AZƏRBAYCAN AŞIQLAR BİRLİYİ AZƏRBAYCAN AŞIQLAR BİRLİYİ
AZƏRBAYCAN AŞIQLAR BİRLİYİ AZƏRBAYCAN AŞIQLAR BİRLİYİ
  • ANA SƏHİFƏ
  • HAQQIMIZDA
  • XƏBƏRLƏR
  • TƏDBİRLƏR
  • MƏQALƏLƏR
  • MƏKTUBLAR
  • YUBİLEYLƏR
  • KİTABLAR
  • ƏLAQƏ
“AŞIQ DƏRSLƏRİ” SERİYASINDAN NÖVBƏTİ DİSK İŞIQ ÜZÜ GÖRÜB
Featured

“AŞIQ DƏRSLƏRİ” SERİYASINDAN NÖVBƏTİ DİSK İŞIQ ÜZÜ GÖRÜB

19.11.2021

Azərbaycan Aşıqlar Birliyində həyata keçirilən “Aşıq dərsləri” adlı layihə çərçivəsində ikinci audiodisk işıq üzü görüb.

Xatırladaq ki, ilk dəfə olaraq həyata keçirilən bu layihədə əsas məqsəd aşıq sənətini öyrənmək istəyən yeniyetmə və gənclərə, bu sahədə təhsil alan şagird və tələbələrə yardımçı olmaqdır. Layihə çərçivəsində yeddi audiodiskin buraxılması nəzərdə tutulur. Disklərə daxil olunan havalar mənimsənilməsi baxımından sadədən mürəkkəbə doğru olmaqla seçilir və hər aşıq havasının özünəməxsus incəlikləri, öyrədilməsi yolları və s. ustad aşıqların ifasında lentə alınaraq təqdim olunur. Hər diskdə ən azı 3 aşıq havası yer alır və hər hava günümüzün bir tanınmış ustad aşığı tərəfindən bütün xırdalıqlar incələnməklə ifa olunur.

Təqdim olunan aşıq havaları eyni zamanda əvvəlki ustad aşıqların ifasında da təqdim olunur ki, bu da gənclər üçün ayrılıqda hər bir havanın müxtəlif aşıq mühitlərində necə ifa olunması və böyük ustadların yaradıcılığı ilə daha yaxından tanış ola bilmələri üçün əlavə imkanlar açır.

Azərbaqycan Aşıqlar Birliyinin katibi, Əməkdar mədəniyyət işçisi Musa Nəbioğlu bildirib ki, “Aşıq dərsləri” layihəsi çərçivəsində buraxılmış ikinci audiodiskdə sənətşünaslıq üzrə fəlsəfə doktoru, Əməkdar mədəniyyət işçisi Samirə Əliyevanın ifasında “Cəlili”, Əməkdar mədəniyyət işçisi Solmaz Kosayevanın ifasında “Orta sarıtel” və aşıq Elman Mehdiyevin ifasında “Orta şəşəngi” havaları təqdim olunur. Eyni zamanda artıq dünyalarını dəyişmiş ustad aşıqlardan Əkbər Cəfərov, Kamandar Əfəndiyev, Aşıq Müseyib və Barat Əhmədoğlunun həmin havalardan ibarət klassik lent yazıları da audiodiskə daxil edilib.

Featured

AŞIQ ƏLƏSGƏRİN 200 İLLİK YUBİLEYİ MUSİQİ MƏDƏNİYYƏTİ DÖVLƏT MUZEYİNDƏ QEYD OLUNUB

02.11.2021

Azərbaycan Musiqi Mədəniyyəti Muzeyində Azərbaycan aşıq sənətinin görkəmli nümayəndəsi, qüdrətli söz ustadı Aşıq Ələsgərin 200 illik yubileyinə həsr olunmuş sərgi və tədbir keçirilib. Tədbiri muzeyin direktoru, sənətşünaslıq üzrə fəlsəfə doktoru, Əməkdar mədəniyyət işçisi Alla Bayramova açaraq Aşıq Ələsgərin həyat və yaradıcılığından danışıb.

