2009-cu ildə UNESCO-nun qeyri-maddi mədəni irs üzrə reprezentativ siyahısına daxil edilən Azərbaycan aşıq sənəti bu gün özünün yeni inkişaf mərhələsindədir. Bu sənətlə bağlı respublika və beynəlxalq miqyaslı tədbirlər həyata keçirilir, ustad aşıqların yubileyləri qeyd olunur, sənətə və bu sənətin daşıyıcıları olan aşıqlara qayğı və diqqət gündən-günə artır. Aşıqlarımız fəxri adlara, Prezident təqaüdünə və digər dövlət mükafatlarına layiq görülürlər.
Təkcə 2016-cı ildə yeddi nəfər aşığa “Əməkdar Mədəniyyət İşçisi” fəxri adı verilib, bir nəfər isə Prezident təqaüdünə layiq görülüb. Bu günlərdə isə Azərbaycan aşıq sənətinin inkişafında xidmətləri olan daha beş nəfər aşıq mükafatlandırılıb. Belə ki, Azərbaycan Aşıqlar Birliyinin təqdimatı ilə aşıqlardan Oqtay Yunis oğlu Hüseynov, Hüseyn Əziz oğlu Hüseynov, Soqət Əli oğlu İsmayılov, Şahniyar Hümbət oğlu Quliyev və Qaracan İsa oğlu Kərimli Mədəniyyət və Turizm Nazirliyi tərəfindən “Fəxri mədəniyyət işçisi” adına layiq görülüblər. Mükafatları iyunun 14-də Gənc Tamaşaçılar Teatrında aşıqlara təqdim edən Mədəniyyət və Turizm naziri Əbülfəs Qarayev onları təbrik edib, mədəniyyətimizin qədim və ayrılmaz tərkib hissəsi olan aşıq sənətinin inkaşıfında bundan sonra da onlara uğurlar diləyib.
Azərbaycan Aşıqlar Birliyi mükafat alan ustad aşıqları ürəkdən təbrik eləyir və onlara can sağlığı, yaradıcılıq uğurları arzulayır!