Azərbaycan aşıq sənətinə ağır itki üz vermişdir. Ustad sənətkar, Aşıqlar Birliyi idarə heyətinin üzvü aşıq Yaşar Məhərrəmov 47 yaşında ağır xəstəlikdən sonra qəfil vəfat etmişdir. O, Azərbaycan aşıqlığının zəngin repertuarına malik nadir və nəhəng simalarından biri idi. 200-dən artıq saz havasını sinəsində yaşadan aşıq Yaşarın repetuarı olduqca zəngin və təkrarsız idi. O həm gözəl ifaçı, həm də saz bəstəcisi idi. Beş saz havası yaratmışdı. Zəngin musiqi və söz repertuarı ilə Aşıqlar Birliyinin insan xəzinəsi statuslu sənətkarı idi. Onun repertuarı Aşıqlar Birliyi, Azərbaycan TV və Radionun qızıl fondunda qorunmaqdadır.
Əslən Kəlbəcərdən olan aşıq Yaşar son illərdə azad olunmuş Dəlidağa, İstisuya və digər səfalı yaylaqlara tez-tez səfərlər edir və bu gözəl diyarla nəfəs alırdı, həmin mövzu ilə bağlı şeirlər, mahnılar yaradırdı. Kəlbəcərə köçüb orada yaşamaq-yaratmaq arzusundaydı. Amansız xəstəlik imkan vermədi...
Onun itkisi Aşıqlar Birliyini dərindən sarsıtmışdır. Bir neçə ay öncə “Ustad sənətkar” fəxri nişanına layiq görülmüş aşıq Yaşar daha böyük adlara layiq idi. Gözəl insan, istedadlı aşıq, şair və bəstəçinin əziz xatirəsi heç vaxt unudulmayacaq. Saz-söz dünyası onu daim yaşadacaqdır.
Ruhu şad olsun.
Azərbaycan Aşıqlar Birliyi