Direktor müavini Təranə Zeynalovanın aparıcılığı ilə keçən tədbirdə sonra söz Azərbaycan Aşıqlar Birliyinin katibi, Əməkdar mədəniyyət işçisi Musa Nəbioğluna verlib. O, Aşıq Ələsgərin Azərbaycan aşıq sənətində və ədəbiyyatımızdakı yeri və xidmətlərindən danışıb, ölkə başçısının sərəncamıyla ustad aşığın 200 illik yubileyinin ölkəmizin hər yerində geniş qeyd olunduğunu vurğulayıb. M.Nəbioğlu deyib ki, Azərbaycan Aşıqlar Birliyi Aşıq Ələsgərin 200 illik yubileyi münasibəti ilə ayrıca tədbirlər proqramı hazırlayıb, hələ ötən ilin sonlarından yubiley tədbirlərinə start verilib. İndiyədək Birlik tərəfindən ustadın seçmə şeirlərindən ibarət ayrıca kitab nəşr olunub ki, burada ilk dəfə olaraq hansı şeirin hansı aşıq havası üstə oxunması haqda məlumat və bu gün az işlənən sözlərin izahlı lüğəti də verilib. Geniş oxucu kütləsinin ixtiyarına verilmiş digər kitab isə “Aşıq Ələsgərlə bağlı dastan-rəvayətlər” adlanır. Eyni zamanda Aşıq Ələsgərin sözlərini oxumuş aşıqların ifalarından ibarət disk də buraxılıb.

Sonra sənətşünaslıq üzrə elmlər doktoru Abbasqulu Nəcəfzadə, sənətşünaslıq üzrə fəlsəfə doktoru Mübariz Əliyev, Cəbrayıl Tarix-diyarşünaslıq muzeyinin direktoru Tariyel Abbaslı və digərləri çıxış edərək Aşıq Ələsgər sənətinin qüdrətindən söz açıblar.

Tədbirdə həmçinin Azərbaycan Aşıqlar Birliyi idarə heyətinin üzvləri – Birliyin sədr müavini Altay Məmmədli, Əməkdar mədəniyyət işçiləri Əhliman Rəhimov və Samirə Əliyeva, eləcə də aşıqlardan Fəzail Milkinli, Əfsanə Kəfrimli və Respublika İncəsənət Gimnaziyasının şagirdləri müxtəlif aşıq havaları üstündə Aşıq Ələsgərin şeirlərini ifa ediblər. 

“SƏNƏTİN KAMANDAR ZİRVƏSİ”
Featured

“SƏNƏTİN KAMANDAR ZİRVƏSİ”

24.09.2021

Borçalı aşıq mühitinin yetirməsi, XX əsr Azərbaycan aşıq sənətinin görkəmli simalarından biri olan Aşıq Kamandar Əfəndiyevə həsr olunmuş növbəti kitab işıq üzü görüb.

2021-ci ilin iyul ayında Gürcüstanda – ustad aşığın doğma yurdu Marneuli rayonunun Kəpənəkçi kəndində ev-muzeyinin açlıması ərəfəsində Tbilisidə işıq üzü görmüş kitab “Sənətin Kamandar zirvəsi” adlanır. Kitabın müəllifi Borçalıda yaşayıb fəaliyyət göstərən folklorşünas alim, professor Mahmud Kamaloğlu, redaktoru Azərbaycan Aşıqlar Birliyinin katibi, Əməkdar mədəniyyət işçisi Musa Nəbioğlu, rəyçi professor Şurəddin Məmmədli, məsləhətçi isə ustad aşığın oğlu Əflatun Kamandardır.

Kitabda Aşıq Kamandar haqqında eyni zamanda gürcü dilində də geniş məlumatlar yer alıb ki, bu da gürcü ictimaiyyətinin sənətkarın həyat və yaradıcılığı ilə yaxındaqn tanış olmasına imkan yaradır.

Xatırladaq ki, Aşıq Kamandar – Kamandar Həmid oğlu Əfəndiyev 1932-ci il oktyabrın 21-də Borçalıda anadan olub. XX əsrin ikinci yarısından bənzərsiz ifası və dastan söyləmək bacarığı ilə Azərbaycan aşıq sənətində özünəməxsus yer tutub, təkcə Gürcüstanda və Azərbaycanda deyil, eyni zamanda Türkiyə, Cənubi Azərbaycan və Orta Asiya respublikalarında da məşhur olub. Təsadüfi deyil ki, bu gün Borçalı ilə yanaşı, Azərbaycanda, xüsusilə də Təbriz və onun ətraf bölgələrində sənətə gələn gənclərin çoxu Aşıq Kamandar yolunu davam etdirir.

