Azərbaycan Aşıqlar Birliyinin fəaliyyətində aşıqların dastan ifaçılığına böyük önəm verilir, bu istiqamətdə müxtəlif layihələr həyata keçirilir. Gənc aşıqların repertuarında dastanların mühüm yer tutmasına isə xüsusi önəm verilir. Bu, bir tərəfdən dastan söyləmə ənənəsinin qorunub saxlanılması üçün vacibdirsə, digər tərəfdən də sənətə gələn gənclərin bir aşıq kimi püxtələşməlirində, sənətin incəliklərinə bələd olaraq kamil sənətkar kimi yetişmələrində mühüm əhəmiyyətə malikdir. Bu səbəbdəndir ki, AAB-nin gənc aşıqlarla bağlı növbəti layihəsi məhz onların dastan ifaçılığına həsr olunub. Yaxın günlərdə  gənc aşıqlardan Afil Bəxtiyar  və Amil Bəxtiyarın ifasında “Məsum və Diləfruz”, Elçinn Rəşidoğlu və Elçin Məmmədovun ifasında “Abdulla Cahan” dastanları, Nəcəf Məmmədov və İmralı Fikrətoğlunun ifasında isə “Abbas və Gülgəz” dastanından bir parça sənətsevərlərə təqdim olunacaq.

Bu il ölkəmizdə Heydər Əliyev ilidir və Ulu Öndərin anadan olmasının 100 illik yubileyi münasibəti ilə respublikamızın hər yerində tədbirlər keçirilir. Bu dahi şəxsiyyətin 100 illik yubileyinin yüksək səviyyədə qeyd olunması ilə bağlı Azərbaycan Aşıqlar Birliyində də geniş tədbirlər planı hazırlanıb. Bu silsilədən bir tədbir kimi, “Mədəniyyət” kanalında hət həftə Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlının təqdimatında efirə çıxan “Saz-söz axşamı” verilişinin bir buraxılışının Ulu öndərə həsr olunması planlaşdırılıb. Yaxın günlərdə yayımlanacaq verilişdə Heydər Əliyevin Azərbaycan aşıq sənətinə daim diqqət və qayğı göstərməsindən söhbət açılacaq, respublikamızın tanınmış aşıqları – Əməkdar mədəniyyət işçiləri Gülarə Azaflı və Ağamurad Şirvanlı, eləcə də Qələndər Zeynalov, Roman Azaflı, Məhsəti Cabbarlı, Əli Pənahoğlu, Babək Şakirli kimi tanınmış sənətkarlar və “Çeşmə” folklor qrupu saz-söz adamlarının Ulu Öndərə həsr etdikləri şeirləri müxtəlif aşıq havaları üstündə tamaşaçılara təqdim edəcəklər.

Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlının yeni kitabı işıq üzü görüb. Təkcə ölkəmizdə deyil, onun hüdudlarından kənarda da görkəmli folklorşünas alim kimi tanınan, xüsusilə də aşıq sənəti və ustad aşıqların yaradıcılığının yorulmaz tədqiqatçısı olan M.Qasımlının bu kitabı hələ XX əsrin 90-cı illərində işıq üzü görmüş və bu gün də tədqiqatçıların etibarlı mənbə kimi üz tutduqları “Ozan-aşıq sənəti” kitabının təkmilləşdirilmiş və əlavələr edilmiş yeni nəşridir. “Ozan-aşıq sənəti və ədəbiyyatı” adlanan və əvvəlki nəşrlərdən əsaslı şəkildə fərqlənən bu kitab 34 çap vərəqi həcmindədir və aşağıdakı bölmələrdən ibarətdir: “Aşıq sənətinin tarixi kökləri”, “Aşıqlıq: yaranış və biçimlənmə mərhələləri”, “Aşıq mühitləri” və “Aşıq ədəbiyyatı”.

Redaksiya heyətində Azərbaycanla yanaşı, dünyanın bir sıra ölkələrinin nüfuzlu alimlərinin təmsil olunduğu “Folklor və etnoqrafiya” jurnalının 2023-cü ildə ilk sayı işıq üzü görüb.

