Azərbaycan Aşıqlar Birliyi katibliyinin 17 mart 2017-ci il tarixli iclasında Aşıqlar Birliyinin üzvü Adil Ziyadxan oğlu Quliyevin davranış və hərəkətləri müzakirə olunmuşdur. Bəlli olmuşdur ki, AzTV-nin əməkdaşı Adil Ziyadxan oğlu Quliyev mütəmadi olaraq Birlik üzülüyinə yaraşmayan hərəkətlərə yol verir. O, ardıcıl şəkildə Aşıqlar Birliyi rəhbərliyini gözdən salmaq məqsədi daşıyan təxribatçı əməllər törədir, əsassız şayiə və böhtanlarla məşğul olur.
Adil Quliyev bir neçə gün öncə İrandan qonaq gəlmiş aşıqları dilə tutaraq onları Aşıqlar Birliyinin sədri Məhərrəm Qasımlı və AzTV “Mədəniyyət“ kanalının direktor müavini Nadir Axundov barəsində şər və böhtanlar söyləməyə təhrik etmişdir. Onun yalançı və aldadıcı təhrikləri, şırnikləndirici vədləri diktafon vasitəsi ilə yazıya alınmış və sübut kimi saxlanılır.
Azərbaycan Aşıqlar Birliyinin katibliyi səs yazısını dinlədikdən və Adil Quliyevin buna bənzər bir çox başqa hərəkətlərini təhlil etdikdən sonra onun Aşıqlar Birliyi sıralarında qalmasını mümkünsüz saymışdır.
Yolverilməz hərəkət və davranışlarına görə Adil Ziyadxan oğlu Quliyevin Azərbaycan Aşıqlar Birliyi siralarından xaric olunması barəsində yekdilliklə qərar qəbul olunmuşdur.