1959-cu ildə Moskvada keçirilən Azərbaycan mədəniyyəti ongünlüyünün mükafatçısı olan Aşıq Kamandar 1963 və 1984-cü illərdə keçirilən Azərbaycan aşıqlarının III və IV qurultaylarının nümayəndəsi olub, Əməkdar mədəniyyət işçisi (1984) fəxri adına layiq görülüb, orden və medallarla təltif olunub.

“ÇEŞMƏ” QRUPU KONYA AŞIQLAR BAYRAMINDA İŞTİRAK EDƏCƏK
Featured

“ÇEŞMƏ” QRUPU KONYA AŞIQLAR BAYRAMINDA İŞTİRAK EDƏCƏK

16.11.2021

Əməkdar mədəniyyət işçisi Gülarə Azaflı və onun rəhbərlik etdiyi “Çeşmə” folklor qrupu 2021-ci il noyabrın 19-da Türkiyənin Konya şəhərində keçiriləcək Beynəlxalq Aşıqlar bayramına dəvət alıb. Karatay bələdiyyəsinin təşəbbüsü və bələdiyyə başqanı Hasan Kılcanın bilavasitə təşkilatçılığı, ozan-aşıq Ahmed Yıldırımın rəhbərliyi ilə keçirilən bu bayram sayca 55-cidir. Ötən il keçirilən 54-cü Aşıqlar bayramı Azərbaycan Ordusunun Qarabağda əldə etdiyi Zəfərə həsr olunub.

Xatırladaq ki, Əməkdar mədəniyyət işçisi Gülarə Azaflı Konya Aşıqlar bayramında ilk dəfə 1992-ci ildə iştirak edib. Bu il keçiriləcək bayram şənliklərində onunla birlikdə qrupun üzvlərindən Roman Azaflı, Əfsanə Kərimli, Rəqsanə Məmiyeva, Gülbəyaz Dadaşova və Nəzrin Məlikova çıxış edəcəklər.

IMG 20211116 WA0006

“Zəfər günü”nə həsr olunmuş saz – söz töhfəsi
Featured

“Zəfər günü”nə həsr olunmuş saz – söz töhfəsi

25.10.2021

Ötən hər gün bizi keçən ilin noyabrında əldə etdiyimiz böyük qələbənin ildönümünə - 8 noyabr Zəfər bayramına yaxınlaşdırır. Bu gün ölkəmizin hər yerində bu şanlı qələbənin birinci ildönümünü ümumxalq bayramı kimi qeyd etməyə hazırlıq görülür. Bu münasibətlə Azərbaycan Aşıqlar Birliyində də xüsusi layihə həyata keçirilməsi planlaşdırılıb.

20 nəfərdən çox aşığın iştirak edəcəyi layihədə qələbə gününə həsr olunmuş xüsusi proqramın hazırlanması nəzərdə ttulur. Artıq bu istiqamətdə işlərə start verilib, proqram üzrə bir neçə dəfə məşqlər keçirilib. Əməkdar mədəniyyat işçisi Gülarə Azaflının rəhbərlik etdiyi “Çeşmə” folklor qrupunun ifasında “Gəlmişəm, Şuşam, gəlmişəm”, “Ruhani” sazçı folklor qrupunun hazlırladığı “Zəfər” kompozisiyası, aşıqlardan Nəbi Nağıyev, Nazim Quliyev və Eldar Bağırovun ifasında “Ordumuz” Ruhiyyə  Zəngilanlının  hazırladığı  “Yolum gedir Zəngilana”və s. çıxışlardan ibarət layihə Zəfər bayramı ərəfəsində geniş ictimaiyyətə təqdim olunacaq. “Zəfər günü” saz-söz proqramı Az TV-nin “Mədəniyyət” kanalında yayımlanacaqdır.