Bu il Azərbaycan aşıq sənətinin inkişafında özünəməxsus rolu olan ustad sənətkar Hüseyn Bozalqanlının anadan olmasının 160 illik yubiley ilidir. 1863-cü ildə Tovuzda anadan olmuş və XIX əsrin sonları, XX əsrin birinci yarısında ustad aşıq kimi təkcə Gəncə-Tovuz bölgəsində deyil, Azərbaycanın hər yerində, eləcə də Göyçədə və Borçalıda da məşhur olan Hüseyn Bozalqanlının 160 illik yubileyinin qeyd olunması üçün Azərbaycan Aşıqlar Birliyinin ayrıca tədbirlər planı var. Bu sıradan ilk tədbir kimi “Mədəniyyət” televiziya kanalında həftəlik yayımlanan “Saz-söz axşamı” verilişinin bir buraxılışı bütövlükdə ustada həsr olunacaqdır.  Müxtəlif bölgələrdən ustad aşıqların dəvət olunduğu həmin verilişdə Hüseyn Bozalqanlının şeirləri ifa olunacaq, dastan və rəvayətlərindən parçalar söyləniləcəkdir.

Eyni zamanda bu böyük sənətkarın 160 illik yubileyi münasibəti ilə Tovuzda, Gəncədə və Bakıda tədbirlər keçirilməsi nəzərdə tutulur.  

Sizi əziz Novruz bayramı münasibətilə ürəkdən təbrik edir, hamınıza uzun və sağlıqlı ömür, səadət dolu günlər arzulayırıq.

Təbiətin əbədi nizamına əcdadlarımızın ehtiramını ifadə edən bu müqəddəs bayram bizə ulularımızdan yadigardır. Bu bayram xalqımızın qədim və zəngin dünyagörüşünün, gələcəyə nikbin baxışının, bütövlükdə milli varlığımızın dolğun təcəssümü kimi mədəni sərvətlər xəzinəmizdə müstəsna yer tutur. Kökü tarixin dərin qatlarına gedib çıxan Novruz ənənələrini xalqımız minilliklər boyu yad təsirlərdən qoruyaraq yaşadıb. Novruz bayramı, Novruz ənənələri eyni zamanda xalqımızın bəşər mədəniyyətinə töhfəsidir.

Bu gün Azərbaycanda hər kəs böyük qürur hissi ilə qeyd edir bu bayramı. Çünki 2020-ci ilin payızındakı 44 günlük Vətən müharibəsi və bu müharibədə qazanılan şanlı Zəfər Azərbaycana əbədi bahar gətiribdir.

Əziz həmvətənlər! Əziz soydaşlar! Hamınıza bahar əhval-ruhiyyəsi arzu edirik! Qoy bu bayram evinizə, ocağınıza bol ruzi-bərəkət və firavanlıq gətirsin!

Bayramınız mübarək!

AZƏRBAYCAN AŞIQLAR BİRLİYİ

Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlının aparıcılığı ilə hər həftənin şənbə günü “Mədəniyyət” kanalında yayımlanan “Saz-söz axşamı” verilişndə yeni layihəyə start verib. “Az ifa olunan aşıq havaları” adlanan layihənin həyata keçirilməsində məqsəd son zamanlar aşıqların az müraciət etdiyi, bu səbəbdən də az qala unudulmaqda olan aşıq havalarına yeni həyat vermək, efir vasitəsi ilə sənətsevərlərə çatdırmaqdır. Bu silsilədən olan ilk verilişdə aşıqlardan Yaşar Məhərrəmov “Dərbəndgülü”, “Təbriz gözəlləməsi”, “Zəncangülü”, “Qədimxanı”, “Gülşəni”, “Abbası”, “Şəmkir sarayı”, “Sumayi”, “Yerişi Koroğlu”, “Şirinqala Koroğlusu” və “Süsənbər gözəlləməsi”, Vüqar Şəmkirli “Mirzə dübeyti”, “Arazbarı”, “Oğuzoğlu” və “Təxmis”, Rza Məmmədov “Yayma”, “Sallama gərayı”, “Qara qafiyə” və “Nəbati gəraylısı”, Qorqud Məhərrəmov isə “Ərzincan Koroğlusu” havalarını ifa edəcəklər.