Əməkdar İncəsənət Xadimi, ustad sənətkar Ədalət Nəsibov Azərbaycan aşıq sənətinin cağdaş dövrümüzdə yaşayan canlı klassikidir. Təsadüfi deyildir ki, ona hələ gənclik illərindən bütün sənətsevərlər Dədə Ədalət deyə müraciət edirlər. Son dövrdə onun səhhətində yaranmış problemlər sənət dostları və pərəstişkarları ilə yanaşı ölkəmizin bütün ictimaiyyətini narahat etməkdədir. Bu günlərdə Türkiyədə müayinə olunduqdan sonra Vətənə qayıdan ustad sənətkarın müalicəsi hazırda öz evində davam etdirilir.
Bu böyük sənətkara hər zaman əlahiddə qayğı və diqqət göstərən Azərbaycan Aşıqlar Birliyi yenə də Dədə Ədalətə öz həssas münasibətini göstərib. Bu barədə məlumat verən AAB-nin katibi, Əməkdar Mədəniyyət İşçisi Musa Nəbioğlu bildirib ki, iyunun 20-də AAB-nin sədri, Əməkdar Elm Xadimi, professor Məhərrəm Qasımlı, təşkilati işlər üzrə katib Altay Məmmədli, Əməkdar Mədəniyyət İşçisi Samirə Əliyeva və AAB gənclər şurasının sədri Əli Tapdıqoğlu Ədalət Nəsibova baş çəkib, onun səhhəti və müalicəsinin gedişi ilə maraqlanıblar.
Görüşdən sonra M.Qasımlı deyib: Ə.Nəsibovun səhhətində yaranmış problem ciddi olsa da, Allah böyükdür və ondan ümidi kəsmək olmaz, müalicəsi davam etdirilir və biz arzu edirik ki, o, tezliklə sağalıb yenidən sənət aləminə qayıdaraq bənzərsiz ifaları ilə pərəstişkarlarını sevindirsin.