“LEYLİ VƏ MƏCNUN” DASTANI AŞIQLARIN İFASINDA TƏQDİM OLUNACAQDIR
Featured

“LEYLİ VƏ MƏCNUN” DASTANI AŞIQLARIN İFASINDA TƏQDİM OLUNACAQDIR

21.09.2021

Bu il böyük Nizami Gəncəvinin anadan olmasının 880 illik yubileyi tamam olur. Azərbaycan Respublikasının Prezidenti cənab İlham Əliyevin sərəncamı ilə 2021-ci il ölkəmizdə “Nizami Gəncəvi ili” elan olunub. Ölməz söz ustadının yubileyi münasibəti ilə respublikamızda bir çox tədbirlər keçirilir. Bu yubileylə əlaqədar Azərbaycan Aşıqlar Birliyində də bir sıra tədbirlərin həyata keçirilməsi nəzərdə tutulub. Bunlardan biri də Nizami Gəncəvinin “Leyli və Məcnun” poeması əsasında yaradılmış eyniadlı dastanın aşıqların ifasında yeni səhnə və ekran tərtibatında təqdim olunmasıdır. Artıq bu istiqamətdə hazırlıq işləri yekunlaşmaq üzrədir.

Bu günlərdə Azərbaycan Aşıqlar Birliyində birliyin sədri, Əməkdar elm xadimi, professor Məhərrəm Qasımlının  dastanda əsas rollardan birini – Leyli rolunu ifa edəcək Əməkdar mədəniyyət işçisi, ADMİU-nun dosenti, sənətşünaslıq üzrə fəlsəfə doktoru Samirə Əliyeva ilə görüşündə də dastanın çəkilişinə hazırlıqla bağlı məsələlər müzakirə olunub, fikir mübadiləsi aparılıb.

Rolların ilkin bölgüsü aparılıb, səhnəciklərin teatral təqdimatının forma və üsulları müəyyənləşdirilib. Rollarda Əməkdar Mədəniyyət işçisi Solmaz Kosayeva, Kəmalə Qubadlı, Qələndər Zeynalov, Əli Pənahoğlu, Əli Tapdıqoğlu, Nəbi Nağıyev, Ramin  Qarayev, Şəhriyar Qaraxanlı, Nazim Bahadıroğlu kimi istedadlı aşıqlar çıxış edəcəklər.

Görüşdə AAB-nin sədr müavini, filologiya üzrə fəlsəfə doktoru, aşıq Altay Məmmədli də iştirak edib.

“44 günlük Vətən müharibəsində də bayrağımız qeyrətçiliyimizin simvolu idi...”
Featured

“44 günlük Vətən müharibəsində də bayrağımız qeyrətçiliyimizin simvolu idi...”

09.11.2021

“Milli bayraq həm dövlətin, həm də hər bir vətəndaşın başucalığıdır, qürurudur. Bu mənada Azərbaycan bayrağı şübhəsiz paytaxt Bakıda dalğalanan zaman bütün dünyaya mesaj verir ki, mən bir dövlətəm. Amma bayrağımız bu gün Gəncəmizə də, Lənkəranımıza da, Qubamıza da, Naxçıvanımıza da qürur verir. Ona görə qürur verir ki, o Şuşada dalğalanır”.

Bunu Moderator.az-a açıqlamasında Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlı deyib. M.Qasımlı bayram münasibətilə xalqımızı təbrik edib:

  1602658548

“Şuşada dalğalanan bayraq həm də bizim ordakı dalğalanan qeyrətimizdir, ürəyimizdir. Bu məqamda Şuşada dalğalanan bayrağımızın həqiqətən çox böyük tarixi anlamı var. Bu günki Dövlət Bayrağı Günü bizə sayı-hesabı bilinməyən bayram əhval-ruhiyyəsi verir, çünki üçrəngli bayrağımız Bakıdan dikəlib və Şuşaya qədər gedib çıxıb. Şuşada da Bakının yolunu göstərir. Bu o deməkdir ki, bayrağımızın da, ürəyimizin də dalğalandığı yer Bakıdır, Azərbaycan dövlətçiliyidir və Şuşada bayrağımızın dalğalanması bizim üçün unudulmaz bir məqamdır.

44 günlük Vətən müharibəsində bayrağımız Azərbaycan milli-mənəvi varlığının, dövlətinin və Azərbaycan qeyrətçiliyinin simvolu idi. Əsgərlərimiz hansı ərazini düşməndən azad edirdisə, ora üçrəngli bayrağımızı taxıb, bayraqla bərabər öz qeyrətlərini, döyüşkənliklərini, dövlətimizin yenilməzliyini göstərirdilər. Şəhid olan əsgərlərimizin belə sinəsində bayraq var idi. Çünki onlar o bayrağa bükülüb dəfn edilirdi. Bu mənada onları Şuşaya aparan bayrağın da çox müqəddəs mənası var. Bu müqəddəsliyi hər gün, hər saat böyüyən bütün nəsillər də hiss etməlidir və inşallah belə də olacaq. Yeni doğulan körpələrimiz də böyüyüb qəhrəman şəhidlərimiz kimi bayrağımızı ucalardan uca tutacaqlar. Mən Dövlət Bayrağı Günü münasibətilə xalqımızı təbrik edirəm”. 

