Azərbaycan aşıq sənətinin çağdaş ustad sənətkarlarından olan Hüseyn Əzizoğlu vəfat edib.
Hüseyn Əziz oğlu Hüseynov 1947-ci ildə Ağstafa rayonunun Göyçəli kəndində anadan olub. Hələ orta məktəbdə oxuyarkən aşıq sənətinə böyük maraq göstərib, rayonda keçirilən tədbirlərdə çıxış edərək fəxri diplom və qiymətli hədiyyələrlə təltif olunub. Sənətin sirlərinə dərindən bələd olmaq üçün 1965-1968-ci illərdə ustad aşıq Aslan Aslanovun yanında şəyird olub. Ağstafada fəaliyyət göstərən Aşıq Alı adına “Dastan” ansamblında çıxış edib. Klassik aşıq sənətinin mükəmməl bilicilərindən biri kimi tanınıb.
Ustadların yaradıcılığını, klassik saz havalarını və dastanlarımızı mükəmməl bilən Hüseyn Əzizoğlu 1983-cü ildən Ağstafa mədəniyyət evində saz müəllimi və metodist kimi də fəaliyyət göstərib, 10 şəyird yetirib. 2017-ci ildə Mədəniyyət nazirliyinin “Fəxri mədəniyyət işçisi” döş nişanına layiq görülüb.
Hüseyn Əzizoğlu eyni zamanda sazbəndliklə də məşğul olub, bu sənətin sirlərini usta Məhəmmədəli, Usta Xudu və Kamildən öyrənib.
Ustad sənətkar Hüseyn Əzizoğlunun əziz xatirəsi sənət dostlarının, onu tanıyanların və doğmalarının yaddaşında əbədi yaşayacaqdır.
Allah rəhmət eləsin!
AZƏRBAYCAN AŞIQLAR BİRLİYİ