2017-ci il oktyabr 9-11-də Türkiyənini Qars şəhərində “I Uluslararası Kafkasya halk kültürü” adlı elmi konfrans kecirilib. Qarsdakı Qafqaz universitetinin təşkilatçılığı ilə keçirilən konfransda türk alimləri ilə yanaşı, Azərbaycan, Gürcüstan, Rusiya, Fransa, İran, Qazaxıstan, Özbəkistan və digər ölkələrdən gəlmiş alimlər elmi məruzələrlə çıxış ediblər.
Konfransı Qars Qafqaz universitetinin rektoru, professor Sami Özcan açıb. Azərbaycandan bir sıra alimlərin də qatıldığı konfransın plenar iclasında Azərbaycan Aşıqlar Birliyinin sədri, Əməkdar Elm Xadimi, professor Məhərrəm Qasımlı ”Aşıqlıq ənənəsinin Qafqaz mədəniyyətində əhəmiyyəti” adlı məruzə ilə çıxış edib. Plenar iclas aşıqların maraqlı və rəngarəng çıxışları ilə sona çatıb. Ankara Dövlət Türk Xalq Musiqi xoru və ansamblı, Gürcüstanın “Axısxa” rəqs qrupu və cənubi Azərbaycandan olan mahir saz ifacısı və tədqiqatçı Çingiz Mehdipurun rəhbərlik etdiyi “Dalğa” qrupunun çıxışı böyük rəğbətlə qarşılanıb.
Sonra konfrans öz işini bölmələr üzrə davam etdirib. Bölmələrdən birinə rəhbərlik edən professor M.Qasımlı eyni zamanda “Aşıq ədəbiyyatının milli və tarixi özəlliyi” mövzusunda məruzə ilə də çıxış edib.
Musa Nəbioğlu