Vasif Əlihüseyn

Featured

TƏBRİK EDİRİK!

18.10.2021

img20211018_14503263_resize.jpgimg20211018_14521095_resize.jpgAzərbaycan Respublikasının Prezidenti cənab İlham Əliyevin 16 oktyabr 2021-ci il tarixli sərəncamı ilə respublikamızın bir qrup mədəniyyət işçisinə fəxri adlar verilib. “Əməkdar mədəniyyət işçisi” fəxri adına layiq görülənlər arasında ustad sənətkar, balaban ustası İbad Məhəmməd oğlu Allahverdiyev və aşıq Bəhmən İsa oğlu Kazımovun da adları var. Hər iki sənətkarı bu münasibətlə təbrik edir, uzun və sağlam ömür, yeni-yeni yaradıcılıq uğurları arzulayırıq.

AZƏRBAYCAN AŞIQLAR BİRLİYİ

Featured

USTAD AŞIQ HÜSEYN ŞƏMKİRLİNİN 210 İLLİK YUBİLEYİ İLƏ BAĞLI “AŞIQ HÜSEYNLƏ REYHAN XANIM” DASTANININ YENİ SƏHNƏ VƏ EKRAN TƏQDİMATI HAZIRLANIR

14.09.2021

Bu il Azərbaycan aşıq sənətinin inkişafında özünəməxsus yeri və rolu olan ustad aşıq Hüseyn Şəmkirlinin andan olmasının 210 illik yubileyi tamam olur. Dastan və aşıq havalarının yaradılmasında böyük xidmətləri olan görkəmli sənətkarın yubileyinin qeyd olunması üçün Azərbaycan Aşıqlar Birliyində bir sıra tədbirlər nəzərdə tutulub.

Bunlardan biri də ustadın adıyla bağlı olan “Aşıq Hüseynlə Reyhan xanım” dastanı gənc aşıqların ifasında yeni variantda səhnələşdirilərək geniş ictimaiyyətə çatdırılmasıdır. Bu barədə məlumat verən Azərbaycan Aşıqlar Birliyinin katibi, Əməkdar mədəniyyət işçisi Musa Nəbioğlu bildirib ki, artıq bu istiqamətdə ilkin hazırlıq işlərinə başlanıb. Dastandakı poetik mətnlərin xeyli hissəsi Hüseyn Şəmkirlinin bəstələdiyi “Hüseyni”, “Dilqəmi”, “Sümayi”, “Şəmkir sarayı” və “Köhnə gözəlləmə” havaları üstündə səsləndiriləcəkdir. 

Dastan bu ilin oktyabr ayında “Mədəniyyət” kanalında Əməkdar elm xadimi, professor Məhərrəm Qasımlının aparıcılığı ilə efirə gedən “Saz-söz axşamı” verilişində gənc aşıqlar Vüqar Şəmkirli və Maşallah Dünyamalıyev (aşıqları balabanda Ramil Allahverdiyev müşayiət edir) tərəfindən təqdim olunacaqdır.  

ZƏFƏR BAYRAMIN MÜBARƏK, AZƏRBAYCAN!
Featured

ZƏFƏR BAYRAMIN MÜBARƏK, AZƏRBAYCAN!

05.11.2021

8 noyabr 2020-ci il, Qarabağa qovuşduğumuz tarixi gün – Böyük Qələbə Günüdür! Şanlı tariximizə daxil olan Zəfər günüdür!

2020-ci ilin payızında 44 günlük müharibədə bütün dünya Azərbaycan ordusunun hərbi gücünə və qüdrətinə, əsgər və zabitlərimizin qəhrəmanlığına şahid oldu. Bu gün böyük fəxarət hissi ilə qeyd etdiyimiz QƏLƏBƏ Azərbaycan xalqının əzmi və iradəsi, ölkəmizin iqtisadi gücü, müasir ordu quruculuğu, xalq-iqtidar birliyi, müharibənin başladığı ilk günlərdən etibarən xalqımızın bir yumruq kimi ölkə Prezidentinin ətrafında birləşməsi və dövlətimizin başçısı, möhtərəm Prezidentimiz və Ali Baş Komandan İlham Əliyevin illərlə yeritdiyi uğurlu daxili və xarici siyasətin məntiqi nəticəsidir. 

