2023-cü il may ayının 23-də Azərbaycan Dövlət Pedaqoji Universitetində “Qərbi Azərbaycanda aşıq sənəti” mövzusunda elmi-nəzəri disput keçirilib. Tədbiri giriş sözü ilə ADPU-nun prorektoru, professor Mahirə Hüseynova açaraq bu tədbirin keçirilməsinin vacibliyindən və mövzunun aktuallığından danışıb. Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlı Qərbi Azərbaycan aşıq mühitləri – İrəvan, Göyçə və Çıldır-Ağbaba aşıq ocaqları haqqında tədbir iştirakçılarına elmi dəlillərə əsaslanan əhatəli bilgi verib, bu mühitlərin tanınmış ustad aşıqları olan Çıldırlı Aşıq Şenlik, Göyçəli Aşıq Alı və Aşıq Ələsgər, Dərələyəzli Aşıq Cəlil, Dərəçiçəkli Aşıq Alı və digərlərinin həyat və yaradıcılıqlarından söz açıb. Filologiya elmləri doktoru, professor Mahmud Allahmanlının əhatəli məruzəsi də Qərbi Azərbaycanda aşıq sənətinin təşəkkül tarixi və bölgənin ustad aşıqlarına həsr olunub. ADPU-nun dosenti, folklorşünas alim Qüdrət Umudov öz çıxışında Azərbaycan aşıq sənətinin inkişafında Qərbi Azərbaycan aşıq mühitlərinin rolundan danışıb.
Çıxışlardan sonra tədbir iştirakçıları onları maraqlandıran suallarla çıxışçılara müraciət ediblər. Sualları ADPU-nun prorektoru, professor Mahirə Hüseynova, AAB-nin sədri, Əməkdar elm xadimi, professor Məhərrəm Qasımlı və professor Mahmud Allahmanlı cavablandırıblar.
Sonda AAB sədri, Əməkdar elm xadimi, professor Məhərrəm Qasımlı Azərbaycan Aşıqlar Birliyində son illərdə hazırlanıb ərsəyə gətirilmiş qiymətli nəşrləri – aşıq sənətinə dair müxtəlif kitabları tədbir iştirakçılarına hədiyyə edib.
