərbaycan Ordusu Ermənistanın 30 il ərzində qurduğu silahlı qüvvələrini darmadağın edərək, böyük zəfərə imza atdı.
Bu fikirləri AZƏRTAC-a müsahibəsində Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlı deyib.
Azərbaycan Prezidenti, Müzəffər Ali Baş Komandan İlham Əliyevin axşam xalqa müraciətini dinlədikcə istər-istəməz kövrəldim. Bu günləri bizə yaşadan rəşadətli Azərbaycan ordusuna və Müzəffər Ali Baş Komandanımıza minnətdarlığımı bildirirəm. Bu Vətən müharibəsi Azərbaycan xalqının kimliyini, nəyə qadir olduğunu bir daha dünyaya bəyan etdi.
Məhərrəm Qasımlı deyib: “Bir məqamı deməyi özümə borc bilirəm. Ölkə Prezidenti, Müzəffər Ali Baş Komandan İlham Əliyevin qətiyyətli siyasi iradəsi, yorulmaz fəaliyyəti və Azərbaycan xalqının milli maraqlarının ən böyük müdafiəçisi və təbliğatçısı kimi dünyanın tanınmış, geniş auditoriyaya malik televiziya kanallarına verdiyi müsahibələr dünya ictimaiyyətinin məlumatlandırılması baxımından olduqca mühüm və əhəmiyyətlidir. Xüsusilə bu işdə qardaş Türkiyənin kütləvi informasiya vasitələrinin ölkəmizə dəstəyi və Qarabağ həqiqətlərinin dünyaya tanıdılması, Azərbaycanın tarixi torpaqları uğurundakı haqlı savaşına xüsusi diqqət ayırması yüksək təqdirəlayiqdir.
Azərbaycan güclü və özünü qoruya bilən bir dövlətdir. Ərazi bütövlüyümüzün bərpası bir nömrəli vəzifəmizdir. Bu vəzifənin sona qədər davam etdirilməsi və bayrağımızın bütün işğal altındakı torpaqlarımızda qürurla dalğalandırılması üçün Müzəffər Ali Baş Komandanın rəhbərliyi ilə ordumuz və xalqımız əsl birlik, həmrəylik nümayiş etdirdi.
Bir daha xalqımızı bu möhtəşəm qələbə münasibətilə təbrik edirəm. İnanıram ki, Ermənistan bu savaşdan öz dərsini aldı. Bu, qələbə onlara əbədi dərs olacaq. Qarabağ Azərbaycanındı və Azərbaycanın olaraq qalacaq. Qarabağ Azərbaycandır!