Bu möhtəşəm Qələbə günü – Zəfər bayramı münasibəti ilə xalqımızı təbrik edirik! Xalq-iqtidar birliyi bizi daha böyük qələbələrə qovuşduracaq!

BAYRAMIN MÜBARƏK, AZƏRBAYCAN XALQI!

BAYRAMIMIZ MÜBARƏK!

AZƏRBAYCAN AŞIQLAR BİRLİYİ

 

LCdriz3TCtrIuIBWPwaJwT9O-0eQ5BKwFX_b-vSLWO7xEZnNnG7skBlHf4a23_1_u2VTf11CZiZLeP62D51_Eye70hjL98M5RfvDVRDtx1gwFGX3hMI5KQD4XG2AFMjmQ1jjWl4dZW84IIzIFwgZ88yiHUVdfJtC_w.jpg

  Orxan Paşa

Qırx dörd günün gerçək nağılı

      Bu il avqust ayının sonlarında Şuşada oldum. “Zəfər yolu” ilə irəliləyərkən müzəffər ordumuzun yenilməz bir qüdrətlə yarıb keçdiyi düşmən istehkamlarına, yağı işğalından qurtulmuş düzənliklərimizə, dağlarımıza, meşələrimizə baxıb qürur keçirir və doluxsunurdum. Sıldırım Şuşa qayalarını aşıb keçən bahadır oğullarımıza dönüb-dönüb afərin deyirdim. İki gün Şuşada qaldım. Buraya qədəm qoyduğum andan sehirli bir aləmə düşmüşdüm. Hər saat, hər an  ötən ilin 44 günlük ulu Vətən savaşını xatırlayırdım.

      Şuşada Azərbaycan əsgərlərinin qanı tökülən daşı-divarı bağrıma basdım, öpdüm qan ləkələrinin izlərini... Gerçək bir nağıl olan o günlər gözümün önündə canlandı və həmin gecə Şuşada bu şeiri gələmə aldım.

                                                                 

 2020-ci ilin ulu Vətən savaşçılarına

 Sentyabrın 26-sından

   27-sinə keçən gecəsi,

       dəmir bir yumruğa

       dönmüşdü aslan pəncəsi.

...Bir az sonra

             başlayacaqdı döyüş –

 bir az  sonra

                lərzə  düşəcəkdi

                arana, dağa;

                qəlbi qubarlı Qarabağa;

 bir  az  sonra

            şəhid qanı,

              qazi qanı

                 qarışıb

          can verəcəkdi torpağa.

44 günlük alov içində

       ürəklənib

          təzədən Vətən olacaqdı

             çayır torpaq,

                yovşan torpaq.

“Oğuz igidlərim hardadı”, – deyib

               illər boyu

                  yurdun  yiyəsini

                  soruşan torpaq.

Bir az sonra

              dirilib

                 yenidən

                   nəfəs alacaqdı

                      ər oğulların,

                        əsgər oğulların

           çəkməsinə qovuşan  torpaq...

...Bu da noyabrın onu,

        diz çökməklə bitdi

                yağının sonu.

Bir az öncə gəldi

          Zəfər soraqlı

            o mübarək gün,

                o hava gün,

                    o işıq gün,

                         o ürək gün!

...Əlvida söylədi otuz illik

                 qara baxtına,

aranıyla, dağıyla

            bütünləşdi Qarabağ.

Şuşa-Kəlbəcər,

      Ağdam-Laçın da

           kökləndi Bakı vaxtına;

Can oldu,

          Azərbaycan  oldu –

            Vətənləşdi  Qarabağ!

“Dəmir yumruq sanki atom bombasından da güclü bir partlayış verdi və bütün dünya silkələndi...”
Featured

“Dəmir yumruq sanki atom bombasından da güclü bir partlayış verdi və bütün dünya silkələndi...”

27.09.2021

“Bu gün Azərbaycan milli tarxində çox unudulmaz bir məqamdır. Zəfərə doğru gedən yolun ilk addımı bu gündən başlayır. Ötən ilin bu günü hamımız həyəcan içində illərlə gözlədiyimiz bir məqama qədəm qoymuşduq. Sonra günlər, həftələr keçdi və 44 günün tamamında Qarabağımız, Şuşamız işğaldan azad olundu, ürəyimiz yerinə gəldi. Dəmir yumruq sanki atom bombasından da güclü bir partlayış verdi və bütün dünya silkələndi. Bütün dünya gördü ki, Azərbaycanın yumruğu hansı gücdədir”

Bunu Moderator.az-a açıqlamasında Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlı deyib. M.Qasımlı Ali Baş Komandanın rəhbərliyi altında igid oğullarımızın torpaqlarımızı işğaldan azad etdiyini bildirib:

“Azərbaycanın torpaqlarını şəhidlərimiz, qazilərimiz Ali Baş Komandan başda olmaqla işğaldan azad etməyi bacardılar. Hər günümüz, saatımız böyük bir həyəcan içində oldu. Hər gün Prezidentin çıxışını gözləyirdik, ondan həm güc alırdıq, həm də bütün ruhumuzla ona ürək-dirək verməyə çalışırdıq. Allah şəhidlərimizə min rəhmət eləsin, qazilərimizə can sağlığı versin. Yüz minlərlə Azərbaycan əsgəri Qarabağı yenidən Azərbaycanın vətəni halına gətirdi, birləşdirdi. Biz nağılın gerçəkliyini gözümüzlə gördük. Əslində 44 gündə nəhəng bir işi gerçəkləşdirmək sıradan iş deyildi. Bu doğrudan da möcüzəli bir iş idi. Amma onu Azərbaycan ordusu, dövləti gerçək bir nağıla çevirdi.

Bu gün şübhəsiz ki, şəhidlərimizin anım günü olaraq hamımızın təkcə bir dəqiqə yox, saatlarla və bütün gün ərzində ayaqda dimdik durduğumuz bir gündür. Bununla belə bizə qürur gətirən 44 günlük zəfər yolunun ilk günü kimi qeyri-adi bir gündür. Düşünürəm ki, bu illər və on illər, qərinələr boyu çox unudulmaz bir gün olacaq.

Biz Aşıqlar Birliyi olaraq 44 günlük Vətən müharibəsi zamanı Azərbaycan Dövlət Televiziyasında ayrıca verilişlər təqdim etdik. Hər həftə bir saatlıq “Qarabağ meydanı, Koroğlu meydanı” adlı verilişimiz oldu. Onu disk şəklində də təqdim etdik. Bu yeddi saatlıq bir verilişdir. Bu verilişdə əlli nəfərdən çox aşıq ifa edib. Bu ifalarda Koroğlu nərəsi, çağırışı, Azərbaycanın yenilməzliyi hər an səslənirdi. Ali Baş Komandanın vahid bir birlik içində Azərbaycan gerçəkliyini dünyaya sübut etməsini aşıqların ifası göstərdi. Beləliklə biz bu müddəti Qarabağ, meydan, zəfər dastanı halına gətirə bildik. Bu dastanı da gerçəkləşdirən Ali Baş Komandan, müzəffər ordumuz və dövlətimiz oldu. Qoy şəhidlərimizin ruhu şad olsun. Şübhəsiz ki, onlar bizim üçün diridir, canlıdır. Onların yolunu davam etdirən qazilər də, bizlər də bütün varlığımızla Qarabağımızın bütövlüyünü təmin etməyə həmişə hazırıq. Zəfər yürüşümüz və dəmir yumruq hər məqamda öz gücündədir. Bu gün Prezidentimiz xalqa müraciət etdi. Onun səsindəki ötkəmlik, qürur və xalqın ruhunu ifadə edən bütün məqamlar hamımızın ürəyindən oldu. Bu səbəbdən də bu gün özünü vətən yolunda qurban edənlərin bir xatırlatma günüdür, həm də irəliyə doğru addımlamağın bir qürur məqamıdır ki, Azərbaycan dövlətinin tarixi birliyini, bütövlüyünü bu addımlar yüksəklərə qaldırdı. İnşallah həmişə gözəl günlər qarşımızdan gəlsin və zəfərə gedən addımlarımız bu cür mətin olsun və qeyrətlə davam eləsin”.

Vasif Əlihüseyn

 

https://moderator.az/qarabagh/395357/demir-yumruq-sanki-atom-bombasindan-da-guclu-bir-partlayis-verdi-ve-butun-dunya-silkelendi/

Featured

Molla Pənah Vaqif məqbərəsinin Şuşanın azad olmasından sonra yenidən açılışı

01.09.2021

  susa033.jpg

   1982-ci ilin yanvarında ulu öndər Heydər Əliyev tərəfindən açılan “Molla Pənah Vaqif məqbərəsi uzun illər vaqifsevərlərin ziyarət yeri olmuş və burada “Vaqif poeziya  günləri”  keçirilmişdir. Təəssüf ki, 1992-ci ildə Şuşa işğal olunduqdan sonra bu memarlıq abidəsi də mənfur ermənilər tərəfindən dağıdılmışdı.  2020- ci ilin payızındakı 44 günlük vətən müharibəsindən sonra oktyabrın 8-də Şuşa da azad olunmuş, Vaqifin məqbərəsi də işğaldan  qurtarmışdır. Ötən qısa müddət  ərzində M.P.Vaqif məqbərəsi H. Əliyev fondu tərəfindən yüksək səviyyədə bərpa olunmuşdur. 2021-ci il avqust ayının 29-da  Azərbaycan Respublikasının prezidenti İlham Əliyev və birinci vitse-prezident Mehriban xanım Əliyeva bərpa olunmuş məqbərəni açmışlar. Avqustun 30 və 31-də isə məqbərə önündə Vaqif poeziya günləri keçirilmişdir Prezident İlham Əliyevin giriş sözü ilə açılan mərasində tanınmış ziyalılar, şair və yazıçılar iştirak etmişlər.

   WhatsApp Image 2021-09-01 at 15.35.10.jpeg    Azərbaycan Aşıqlar Birliyinin sədri Əməkdar elm xadimi,professor Məhərrəm Qasımlı da mərasim iştirakçıları arasında olmuşdur.

P.S. Məhərrəm Qasımlı Şuşada olarkən  Orxan Paşa təxəllüsü ilə “Gəlmişəm, Şuşam, gəlmişəm” adlı şeir yazmışdır. Həmin şeiri də oxuculara təqdim edirik.

 

 

                           Orxan Paşa

Gəlmişəm, Şuşam, gəlmişəm

Dağıt başından dumanı,
Gəlmişəm, Şuşam, gəlmişəm.
Qalmasın ahın-amanın,
Gəlmişəm, Şuşam, gəlmişəm.

Top-tüfəngim, yarağımla,
Hesab çəkmişəm yağımla.
Ay-ulduzlu bayrağımla
Gəlmişəm, Şuşam, gəlmişəm.

Salam olsun ordumuza,
Qurur verdi yurdumuza.
Qalamıza-burcumuza
Gəlmişəm, Şuşam, gəlmişəm.

Yolu açdı igidlərim,
Qazilərim, şəhidlərim,
Ər oğlu mücahidlərim-
Gəlmişəm, Şuşam, gəlmişəm.

“Allah əkbər” sədasıyla,
“Can Qarabağ” nidasıyla.
Koroğlunun havasıyla
Gəlmişəm, Şuşam, gəlmişəm.

Haqq-tala itaətinə,
Pir-ocaq ibadətinə.
Vaqifin ziyarətinə
Gəlmişəm Şuşam, gəlmişəm.

Qarabağ bizim yerimiz,
Meydandayıq hər birimiz.
Baş komandan öndərimiz,
Gəlmişəm, Şuşam, gəlmişəm,
Gəlmişik, Şuşam, gəlmişik.

28-29 avqust 2021
                      Şuşa

19 -dən səhifə 36

  • 14
  • 15
  • 16
  • 17
  • 18
  • 19
  • 20
  • 21
  • 22
  • 23
© 2026 Bütün hüquqlar qorunur. Azərbaycan Aşıqlar Birliyi | Ünvan: Bakı ş., Zahid Xəlilov küç., 38
  • 012 497 75 91
  • asiklarbirliyi@mail.ru
  • ANA SƏHİFƏ
  • HAQQIMIZDA
  • XƏBƏRLƏR
  • TƏDBİRLƏR
  • MƏQALƏLƏR
  • MƏKTUBLAR
  • YUBİLEYLƏR
  • KİTABLAR
  • ƏLAQƏ